দেশ তথা ৰাজ্যৰ ভালেকেইগৰাকী দেহশ্ৰীবিদ, শৰীৰচৰ্চাবিদ, প্ৰতিযোগী আৰু ৱৰ্ল্ড এমেচাৰ বৰ্ডি বিল্ডিং এ’চছিয়েছনৰ প্ৰতিনিধিৰ অংশগ্ৰহণেৰে ধেমাজিত সফলতাৰে অনুষ্ঠিত হয় ৰাষ্ট্ৰীয় পৰ্যায়ৰ দেহশ্ৰী প্ৰতিযোগিতা৷
উৰিষ্যা, পাঞ্জাৱ, দিল্লী, পশ্চিমবংগ আৰু অসমকে ধৰি দেশৰ বচা-বছা প্ৰায় ৩০ গৰাকী দেহশ্ৰী প্ৰতিযোগীয়ে অংশগ্ৰহণ কৰা ‘মিষ্টাৰ সিদ্ধাৰ্থ বৰগোহাঁই ক্লাছিক-২০২৪’ -শীৰ্ষক প্ৰথম বাৰ্ষিক মিষ্টাৰ সিদ্ধাৰ্থ বৰগোহাঁই সোঁৱৰণী ৰাষ্ট্ৰীয় মুকলি প্ৰাইজমাণি দেহশ্ৰী প্ৰতিযোগিতাত চেম্পিয়নৰ খিতাপ অৰ্জন কৰে সুদুৰ উৰিষ্যাৰ সত্যজিত প্ৰতিহাৰীয়ে ৷ চেম্পিয়নৰ খিতাপ অৰ্জন কৰা প্ৰতিযোগী সত্যজিত প্ৰতিহাৰীয়ে নগদ ১.৫ লাখ টকাৰ লগতে ট্ৰফি আৰু প্ৰমানপত্ৰ লাভ কৰে ৷
ইফালে প্ৰতিযোগিতাৰ প্ৰথম ৰানাৰ্ছআপৰ খিতাপ অৰ্জন কৰে গুৱাহাটীৰ সন্তোষ বড়োয়ে আৰু দ্বিতীয় ৰানাৰ্ছআপ বিবেচিত হয় যোৰহাটৰ ৰাজা দাসে ৷ প্ৰতিযোগিতাত প্ৰথম ৰানাৰ্ছআপ আৰু দ্বিতীয় ৰানাৰ্ছআপ খিতাপ অৰ্জন কৰা ক্ৰমে গুৱাহাটীৰ সন্তোষ বড়োৱে নগদ ৭৫ হাজাৰ আৰু ৰাজা দাসে নগদ ৫০ হাজাৰ টকাৰ লগতে ট্ৰফি আৰু প্ৰমানপত্ৰ লাভ কৰে ৷ ইফালে প্ৰতিযোগিতাত শীৰ্ষ স্থানপ্ৰাপ্ত ৭গৰাকী প্ৰতিযোগী ক্ৰমে দেৱজিৎ পেগু, কুশল কলিতা, ইন্দ্ৰ কুমাৰ, ৰাতুল গোঁহাই, সিদ্ধাৰ্থ বৰকাকতি, ওমপ্ৰকাশ নেৱাৰ আৰু শুভাঙ্কৰ দাসে নগদ ২০ হাজাৰ টকাকৈ প্ৰাইজমানি আৰু ট্ৰফি লাভ কৰিবলৈ সক্ষম হয় ৷
উল্লেখ্য যে, অকালতে এক পথ দুৰ্ঘটনাত পতিত হৈ চিৰদিনৰ বাবে হেৰাই যোৱা ধেমাজিৰ প্রতিশ্রুতিসম্পন্ন শৰীৰচৰ্চাবিদ সিদ্ধাৰ্থ বৰগোহাঁইৰ সোঁৱৰণীত অনুষ্ঠিত কৰা মিষ্টাৰ সিদ্ধাৰ্থ বৰগোহাঁই সোঁৱৰণী ৰাষ্ট্ৰীয় মুকলি প্ৰাইজমাণি দেহশ্ৰী প্ৰতিযোগিতাখনি ধেমাজি কোলাপথাৰস্থিত সিদ্ধাৰ্থ বৰগোহাঁই ক্ষেত্ৰত সৰ্বাঙ্গসুন্দৰভাৱে অনুষ্ঠিত হয় ৷
