মঙলবাৰে প্ৰধানমন্ত্ৰী (S. Jaishankar) নৰেন্দ্ৰ মোদী আৰু কেন্দ্ৰীয় গৃহমন্ত্ৰী অমিত শ্বাহে সংসদত সিন্দূৰ সন্দৰ্ভত অনুষ্ঠিত আলোচনাত ভাৰতীয় সেনাৰ সফলতাৰ বিষয়ে অৱগত কৰি কংগ্ৰেছক তীব্ৰ সমালোচনা কৰিছিল৷ ইয়াৰ পিছতে বুধবাৰে বৈদেশিক পৰিক্ৰমা দপ্তৰৰ মন্ত্ৰী এছ জয়শংকৰে কংগ্ৰেছৰ সৰ্বভাৰতীয় মুখপাত্ৰ জয়ৰাম ৰমেশক ‘চীনা গুৰু’ বুলি অভিহিত কৰে৷ কালি ৰাহুল গান্ধীয়ে কৈছিল– ‘পেহেলগামত প্ৰধানমন্ত্ৰীৰ হাতত নিৰীহ তেজ লাগিছিল৷ সেই বাবেই তেওঁৰ ভাবমূৰ্তি ৰক্ষাৰ বাবেই অপাৰেচন সিন্দূৰ চলোৱা হৈছিল৷’
ইয়াৰ সমান্তৰালকৈ ৰাহুল গান্ধী আৰু অন্যান্য কংগ্ৰেছ নেতাসকলেও দাবী কৰিছিল যে ভাৰতৰ বৈদেশিক নীতি শেহতীয়া ব্যৰ্থ হৈছে৷ বুধবাৰে কেন্দ্ৰীয় বৈদেশিক মন্ত্ৰীগৰাকীয়ে ইয়াৰ প্ৰত্যুত্তৰ দিয়৷ তেওঁ কয়, ‘ভাৰতৰ শত্ৰু চীন ইউ পি এ চৰকাৰৰ কৌশলগত বন্ধু আছিল৷’ জয়শংকৰে নাম নোলোৱাকৈয়ে জয়ৰাম ৰমেশৰ বিৰুদ্ধে শেল নিক্ষেপ কৰে৷ তেওঁ কয়, ‘এজন চীনা-গুৰুও আছে৷ তেওঁ এজন সাংসদ, মোৰ বিপৰীতে বহি থাকে৷
চীনৰ প্ৰতি তেওঁৰ বহুত মৰম আছে৷ তেওঁ ‘চিণ্ডিয়া’ নামৰ শব্দৰ সংমিশ্ৰণো উদ্ভাৱন কৰিছে৷ অৱশ্যে চীনৰ বিষয়ে মোৰ জ্ঞান কম, কিছুমান মানুহে অলিম্পিক চাবলৈ গৈ চীনৰ বিষয়ে জ্ঞান লাভ কৰিছে৷ তেওঁলোকে এতিয়া কি চুক্তিত স্বাক্ষৰ কৰিলে সেই বিষয়ে আলোচনা নকৰো৷’ জয়শংকৰে ইয়াতেই থমকি ৰোৱা নাছিল, তেওঁ কয়– ‘তেওঁলোকে চীনৰ ৰাষ্ট্ৰদূতক গৃহ শিক্ষক হিচাপে ৰাখিছে… চীনা-গুৰুজনে কৈছিল যে পাকিস্তান আৰু চীনে মিত্ৰতা কৰিছে৷ আমি এই বিষয়ে অৱগত আৰু ব্যৱস্থাও লৈছো৷ যদিও ৰাতিটোৰ ভিতৰতে মিত্ৰতা [পাকিস্তান আৰু চীনৰ মাজত] গঠন কৰাৰ কথা কোৱাৰ অৰ্থ হ’ল তেওঁলোকে ইয়াৰ পূৰ্বে শুই আছিল৷’
