নলবাৰী জিলাৰ বৰনৰ্দ্দীস্থিত ঐতিহাসিক গণেশ দেৱালয়ত চুৰি হোৱা মূল বিগ্ৰহ আৰু অলংকাৰ পুনৰ থৈ গ’ল চোৰে। বুধবাৰে পুৱাই মন্দিৰৰ চোতালত গণেশৰ বিগ্ৰহ আৰু আ- অলংকাৰ দেখি উৎফুল্লিত হৈ পৰে বৃহত্তৰ অঞ্চলটোৰ ৰাইজ৷
উল্লেখ্য, ৭ অক্টোবৰত ৰজাদিনীয়া দেৱালয়খনৰ গণেশ মন্দিৰৰ পৰা চুৰি হৈছিল মূল বিগ্ৰহ আৰু বহু মূল্যৱান আ-অলংকাৰ৷ লক্ষ্যণীয় ভাবে পুৱাই মন্দিৰৰ চোতালতে বিগ্ৰহ আৰু অলংকাৰ দেখি উৎফুল্লিত হৈ ডবা, শংখ, বজাই আনন্দ কৰে অঞ্চলটোৰ ৰাইজে৷
দেৱালয় খনত হোৱা উক্ত চুৰি ঘটনাৰ পিছত সমিতিয়ে বেলশৰ আৰক্ষীত এজাহাৰ দাখিলৰ পিছতো আৰক্ষীয়ে সন্ধান উলিয়াবলৈ সক্ষম হোৱা নাছিল চুৰি হোৱা বিগ্ৰহ আৰু অলংকাৰৰ লগতে চুৰি কাণ্ডত জড়িত থকা চোৰৰ৷
ইপিনে উক্ত দেৱালয়ৰ কিছু নাতিদূৰৰ বাঁহজানীৰ সীমামূৰীযা সতীৰকুৰ গোপাল মন্দিৰতো একেদিনাই চুৰি কাৰ্য সংঘটিত হৈছিল। চোৰে মন্দিৰটোৰ দান পাত্ৰৰ পৰা নগদধন চুৰি কৰি নিছিল। কিন্তু ইয়াৰ কোনো সম্ভেদ আজিলৈকে নোলাল।
