অসমীয়া কৈৱৰ্ত সকলৰ জাতীয় প্ৰভূত্ব বিকাশ আৰু সৰ্বাংগীন উন্নতিৰ বাবে কৈৱৰ্ত স্বায়ত্ব শাসনৰ দাবীত পুনৰ সৰৱ হৈ উঠিছে কৈৱৰ্ত সম্প্ৰদায় লোকসকল।এই সন্দৰ্ভত সোমবাৰে দেৰগাঁৱৰ নেঘেৰিটিং নাট্য মন্দিৰত আয়োজিত কৰা হয় এখন ৰাজহুৱা সভা।সভাত সভাপতিত্ব কৰে বিশিষ্ট সমাজকৰ্মী তথা ৰাজনীতিবিদ ড° ৰমানন্দ দাসে।সভাৰ উদ্দেশ্য ব্যাখ্যা কৰে কৈৱৰ্ত স্বায়ত্ব শাসন পৰিষদৰ অসমৰ মুখ্য আহ্বায়ক বিপুল কৈৱৰ্ত্তই।অতিথি হিচাপে অংশগ্ৰহণ কৰে অসম কৃষি বিশ্ববিদ্যালয়ৰ প্ৰাক্তন ডীন তথা পঞ্জীয়ক ড° লক্ষ্মীকান্ত হাজৰিকা,অসমৰ আধ্যাত্মিক প্ৰাণকেন্দ্ৰৰ প্ৰধান সম্পাদক ঠানুৰাম দাস,সমাজ সংগঠক চুৰেণ দাস,অধিবক্তা দিলিপ কুমাৰ দাস,প্ৰাক্তন অ.এন.জি কৰ্মী অচ্যুত কুমাৰ দাস,ড° প্ৰণৱ জ্যোতি দাস,যুৱ সমাজকৰ্মী কনমইনা দাস,জোনমণি দাস,বিপিন বড়া আদি কৰি কেইবাখনো জিলা পৰা অহা বিভিন্ন দপ্তৰ বিশিষ্ট লোকসকলৰ উপস্থিতিত সৰ্বপ্ৰথম,সৰ্বশ্ৰেষ্ঠ,সৰ্ববৃহৎ বাণীৰে
কৈৱৰ্ত স্বায়ত্ব শাসন পৰিষদৰ সমিতিখন সভাৰ সিদ্ধান্ত মৰ্মে ড° ৰমানন্দ দাসক কেন্দ্ৰীয় সমিতি সভাপতি হিচাপে,বিপুল কৈৱৰ্ত্তক মুখ্য সম্পাদক হিচাপে লৈ ৫১জনীয়া ৰাজ্যিকভাৱে পূৰ্ণাংগ সমিতিখন গঠন কৰা হয়।সভাত প্ৰাচীন অসমীয়া কৈৱৰ্তসকলক কেন্দ্ৰীয় তথা ৰাজ্য চৰকাৰক স্বায়ত্ব শাসিত পৰিষদ দাবী উত্থাপন কৰে।সভাৰ প্ৰসংগত অসমত বাসকৰা প্ৰায় ১৪ লাখ কৈৱৰ্ত লোকৰ হৈ ন্যাৰ্য প্ৰাপৰ দাবীৰে বিভিন্ন চৰকাৰী সুবিধা আদায়ৰ বাবে সম্পূৰ্ণ গণতান্ত্ৰিক প্ৰক্ৰিয়া মাজেৰে সংগ্ৰাম অব্যাহত ৰাখিব বুলি নৱ গঠিত কৈৱৰ্ত স্বায়ত্ব-শাসন পৰিষদ গঠন দাবীৰে অসমৰ ৰাজ্যপাল,মুখ্যমন্ত্ৰী,জনজাতি উন্নয়ন মন্ত্ৰী,মুখ্য সচিব আৰু জিলা উপায়ুক্তক দাবী পূৰণৰ লিখিত স্মাৰক পত্ৰ প্ৰদান কৰিব।
বিশেষকৈ কৈৱৰ্তসকলৰ স্বকীয় সংস্কৃতি,পৰম্পৰা আৰু ভাষাৰ অস্তিত্বৰ লগতে ৰাজনৈতিক,আৰ্থসামাজিক,শৈক্ষিক আদি দিশৰ উন্নয়নৰ বাবেই স্বায়ত্ব শাসন বিচাৰিছে বুলি জানিবলৈ দিয়ে।উল্লেখযোগ্য যে,অসম বিধানসভাত অনুসূচিত জাতি সংৰক্ষিত আসনৰ ক্ষেত্ৰত চৰকাৰে শেহতীয়াকৈ অতি পৰিকল্পিত ৰাজনৈতিকভাৱে উজনি অসমত কৈৱৰ্তসকলৰ বাবে এখন আসন কৰ্তন কৰাক লৈ চৰকাৰে প্ৰতাৰণা কৰা গুৰুতৰ অভিযোগ কৈৱৰ্ত লোকসকলৰ।তাৎপৰ্যপূৰ্ণ কথাটো হ’ল যে,ৰাজ্যৰ অধিকাংশ জিলাত কৈৱৰ্তসকলৰ সংখ্যাগৰিষ্ঠতা সৰ্বাধিক,কিন্তু উন্নয়নৰ ক্ষেত্ৰত চৰকাৰ বা বিধায়কৰ পক্ষপাতিত্ব ভূমিকা গ্ৰহণ কৰি কৈৱৰ্ত এলেকা সমূহত উন্নয়নৰ ক্ষেত্ৰত পিঠি দিয়াৰ অভিযোগ উঠিছে।সেয়েহে কৈৱৰ্ত লোকসকল বসবাস কৰা জিলাসমূহৰ ৰাস্তা-ঘাট,বিদ্যুতৰ সংযোগ,স্কুল,হাস্পতাল আদিৰ অভাৱৰ লগতে চাকৰিৰ ক্ষেত্ৰতো চৰকাৰে কৈৱৰ্ত লোকসকলক বঞ্চিত কৰি অহাৰ গুৰুতৰ অভিযোগ তুলি কৈৱৰ্ত স্বায়ত্ব-শাসন পৰিষদৰ দাবী উত্থাপিত কৰিছে।
