দৰং জিলাৰ সদৰ স্থান মঙলদৈ নগৰ আৰু ইয়াৰ পাৰ্শ্বৱৰ্তী এলেকাত সম্প্ৰতি জাক জাক বান্দৰৰ সন্ত্ৰাস। পুৱা হলেই মঙলদৈ নগৰৰ মাজমজিয়াৰ বিশেষকৈ এল এন বি ৰোডত ইছলামপুৰ, কৰিমচ’ক দিশৰ পৰা জাকে জাকে বান্দৰ খাদ্যৰ সন্ধানত ওলাই আহি মানুহৰ থকা ঘৰ, দোকান আদিত অভিযান চলায় । গৃহস্থৰ ঘৰৰ বাৰীৰ শাক পাচলি, ফলমূল আদি এফালৰ পৰা তহিলং কৰি যায়। বৰ্তমান বান্দৰৰ সন্ত্ৰাসত গৃহস্থই ঘৰৰ ভেন্টিলেটৰ, দুৱাৰ-খিৰিকী আদি খুলিব নোৱাৰা অৱস্থা হৈছে । আচৰিত কথা এই যে মানুহক অলপো ভয় নকৰে এই বান্দৰবোৰে।
গৃহস্থই খেদিব গলে ওলোটাই গৃহস্থকহে খেদি আহে বা ভয় দেখুৱায়। বিশেষকৈ প্ৰাতঃভ্ৰমণ কৰিবলৈ যোৱা পুৰুষ মহিলাক এই বান্দৰ বোৰে প্ৰায়ে আক্ৰমণ কৰিবলৈ উদ্যত হয় আৰু কেতিয়াবা আক্ৰমণ কৰেও । কেতিয়াবা আকৌ খেদি আহে। একাংশ প্ৰাতঃভ্ৰমণকাৰীয়ে বান্দৰৰ ভয়ত হাতত লাঠি, কেটেপা আদিও লৈ আহে ।
মঙলদৈ নগৰৰ বিশেষকৈ ভেবাৰঘাট, ইছলামপুৰ, কৰিমচ’ক , পাচঁ নং ৱাৰ্ড , ফৰজ নগৰ, মুক্তিয়াৰ নগৰ, চপাই আদিত বান্দৰৰ উপদ্ৰৱত ৰাইজ অতিষ্ঠ হৈ পৰিছে। উল্লেখযোগ্য যে মঙলদৈ নগৰত দীৰ্ঘদিন ধৰি বান্দৰৰ সন্ত্ৰাস অব্যাহত আছে যদিও বান্দৰৰ সন্ত্ৰাস নিয়ন্ত্ৰণ কৰিবলৈ বন বিভাগ নাইবা দৰং জিলা প্ৰশাসনে এই পৰ্যন্ত কোনো তৎকালীন পদক্ষেপ গ্ৰহণ কৰা পৰিলক্ষিত হোৱা নাই। ইয়াৰ পূৰ্বেও ভুক্তভোগী ৰাইজে বান্দৰৰ সন্ত্ৰাস নিয়ন্ত্ৰণ কৰিবলৈ বন বিভাগ আৰু জিলা প্ৰশাসনক কেইবাবাৰো দাবী জনাইছিল।
