Pitambar Deva Goswami । অসমৰ সত্ৰীয়া সংস্কৃতিৰ বাবে এক গৌৰৱৰ মুহূৰ্ত কঢ়িয়াই আনিছে মাজুলীৰ ৰাজসত্ৰ আউনীআটী সত্ৰৰ ষষ্ঠদশ সত্ৰাধিকাৰ ড০ পীতাম্বৰ দেৱগোস্বামীয়ে। লণ্ডনত অৱস্থিত বৃটীছ সংসদত প্ৰথমবাৰৰ বাবে ভাষণ প্ৰদান কৰাৰ সুযোগ লাভ কৰিছে তেওঁ।
এই বিশেষ অনুষ্ঠানত অংশগ্ৰহণৰ উদ্দেশ্যে মঙলবাৰে ড০ দেৱগোস্বামী গুৱাহাটীৰ পৰা লণ্ডন অভিমুখে যাত্ৰা কৰিব। জানিব পৰা মতে, মঙলবাৰে বিয়লি ৫ বজাত গুৱাহাটীৰ পৰা মুম্বাইলৈ ৰাওনা হৈ তাত নিশাটো কটোৱাৰ পিছত বুধবাৰে তেওঁ বিমানেৰে লণ্ডনলৈ যাত্ৰা কৰিব।
১৭ জুন, ২০২৬ তাৰিখে বৃটীছ সংসদ ভৱনৰ ১৫ নম্বৰ গৃহত অনুষ্ঠিত হ’বলগীয়া এক বিশেষ অনুষ্ঠানত ড০ দেৱগোস্বামীয়ে বৈষ্ণৱ সংস্কৃতি আৰু জনজীৱনত ইয়াৰ সুদূৰপ্ৰসাৰী প্ৰভাৱ সম্পৰ্কে প্ৰায় আধা ঘণ্টাৰ এক ভাষণ প্ৰদান কৰিব। লগতে অনুষ্ঠানটোত অসমৰ সত্ৰীয়া কৃষ্টি-সংস্কৃতিৰ প্ৰদৰ্শনৰো ব্যৱস্থা কৰা হৈছে।
উল্লেখযোগ্য যে, প্ৰথমবাৰৰ বাবে বৃটীছ সংসদ ভৱনত অসমৰ সত্ৰীয়া সংস্কৃতি সম্পৰ্কীয় বক্তব্য উপস্থাপন কৰা হ’ব। অনুষ্ঠানটোত প্ৰায় ৬২ গৰাকী বৃটীছ সাংসদ উপস্থিত থাকিব বুলি আয়োজকসকলে জানিবলৈ দিছে। লণ্ডনৰ স্থানীয় সময় অনুসৰি বিয়লি ৬ বজাৰ পৰা সন্ধিয়া ৮ বজালৈ অনুষ্ঠানটো অনুষ্ঠিত হ’ব।
লণ্ডনলৈ ৰাওনা হোৱাৰ পূৰ্বে ড০ পীতাম্বৰ দেৱগোস্বামীয়ে কয় যে, এই স্বীকৃতি কেৱল তেওঁৰ ব্যক্তিগত সাফল্য নহয়; ই সমগ্ৰ অসমবাসী আৰু সত্ৰীয়া সংস্কৃতি সাধনাত নিয়োজিত সকলো লোকৰ বাবে এক বিৰল গৌৰৱৰ বিষয়। তেওঁ আশা প্ৰকাশ কৰে যে, এই মঞ্চৰ জৰিয়তে বিশ্বদৰবাৰত অসমৰ বৈষ্ণৱ ঐতিহ্য আৰু সত্ৰীয়া সংস্কৃতি অধিক পৰিচিতি লাভ কৰিব।
এই ঐতিহাসিক অনুষ্ঠানৰ জৰিয়তে অসমৰ সমৃদ্ধ সাংস্কৃতিক ঐতিহ্য বিশ্বমঞ্চত নতুনকৈ প্ৰতিষ্ঠা লাভ কৰাৰ পথ সুগম হ’ব বুলি সচেতন মহলে মত প্ৰকাশ কৰিছে।
