অসমৰ মুখ্যমন্ত্ৰী ডঃ হিমন্ত বিশ্ব শৰ্মাই ৬ ফেব্ৰুৱাৰীত তিতাবৰ বিধান সভা সমষ্টিৰ তিতাবৰ নগৰৰ ৰাজীৱ গান্ধী ক্ৰীড়া প্ৰকল্পত অসম ৰাজ্যিক গ্ৰামীণ জীৱিকা অভিযান আৰু ৰাষ্ট্ৰীয় নগৰীয়া জীৱিকা অভিযানৰ অন্তৰ্গত আত্মসহায়ক গোটৰ মহিলাসকলক মুখ্যমন্ত্ৰী ডঃ হিমন্ত বিশ্ব শৰ্মাৰ অভিলাষী আঁচনি ‘মুখ্যমন্ত্ৰী মহিলা উদ্যমিতা অভিযান’ৰ অধীনত প্ৰথম পৰ্যায়ৰ ১০ হেজাৰ টকাৰ চেক বিতৰণ কাৰ্যসূচী শুভাৰম্ভ কৰে। প্ৰায় ৪০ হেজাৰৰো অধিক লোকৰ সমাৱেশত অনুষ্ঠিত হোৱা অনুষ্ঠানত তিতাবৰ বিধান সভা সমষ্টিৰ অসম ৰাজ্যিক গ্ৰামীণ জীৱিকা অভিযানৰ অধীনস্থ তিতাবৰ উন্নয়ন খণ্ডৰ অন্তৰ্গত ১৯ টকা সামূহিক পৰ্যায়ৰ সংগঠন আৰু ১৬৪ টা গ্ৰাম্য সংগঠনৰ অন্তৰ্গত প্ৰতিটো আত্মসহায়ক গোটৰ পৰা নিৰ্বাচিত ৩৫,৪৫৬ গৰাকী মহিলা হিতাধিকাৰীয়ে ১০ হেজাৰ টকাকৈ উদ্যমিতা পুঁজিৰ চেক লাভ কৰে। অসম চৰকাৰৰ বিত্ত মন্ত্ৰী অজন্তা নেওগ, প্ৰাক্তন কেন্দ্ৰীয় মন্ত্ৰী তথা সাংসদ ৰামেশ্বৰ তেলী, তিতাবৰ বিধান সভা সমষ্টিৰ সৰ্বজন পৰিচিত বিশিষ্ট সমাজকৰ্মী তথা ঠেঙ্গাল কছাৰী স্বায়ত্বশাসিত পৰিষদৰ মুখ্য কাৰ্যবাহী সদস্য কুমুদ চন্দ্ৰ কছাৰী, যোৰহাট জিলাৰ আয়ুক্ত জয় শিৱানী, যোৰহাট জিলা বিজেপিৰ সভাপতি শান্তনু পূজাৰী, মৰিয়নিৰ বিধায়ক ৰূপজ্যোতি কুৰ্মী, প্ৰাক্তন বিধায়ক ৰাণা গোস্বামী, যোৰহাট জিলা পৰিষদৰ অধ্যক্ষ সুৰজিৎ শইকীয়া, তিতাবৰৰ বিজেপিৰ যুৱ নেতা দীপক সন্দিকৈ, তিতাবৰ আঞ্চলিক পঞ্চায়তৰ সভাপতি মনদ্বীপ তুংখুঙীয়া, তিতাবৰৰ বিধায়ক ভাস্কৰজ্যোতি বৰুৱা, ধীৰাজ গোৱালা আদি বহুকেইগৰাকী বিশিষ্ট ব্যক্তি উপস্থিত থকা ‘মুখ্যমন্ত্ৰী মহিলা উদ্যমিতা অভিযান’ৰ চেক প্ৰদানৰ অনুষ্ঠানত মুখ্যমন্ত্ৰী ডঃ শৰ্মাই কয় যে, সমগ্ৰ অসমত ৩২ লাখ মহিলাক সামৰি লোৱাৰ লক্ষ্যৰে এই পৰ্যন্ত ৰাজ্যখনৰ ১১১ টা বিধান সভা সমষ্টিত ‘মহিলা উদ্যমিতা অভিযান’ৰ পুঁজিৰ চেক বিতৰণ সম্পন্ন হ’ল আৰু বৰ্তমানলৈকে ৰাজ্যৰ ২৭ লাখৰো অধিক মহিলাৰ হাতত উদ্যমিতা পুঁজি বিতৰণ কৰা হৈছে।
তিতাবৰ বিধান সভা সমষ্টিৰ অন্তৰ্গত ২৬ খন গাঁও পঞ্চায়তত অসম ৰাজ্যিক গ্ৰামীণ জীৱিকা অভিযানৰ অধীনস্থ আত্মসহায়ক গোটৰ সদস্যা তথা আই মাতৃ সকলক উদ্দেশ্যি সমষ্টিটোৰ ইতিমধ্যে লাখপতি বাইদেউ হোৱা ক্ৰমে ববিতা ভূঞা, মীনা গগৈ, পাৰিজাত বৰুৱা দত্ত, ৰূপাঞ্জলী কোঁৱৰ, লক্ষী গগৈ, জ্যোতি শৰ্মা, সেউতী গগৈ, গীতাঞ্জলি বৰদলৈ, প্ৰতিমা বৰুৱা, মুনমী শইকীয়া, ৰূপা