এবছুৰ জোনাই আঞ্চলিক সমিতিৰ উদ্যোগত আৰু বড়ো জাতীয় সংগঠনৰ জোনাই আঞ্চলিক সমিতি সমূহৰ সহযোগত ৯ মে’ৰ পৰা দুদিনীয়াকৈ ৩ নং সোণাপুৰ টি বি বড়ো এম ই স্কুলৰ খেলপথাৰত অনুষ্ঠিত একাদশ বাৰ্ষিক জোনাই ৰংজালি বৈসাগু সন্মিলনৰ কালি সামৰণি পৰে। অনুষ্ঠানৰ প্ৰথমদিনা পুৱা ৭ বজাত মূল তোৰণ উদ্ধোধন কৰে অৱসৰপ্ৰাপ্ত শিক্ষক অবিনাশ ব্ৰহ্মই।পুৱা ৮ বজাত পতাকা উত্তোলন কৰে এবছুৰ জোনাই আঞ্চলিক সমিতিৰ সভাপতি মনৰাম মুছাহাৰী আৰু ইউবিপিঅৰ জোনাই আঞ্চলিক সমিতিৰ সভাপতি লোহিত গৌড়া বসুমতাৰীয়ে। পুৱা ৮-৩০ বজাত গছপুলি ৰোপণ কৰে টি বি বড়ো এম ই স্কুলৰ প্ৰধান শিক্ষক চেমিৰণ বসুমতাৰীয়ে।পুৱা শ্বহীদ থৰ্লা বসুমতাৰী সোঁৱৰণী মূল মণ্ডপৰ উদ্ধোধন কৰে এবছুৰ জোনাই আঞ্চলিক সমিতিৰ প্ৰতিষ্ঠাপক সভাপতি চন্দ্ৰকান্ত বসুমতাৰীয়ে। পুৱা ৯-৩০ বজাত ৰচী টনা(পুৰুষ আৰু মহিলা) প্ৰতিযোগিতা।পুৱা ১০ বজাৰ পৰা আৰম্ভ হোৱা সাংস্কৃতিক প্ৰতিযোগিতাৰ উদ্ধোধন কৰে জোনাই আঞ্চলিক বড়ো হাৰিমু আফাডৰ সভাপতি বুদ্ধদেৱ স্বৰ্গীয়াৰীয়ে।
অনুষ্ঠানত খাম বাদন,চিফুং বাদন, ছেৰজা বাদন,দলগত চেমনীয়া বৈসাগু নৃত্য, একক বৈসাগু গীত, চেমনীয়া একক বৈসাগু গীত,ডেকা,গাভৰু একক বৈসাগু গীত,ডেকা-গাভৰু যুৰীয়া বৈসাগু গীত প্ৰতিযোগিতা অনুষ্ঠিত কৰা হয়।দিনৰ ১ বজাৰ পৰা ডেকা-গাভৰু ডেমচি নৃত্য প্ৰতিযোগিতা অনুষ্ঠিত কৰা হয়।অন্তিম তথা আজি পুৱা ৮ বজাৰ পৰা আৰম্ভ হোৱা মুকলি বৈসাগু নৃত্য প্ৰতিযোগিতাত দলগত গাভৰু বৈসাগু নৃত্য, বোৱাৰী দলগত বৈসাগু নৃত্য, যুৱক-যুৱতী দলগত বৈসাগু নৃত্য অনুষ্ঠিত কৰা হয়।দুপৰীয়া ১২ বজাৰ পৰা মনৰাম মুছাহাৰীৰ সভাপতিত্বত অনুষ্ঠিত হোৱা মুকলি সভাখন উদ্ধোধন কৰে ইউবিপিঅৰ সভাপতি মনোৰঞ্জন বসুমতাৰীয়ে কয় স্বকীয় চহকী পৰম্পৰা, ক’লা-কৃষ্টি, সংস্কৃতি সমূহৰ উদ্ধাৰ, চৰ্চ্চা, সংৰক্ষণ তথা প্ৰচাৰ আৰু প্ৰসাৰৰ বাবে সকলোৰে আগবাঢ়ি আহিলেহে জাতিৰ পৰিচয় অক্ষুন্ন থাকিব বুলি বক্তব্য ৰাখি