দৈনন্দিন বাৰ্তাৰ সেৱা, গেলেকী, ১১ নৱেম্বৰঃ নাজিৰা মহকুমা অন্তৰ্গত নগৰকে ধৰি ইয়াৰ উপকণ্ঠ অঞ্চলসমূহত বৃদ্ধি পাইছে মাটিৰ চাকিৰ চাহিদা। ৰাজ্যৰ চৌদিশে এতিয়া দীপাৱলীক লৈ উখল মাখল পৰিবেশ। সম্প্ৰতি ৬০ বছৰৰো অধিক পুৰণি এখন বিশেষ বজাৰ। পূৰ্বপুৰুষৰ দিনৰে পৰা শিৱসাগৰত এই সকল মৃৎ শিল্পীয়ে মাটি চাকি প্ৰস্তুত কৰি জীৱিকা নিৰ্বাহ কৰি আহিছে। বিগত বৰ্ষৰ তুলনাত পোহৰৰ উৎসৱ দীপাৱলীত শিৱসাগৰ জিলা বিভিন্ন প্ৰান্তৰ লগতে নাজিৰা, নামতি-শিমলুগুৰি আৰু গেলেকীতো বৃদ্ধি পাইছে মাটি চাকিৰ বিক্ৰী।
বহু বছৰ আগৰে পৰাই মহাবাহু ব্ৰহ্মপুত্ৰৰ পাৰত মৃৎ শিল্পীয়ে মাটি চাকি প্ৰস্তুত কৰি এই শিল্প শিৱসাগৰত জীৱিত কৰি ৰাখিছে। জিলা প্ৰশাসনে ৰঙীন লাইট শিৱসাগৰত বন্ধ কৰাৰ লগে-লগে স্থানীয় থলুৱা মাটি চাকিৰ বিক্ৰী বৃদ্ধি পোৱা আৰু শিল্প জীৱিত হৈ থকাৰ নতুন এটা দিশ সূচনা হৈছে। যাৰ বাবে নিতৌ শিৱসাগৰ ব্ৰহ্মপুত্ৰৰ পাৰৰ পৰা জিলাখনৰ নানা স্থানলৈ ৰপ্তানি হৈছে থলুৱা শিল্পী সকলে নিৰ্মাণ কৰা এনে ধৰণৰ মাটি চাকি সমূহ।