দুদিনৰ বিৰতিৰ পাছতে পুনৰ প্ৰতিবাদত উত্তাল হৈ পৰিল নুমলীগড় শোধনাগাৰৰ প্ৰগতি দুৱাৰ৷ প্ৰাপ্য অধিকাৰ আৰু সংস্থাপন বিচাৰি এনআৰএলৰ দ্বিতীয় প্ৰৱেশদ্বাৰত প্ৰতিবাদ সাব্যস্ত কৰে নুমলীগড় শোধনাগাৰ পাৰ্শ্বৱৰ্তী শ্ৰমিক ঐক্যমঞ্চই৷ স্থানীয় ৰাইজৰ অধিকাৰ সুৰক্ষা, সংস্থাপন আৰু এনআৰএলৰ সম্প্ৰসাৰণ প্ৰকল্পৰ বাবে চাহ বাগিচাৰ ভূমি ক্ৰয় কৰি লোৱাৰ পাছত কৰ্মসংস্থাপন হেৰুওৱা শ্ৰমিকৰ পুনৰ্সংস্থাপন, উচ্ছেদিত পৰিয়ালৰ পুনৰ সংস্থাপন
আদিৰ দাবীৰ বেনাৰ-পোষ্টাৰ লৈ পুৰুষ-মহিলাৰ শতাধিক প্ৰতিবাদকাৰীয়ে পুৱা ৭-৩০ বজাৰ পৰা বহুসময়ৰ বাবে এনআৰএলৰ প্ৰৱেশদ্বাৰ স্তব্ধ কৰি দিয়ে৷ এটা সময়ত প্ৰতিবাদ সমাপ্তি ঘটিল যদিও প্ৰতিবাদী কাৰ্যসূচীৰ নৃত্যত্ব দিয়াসকলে এনআৰএলৈ এই বাৰ্তা প্ৰেৰণ কৰে যে ভুক্তভোগী আৰু উচ্ছেদিতসকলৰ সংস্থাপন আৰু ক্ষতিপূৰণেৰে এনআৰএলে ন্যায় প্ৰদান নকৰিলে শীঘ্ৰেই পুনৰ ব্যাপকৰূপত প্ৰতিবাদী কাৰ্যসূচী গ্ৰহণ কৰা হ’ব৷
উল্লেখ কৰিব পাৰি যে এনআৰএলৰ শোধন ক্ষমতা বছৰি তিনি মিলিয়ন মেট্ৰিক টনৰ পৰা ন মিলিয়ন মেট্ৰিক টনলৈ বৃদ্ধিৰ বাবে প্ৰয়োজন হোৱা ভূমি এনআৰএলে ৰজাবাৰী বাগিচাৰ পৰা বহুকেইটা চৰ্তৰ বিনিময়ত ক্ৰয় কৰিছিল৷ কিন্তু সম্প্ৰসাৰণকাৰ্য দ্ৰুতগতিত চলি থকাৰ পাছতো এনআৰএলে কোনো চৰ্তকেই পূৰণ কৰিব পৰা নাই বুলি সময়ে সময়ে সমালোচিত হৈ আহিছে৷
