শিৱসাগৰৰ ডিমৌ আৰু আমগুৰিত বৃদ্ধি পাইছে জাপানীজ এনকেফেলাইটিছ ৰোগৰ প্ৰাদুৰ্ভাৱ। ৩৪ জন আক্ৰান্ত, এজনৰ মৃত্যু
বাৰিষা আগমনৰ সামান্তৰাল ভাৱে ৰাজ্যত ক্ৰমাৎ বৃদ্ধি পাইছে জাপানীজ এনকেফেলাইটিছ তথা এনকেফেলাইটিছ সদৃশ ৰোগৰ। শিৱসাগৰত বৃদ্ধি পাইছে জাপানীজ এনকেফেলাইটিছ আক্ৰান্তৰ ৰোগী । বিগত বৰ্ষত জিলাখনত এই ৰোগে সন্ত্ৰাসৰ ৰূপ ধাৰণ কৰাৰ পাছত ২০১২ চনৰ পৰা আৰম্ভ কৰা প্ৰতিষেধক প্ৰদানে এই ৰোগৰ প্ৰাদুৰ্ভাৱ কিছু সীমিত কৰিছিল । যদিও এতিয়া পুনৰ শিৱসাগৰ জিলা এনকেফেলাইটিছ ৰোগৰ অভিকেন্দ্ৰ ৰূপে পৰিগণিত হৈ আহিছে । সমাগত বছৰৰ আজিলৈকে এই ৰোগত মুঠ ৩৪ গৰাকী লোক আক্ৰান্ত হোৱাৰ বিপৰীতে মৃত্যু হৈছে এজন লোকৰ । ইয়াৰে জাপানীজ এনকেফেলাইটিছ ৰোগত ১২ জন লোক আক্ৰান্ত হোৱাৰ বিপৰীতে সদৃশ ৰোগত আক্ৰান্ত হৈছে ২২ গৰাকীকৈ লোক । আমগুৰি স্বাস্থ্য খণ্ডৰ অন্তৰ্গত ম’ৰাবজাৰত এনকেফেলাইটিছ সদৃশ ৰোগত আক্ৰান্ত হৈ এগৰাকী কিশোৰীৰ মৃত্যু হয় । আক্ৰান্ত সকলৰ সৰহ সংখ্যক সুস্থ হৈছে ।
যদিও শিৱসাগৰ অসামৰিক চিকিৎসালয়, চ্যুকাফা মাল্টি স্পেচিয়েলিটি চিকিৎসালয়, যোৰহাট চিকিৎসা মহাবিদ্যালয় আৰু ডিব্ৰুগড় চিকিৎসা মহাবিদ্যালয়ত এজনকৈ ৰোগী জাপানীজ এনকেফেলাইটিছ তথা এনকেফেলাইটিছ সদৃশ ৰোগত চিকিৎসাধীন হৈ আছে । শিৱসাগৰ জিলা ভাৰপ্ৰাপ্ত যুটীয়া স্বাস্থ্য সঞ্চালক ডাঃ হেমন্ত বৰুৱা ডাঙৰীয়াই স্বাস্থ্য বিভাগৰ তৰফৰ পৰা ৰোগ প্ৰতিৰোধৰ বাবে মহ খেদোৱা ধোঁৱা প্ৰদান, ঔৰধীযুক্ত আঁঠুৱা বিতৰণ, সজাগতা সভা আদি অব্যাহত ৰাখিছে । যদিও ৰাইজক ঘৰৰ চৌহদ পৰিষ্কাৰ কৰি ৰখাৰ লগতে মহ উৎপন্ন হ’ব পৰা পানী বন্ধ ঠাই সমূহ পৰিষ্কাৰ কৰি ৰাখিবলৈ জিলা স্বাস্থ্য বিভাগে আহ্বান জনাইছে ।
সামান্য গাৰ বিষ, জ্বৰ আদি অনুভৱ কৰিলে তৎকালে চিকিৎসকৰ পৰামৰ্শ লবলৈও জিলা স্বাস্থ্য বিভাগৰ তৰফৰ পৰা ৰাইজক অনুৰোধ জনোৱা হৈছে । ডিমৌ স্বাস্থ্য খণ্ড আৰু আমগুৰিৰ ম’ৰাবজা স্বাস্থ্য খণ্ডত এই ৰোগত সৰ্বাধিক লোক আক্ৰান্ত হোৱাৰ তথ্য লাভ কৰা হৈছে ।