গুজৰাটৰ বিদ্যালয়ত পৰিপূৰক পাঠ্যপুথি হ’ল ভগৱৎ গীতা। ৰাজ্য খনৰ চৰকাৰে শিক্ষাৰ্থী আৰু ভাৰতৰ সাংস্কৃতিক ঐতিহ্যৰ মাজত এক শক্তিশালী সম্পৰ্ক গঢ়ি তোলাৰ লক্ষ্যৰে অতিৰিক্ত পাঠ্যপুথি হিচাবে ‘ভগৱৎ গীতা’ প্ৰৱৰ্তন কৰিছে। আগন্তুক শিক্ষাবৰ্ষৰ পৰা ৬ ৰ পৰা ৮ম শ্ৰেণীৰ পাঠ্যক্ৰমত অন্তৰ্ভুক্ত হ’বলগীয়া পাঠ্যক্ৰম তিনি বছৰ পূৰ্বে কেন্দ্ৰীয় চৰকাৰে ৰূপায়ণ কৰা ৰাষ্ট্ৰীয় শিক্ষা নীতিত উল্লেখ কৰা নীতিবোৰৰ সৈতে সংগতি ৰাখি কৰা হৈছে। গুজৰাটৰ শিক্ষা ৰাজ্যিক মন্ত্ৰী প্ৰফুল পানছেৰিয়াই ঘোষণা কৰে যে ৰাজ্যিক শিক্ষা বিভাগে ৬ ৰ পৰা ৮ ম শ্ৰেণীৰ বাবে পৰিপূৰক পাঠ্যপুথি হিচাপে পাঠ্যক্ৰমত ‘শ্ৰীমদ ভাগৱত গীতা’ অন্তৰ্ভুক্ত কৰিছে। তেওঁ এক সামাজিক মাধ্যমৰ পোষ্টত কয় যে ইয়াৰ উদ্দেশ্য হৈছে ভাৰতৰ সমৃদ্ধ, বৈচিত্ৰ্যপূৰ্ণ আৰু প্ৰাচীন সাংস্কৃতিক ঐতিহ্য আৰু জ্ঞান পৰম্পৰাৰ সৈতে শিক্ষাৰ্থীসকলৰ এক গভীৰ সংযোগ গঢ়ি তোলা।
এই সিদ্ধান্তৰ বাবে মুখ্যমন্ত্ৰী ভূপেন্দ্ৰ পেটেলক প্ৰশংসা কৰি পানছেৰিয়াই উল্লেখ কৰে যে গীতাৰ দৰে শাস্ত্ৰৰ পৰিপূৰক পাঠ্যপুথিৰ অন্তৰ্ভুক্তিয়ে শিক্ষাৰ্থীসকলৰ মাজত নৈতিক মূল্যবোধৰ বিকাশত অৰিহণা যোগাব। তেওঁ লগতে কয় যে ৬ ৰ পৰা ৮ ম শ্ৰেণীৰ বাবে প্ৰস্তুত কৰা প্ৰাৰম্ভিক অংশটো শীঘ্ৰেই বিতৰণ কৰা হ’ব। পানছেৰিয়াই কয়, “ৰাষ্ট্ৰীয় শিক্ষা নীতি ২০২০’ৰ অধীনত গ্ৰহণ কৰা আৰু প্ৰধানমন্ত্ৰীৰ দ্বাৰা নিৰ্দেশিত এই সিদ্ধান্তই শিক্ষাৰ্থীসকলৰ মাজত মূল্যবোধ গঢ়ি তোলাত এক গুৰুত্বপূৰ্ণ ভূমিকা পালন কৰিব।” ২০২২ চনৰ মাৰ্চ মাহত গুজৰাট চৰকাৰে বিধানসভাত ঘোষণা কৰিছিল যে ভগৱৎ গীতাক ৰাজ্যজুৰি ৬ ৰ পৰা ১২ শ্ৰেণীৰ বাবে বিদ্যালয়ৰ পাঠ্যক্ৰমত অন্তৰ্ভুক্ত কৰা হ’ব।