ৰাষ্ট্ৰীয় বঁটা প্ৰাপক ৪৭ শিক্ষকক সম্বৰ্দ্ধনা ৰাষ্ট্ৰপতিৰ

দৈনন্দিন বাৰ্তা ডেস্ক : দেশত শনিবাৰে পালন কৰা হয় শিক্ষক দিৱস ৷ এই দিৱস উপলক্ষে আয়োজিত ভাৰ্চুৱেল অনুষ্ঠানত ৰাষ্ট্ৰপতি ৰামনাথ কোবিন্দই চলিত বৰ্ষৰ ৰাষ্ট্ৰীয় শিক্ষক বঁটা লাভ কৰা শিক্ষকসকলক সম্বৰ্ধনা জনায় ৷ ক’ভিড-১৯ৰ বাবে অনুষ্ঠানটো ভাৰ্চুৱেল হিচাপে আয়োজন কৰা হয় ৷ উল্লেখ্য যে এইবাৰ ৪৭ গৰাকী শিক্ষকক ৰাষ্ট্ৰীয় বঁটাৰ বাবে নিৰ্বাচিত কৰা হয় ৷ আনহাতে কেন্দ্ৰীয় শিক্ষা মন্ত্ৰী ৰমেশ পোখৰিৱাল নিশাংকই টুইট কৰি কয়, ৰাষ্ট্ৰপতি ৰামনাথ কোবিন্দৰ সৌজন্য সাক্ষাৎ কালত তেওঁ ২০২০ চনৰ ৫ ছেপ্টেম্বৰত শিক্ষক দিৱস উপলক্ষে ভাৰ্চুৱেল অনুষ্ঠানৰ বাবে আমন্ত্ৰণ জনাইছিল আৰু ৰাষ্ট্ৰীয় শিক্ষক বঁটা কাৰ্যসূচীৰ ৰূপৰেখা লৈ আলোচনা কৰে ৷ দেশৰ দৈৰ্ঘ্য আৰু প্ৰস্থজুৰি শিক্ষকৰ অসাধাৰণ আৰু মেধাবী প্ৰচেষ্টাক স্বীকৃতি জনায় আৰু উৎসাহিত কৰাৰ বাবে প্ৰতিবছৰে শিক্ষা মন্ত্ৰালয়ে এই পুৰস্কাৰ দি আহিছে ৷ এইবছৰ ক’ভিড-১৯ৰ বাবে ৰাষ্ট্ৰপতি ৰামনাথ কোবিন্দই ভাৰ্চুৱেল মাধ্যমেৰে বঁটা প্ৰদান কৰে ৷ পুৰস্কাৰ প্ৰদানৰ উপৰি বিশ্ববিদ্যালয় অনুদান আয়োগৰ সহযোগিতাত শিক্ষা মন্ত্ৰালয়ে সম্প্ৰতি আৰম্ভ কৰা ৰাষ্ট্ৰীয় শিক্ষানীতি ২০২০ৰ বৈশিষ্ট্য তুলি ধৰিবলৈ ৱেবিনাৰৰ আয়োজন কৰে ৷ উল্লেখ্য যে কঠোৰ তিনিটা পৰ্যায়ৰ অনলাইন স্বচ্ছ প্ৰক্ৰিয়াৰ পাচত ৪৭ গৰাকী পুৰস্কাৰ প্ৰাপকক নিৰ্বাচিত কৰা হয় ৷