শান্তিপুৰ অঞ্চলৰ ১ নং গোপালপুৰ নামঘৰত স্হানীয় শিৱ মন্দিৰ উন্নয়ন সমিতিৰ উদ্যোগত মেট্ৰিক আৰু উচ্চতৰ মাধ্যমিকত সুখ্যাতিৰে উত্তীৰ্ণ হোৱা মেধাৱী ছাত্ৰছাত্ৰী সকলক সম্বৰ্ধনা জনোৱা হয়৷ এই উপলক্ষে দেওবাৰে শান্তিপুৰ হাইস্কুলৰ শিক্ষক দেৱজিত দত্তৰ পৌৰাহিত্যত অনুষ্ঠিত সভাত বিশিষ্ট অতিথিৰ ভাষণত টীয়ক চন্দ্ৰকমল বেজবৰুৱা মহাবিদ্যালয়ৰ অৰ্থনীতি বিভাগৰ প্ৰবক্তা ৰবীন শইকীয়াই কয় যে ৰাষ্ট্ৰীয় শিক্ষানীতি ২০২০ ৰ জড়িয়তে শিক্ষা গ্ৰহণ প্ৰক্ৰিয়া সহজ কৰি তোলা হৈছে।বৃত্তিমুখী শিক্ষাৰ জড়িয়তে ছাত্ৰ-ছাত্ৰী সকলে ভবিষ্যত জীৱন সুন্দৰকৈ সজাই তুলিব পাৰে। ছাত্ৰ-ছাত্ৰীৰ জীৱন গঢ়াত আধুনিক শিক্ষা ব্যৱস্থাৰ বহু বিলাক দিশ তেখেতে ব্যাখ্যা কৰে।আন এগৰাকী বিশিষ্ট অতিথি টীয়ক প্ৰেছ ক্লাবৰ প্ৰাক্তন সভাপতি দুলাল হাজৰিকাই সাম্প্ৰতিক সময়ৰ স্বনিয়োজনৰ ক্ষেত্ৰত আহি পৰা কিছু কিছু প্ৰত্যাহ্বানৰ কথা উল্লেখ কৰি কয় যে আনুষ্ঠানিক স্বীকৃতিৰ অবিহনেও আত্মনিৰ্ভৰশীল হ’ব পৰা কামত নিজকে নিয়োজিত কৰিব পাৰিব লাগিব।
শিক্ষাৰ্থী সকলক সু-স্বাস্থ্যৰ ওপৰত গুৰুত্ব দিবলৈ তেওঁ আহ্বান জনাই হাজৰিকাই৷ অসম আদিত্য কাকতৰ ছিনিয়ৰ ষ্টাফ ৰিপৰ্টাৰ সত্যজিৎ শইকীয়াই ছাত্ৰ ছাত্ৰীসকলক সফলতা লাভ আৰু জীৱনৰ বাটত আগুৱাই যাবলৈ প্ৰতিটো দিশ প্ৰতিটো বস্তু ইতিবাচক দৃষ্টিভংগীৰে চাবলৈ পৰামৰ্শ আগবঢ়ায়৷ শিক্ষা গ্ৰহণৰ জীৱনজোৰা প্ৰক্ৰিয়াত বিদ্যালয় মহাবিদ্যালয়ৰ উপৰিও আমাৰ চৌপাশৰ প্ৰকৃতি আৰু সমাজখনৰ পৰা শিক্ষা লোৱাটো অতীব জৰুৰী বুলি মন্তব্য কৰে৷ সাংবাদিক গকুল বৰাই সকলো ছাত্ৰ-ছাত্ৰীক পিতৃ-মাতৃৰ বাধ্য হোৱাৰ পৰামৰ্শ দিয়ে। শান্তিপুৰ হাইস্কুলৰ শিক্ষক অমল দত্তই ছাত্ৰ-ছাত্ৰী সকলক মূল্যবোধৰ শিক্ষা গ্ৰহণৰ লগতে সমাজৰ প্ৰতি দায়বদ্ধতাৰে আগবাঢ়িবলৈ পৰামৰ্শ আগবঢ়ায়৷সমাজকৰ্মী জিন্টুমণি শইকীয়াও বিশিষ্ট অতিথি হিচাপে উপস্থিত থাকে৷আনহাতে তিনিকুৰিৰো অধিক স্হানীয় মেধাৱী শিক্ষাৰ্থীক উদগনি যোগাবৰ বাবে এই প্ৰচেষ্টাৰ সম্পৰ্কত মন্দিৰ উন্নয়ন সমিতিৰ সভাপতি তথা সমাজকৰ্মী ৰবীন বৰুৱাই কয় যে আধ্যাত্মিক দিশটোৰ লগতে গ্ৰামাঞ্চলৰ শৈক্ষিক আৰু সামগ্ৰীক দিশৰ বিকাশ সাধনো তেওঁলোকৰ অন্যতম লক্ষ্য৷ কম্পিউটাৰ শিক্ষাৰ প্ৰসাৰৰ বাবে প্ৰায় দুটা দশক ৰাজ্যত কাম কৰি অহা বৰুৱাই কয় যে অঞ্চলটোৰ ছাত্ৰছাত্ৰী সকলক আগলৈও এনেদৰে উৎসাহিত কৰাৰ লগতে বিভিন্ন দিশত গাইডেন্সৰ ব্যৱস্থা কৰা হ’ব৷ মন্দিৰ পৰিচালনা সমিতিৰ সম্পাদক প্ৰাঞ্জল দত্তই আদৰনী অনুষ্ঠানৰ আঁত ধৰে৷ মেধাৱী ছাত্ৰছাত্ৰীৰ লগতে গাৱৰ কেইবাজনো বৰ্ষীয়ান ব্যক্তিকো সম্বৰ্দ্ধনা জনাই অনুষ্ঠানটোত৷