ৰংজালি বৈসাগু হৈছে বড়ো সকলৰ প্ৰাণৰো প্ৰাণ আৰু সংস্কৃতিৰ ধ্বজাবাহক বুলি গুৰুত্বপূৰ্ণ ভাষন আগবঢ়াই বাৰেৰহনীয়া সংস্কৃতিৰ মিলনভূমি অসমৰ সকলো জাতি-জনগোষ্ঠীৰ সমন্বয় আৰু সংমিশ্ৰণৰ ৰূপেই হ’ল আমাৰ বৰ অসম। প্ৰতিটো জনগোষ্ঠীৰ মাজত ভাষা-সংস্কৃতি, সাজপাৰ, খাদ্য, লোকাচাৰৰ মাজত প্ৰাৰ্থক্য থাকিলেও সাতামপুৰুষীয়া ঐক্য আৰু সংহতি অক্ষুন্ন ৰাখি আধুনিক অসমে বিশ্বদৰবাৰত বৃহত্তৰ অসমীয়া জাতিৰূপে নিজকে পৰিচয় দাঙি ধৰিবলৈ সক্ষম হৈছে বুলি উনুকিয়াই বৈচিত্ৰ্যময় অসমত বাপুতিসাহোন ৰঙালী বিহুৱেই ঐক্য-সংহতিৰ যোগসূত্ৰ হিচাপে সকলোকে একতাৰ এনাজৰীৰে বান্ধি ৰাখিছে বুলি বক্তব্য আগবঢ়ায় ।
মুকলি সভাত মুখ্য অতিথি হিচাপে এবছুৰ সম্পাদক বডোছা ব্ৰহ্মই কয় পৰম্পৰাগত কৃষ্টি-সংস্কৃতি সমূহ নিভাঁজ ৰূপত তুলি ধৰিবলৈ প্ৰত্যেকেই আগবাঢ়ি আহিব লাগিব বুলি উল্লেখ কৰি জাতীয় পৰিছয় শক্তিশালী হিচাপে প্ৰতিষ্ঠা কৰিবলৈ হ’লে স্বকীয় ৰীতি-নীতি, পৰম্পৰা, গীত-মাত সমূহৰ বিকাশ ঘটাব লাগিব বুলি কয়।অনুষ্ঠানত সন্মানীয় অতিথি হিচাপে এবছুৰ সহকাৰী ক্ৰীড়া সম্পাদক মণিৰাম বৰগয়াৰী,এবছুৰ প্ৰাক্তন সম্পাদক ভদ্ৰ কুমাৰ ব্ৰহ্ম,ইউ এন বি বড়ো হাইস্কুলৰ প্ৰধান শিক্ষক ভূমিধৰ বড়ো,বড়ো সাহিত্য সভাৰ জোনাই জিলা সমিতিৰ সভাপতি দিলিপ বসুমতাৰী,এবছুৰ ধেমাজি জিলা সমিতিৰ উপদেষ্টা শিৱৰাম বসুমতাৰী, সভাপতি টেনজিং বড়ো,উপ সভাপতি সুৰজিৎ নাৰ্জাৰী,সাহিত্য সম্পাদক মৌজাংগসাই নাৰ্জাৰী,ধেমাজি জিলা প্ৰাক্তন এনডিএফবি ঐক্য মঞ্চৰ সাধাৰণ সম্পাদক ভদ্ৰেশ্বৰ বসুমতাৰী প্ৰমুখ্যে কেবাগৰাকী গন্যমান্য ব্যক্তি উপস্থিত থাকে ।সন্ধিয়া ৫ বজাত বঁটা বিতৰণী সভা অনুষ্ঠিত হয়।সন্ধিয়া ৭ বজাত বসন্ত গয়াৰী সোঁৱৰণী সাংস্কৃতিক অনুষ্ঠানৰ উদ্ধোধন কৰে বড়ো হাৰিমু আফাডৰ সাংগঠনিক সম্পাদক দিপুৰাম বড়োয়ে।সাংস্কৃতিক অনুষ্ঠানত কন্ঠশিল্পী কৈলাশ বসুমতাৰী, ইলা ব্ৰহ্ম আৰু স্থানীয় শিল্পী সকলে গীত পৰিৱেশন কৰে।