প্রতিভাসম্পন্ন যুৱ শৰীৰচৰ্চাবিদ গৰাকীৰ প্ৰতি যথোচিত সন্মান জনোৱাৰ লগতে তেওঁৰ ক্রীড়া প্রতিভাক যুগমীয়া কৰি ৰখাৰ উদ্দেশ্যেৰে তেখেতৰ পিতৃ, বিশিষ্ট সমাজকৰ্মী মুহি বৰগোহাঁই তথা পৰিয়ালবৰ্গই World Amature Body Building Association চমুকৈ WABBA পৰিচালনাত এই ৰাষ্ট্ৰীয় পৰ্যায়ৰ দেহশ্ৰী প্ৰতিযোগীতাখনি আয়োজন কৰে৷
এদিনীয়া কাৰ্যসূচীৰে অনুষ্ঠিত প্ৰতিযোগিতাখনিৰ পুৱা সিদ্ধাৰ্থ বৰগোহাঁই সোঁৱৰণী স্মৃতিসৌধ উন্মোচনেৰে শুভাৰম্ভ হয় ৷ কাৰ্যসুচীত প্ৰয়াত সিদ্ধাৰ্থ বৰগোহাঁই ন্যাসৰ পতাকাৰ লগতে WABBAৰ ৰাষ্ট্ৰীয় আৰু ৰাজ্যিক পতাকা সমান্তৰালভাৱে উত্তোলন কৰাৰ পিছতেই শৰীৰচৰ্চা সম্পৰ্কীয় এখনি গুৰুত্বপূৰ্ণ আলোচনাচক্ৰ অনুষ্ঠিত হয় ৷
ৰাজ্যৰ জেষ্ঠ সাংবাদিক প্ৰণয় বৰদলৈয়ে সঞ্চালনা কৰা আলোচনাচক্ৰ উদ্বোধন কৰে বিশিষ্ট শিক্ষাবিদ ড° দয়ানন্দ বৰগোহাঁইয়ে ৷ আলোচনাচক্ৰত কটন বিশ্ববিদ্যালয়ৰ প্ৰাণী বিজ্ঞান বিভাগৰ অৱসৰপ্ৰাপ্ত মুৰব্বী অধ্যাপক ড° ৰাতুল ৰাজখোৱা, গুৱাহাটী বিশ্ববিদ্যালয়ৰ ডিন ড° যোগেন কলিতা, WABBAৰ ৰাষ্ট্ৰীয় সম্পাদক সঞ্জীৱ ঝা, দিল্লী ৰাজ্যিক WABBAৰ সভাপতি সুবোধ ঝা, ৰাজ্যিক WABBAৰ সভাপতি জয়ন্ত ৰাজকোঁৱৰ, ৰাজ্যিক সম্পাদক গৌতম কলিতা, বিশিষ্ট শৰীৰচৰ্চাবিদ, অভিনেতা ভাস্কৰ তামুলী, মিষ্টাৰ এছিয়া-২০১৭ৰ খিতাপপ্ৰাপ্ত দীপক গগৈ, মাষ্টাৰছ্ ইউনিভাৰ্চ সমীৰ পাল প্ৰমুখে কেইবাগৰাকীও শৰীৰচৰ্চাবিদ আৰু সমল ব্যক্তিয়ে অংশগ্ৰহণ কৰে ৷ ইপিনে সন্ধিয়াভাগত প্ৰয়াত সিদ্ধাৰ্থ বৰগোহাঁইৰ জীৱনৰ আধাৰত ৰচিত সোঁৱৰণী গীত উন্মোচন, ‘সিদ্ধাৰ্থ’ শীৰ্ষক স্মৰণিকা উন্মোচন আৰু সোঁৱৰণিমুলক তথ্যচিত্ৰ প্ৰদৰ্শন কৰাৰ পিছতেই মুল প্ৰতিযোগিতা অনুষ্ঠিত হয় ৷
ধেমাজি জিলা আয়ুক্ত অংকুৰ ভৰালীয়ে উদ্বোধন কৰা প্ৰতিযোগীতাত প্ৰতিযোগীসকলে আকৰ্ষণীয় দেহসৌস্তৱ প্ৰদৰ্শন কৰি উপস্থিত ক্ৰীড়াপ্ৰেমী দৰ্শকক আকৃষ্ট কৰে ৷