বৰুৱা, প্ৰণিতা গগৈ, মেঘালী কছাৰী, নিৰু গগৈ, ৰিংকি দত্ত, জ্যোতি বৰা, মুনমী শইকীয়া, প্ৰতিমা বৰুৱা, দীপালী কলিতা, মৃদুলা চুতীয়া, মামণি গগৈৰ নাম তালিকা পাঠ কৰি বিশাল ৰাজহুৱা সভাত ভাষণ প্ৰদান কৰি মুখ্যমন্ত্ৰী ডঃ হিমন্ত বিশ্ব শৰ্মাই কয় যে, অহা পাঁচ বছৰত মহিলাসকলক মাৰ্কেটিঙত সহায় কৰাৰ লগতে চৰকাৰী কাম, বিভিন্ন ধৰণৰ প্ৰশিক্ষণ আৰু বজাৰ নিৰ্মাণ কৰি দিব বুলি উল্লেখ কৰে। তেওঁ লগতে কয় যে, প্ৰতিগৰাকী মহিলাই ইচ্ছা কৰিলে লাখপতি বাইদেউ হ’ব পাৰিব। চৰকাৰৰ নতুন সিদ্ধান্তৰ কথা জানিবলৈ দি মুখ্যমন্ত্ৰী গৰাকীয়ে পুনৰ কয় যে, লাহে লাহে চৰকাৰৰ কাম-কাজৰ লগতো মহিলাসকলক জড়িত কৰিব, যাতে অসমৰ প্ৰতিগৰাকী মহিলাক লাখপতি বাইদেউ হিচাবে নিৰ্মাণ কৰিব পাৰি। যদি এশ গৰাকী মহিলা লাখপতি বাইদেউ হ’ব লাগে বুলি কয়, তেতিয়াহে ৫০ বা ৬০ গৰাকী হ’ব। চৰকাৰে যদি ভালকৈ আগুৱাই লৈ যায় ৯০ শতাংশ মহিলাক লাখপতি বাইদেউ কৰিব পাৰিব। সেয়ে দহ হেজাৰ টকা দি মনৰ আকাঙ্খা পূৰণ কৰিব বিচাৰিছে।
দহ হেজাৰ টকা কেনেদৰে ব্যৱহাৰ কৰিব সেই সন্দৰ্ভত মুখ্যমন্ত্ৰী গৰাকীয়ে কয়, প্ৰথমে আত্মসহায়ক গোটত দহ হেজাৰ টকাকৈ এক লাখ টকা জমা কৰিব লাগিব। গোটত যদি কাম কৰে তেওঁক প্ৰথমে লোণ দিয়ক আৰু সূতৰ সৈতে লোণ ঘূৰাই দিয়ক। যদি দহ গৰাকীয়ে একেলগে কিবা কাম কৰাৰ পৰিকল্পনা কৰে সেইটোও কৰক। গোটটো শক্তিশালী হ’ব। দ্বিতীয়তে কিছুসংখ্যক মহিলাই গোটত নিদিব পাৰে, নিজে কিবা কৰিব সেয়াও কৰক। কোনোবাই ছাগলী পালন কৰিব, দুগ্ধ উৎপাদন কৰিব পাৰিব, মৌ পালন কৰিব পাৰে, চিলাই মেচিন ক্ৰয় কৰিব পাৰে, তাঁতশালৰ বাবে সুতা ক্ৰয় কৰিব পাৰে। যদি কিবা কাম কৰি আছে এই দহ হেজাৰ টকা মূলধন হিচাপে খটুৱাব পাৰে। তৃতীয়তে নিজে কিবা কৰিলে টকা নোহোৱা হৈ যাব বুলি ভবা মহিলা সকলে নিজৰ মানুহজনৰ ব্যৱসায়ত সহায় কৰিব পাৰিব বা মানুহজনৰ সৈতে লগ লাগি উৎপাদনমুখী কামত ব্যৱহাৰ কৰিব লাগিব। ৭-৮ মাহৰ পিছত চৰকাৰী প্ৰতিনিধি প্ৰতিগৰাকী মহিলাৰ ঘৰলৈ গৈ টকা কি কৰিলে সুধিব। যদি মোবাইল কিনে, কাপোৰ কিনে তেন্তে পৰীক্ষাত ফেইল। যদি গোটত টকা দিছে, গোটটো ভালকৈ চলি আছে, মানুহজনৰ ব্যৱসায়ত টকা ব্যৱহাৰ কৰিলে পৰীক্ষাত পাছ কৰিব আৰু তেওঁলোকক মাতি আনি ২৫ হেজাৰ টকাকৈ দিব। আকৌ ঘৰলৈ চৰকাৰী লোক গৈ ২৫ হেজাৰ টকাৰে কি কৰিলে সুধিব। যদি ব্যৱসায় ভালদৰে হৈছে তেন্তে তৃতীয় বাৰত ৫০ হেজাৰ টকা দিয়া হ’ব বুলি মুখ্যমন্ত্ৰী ডঃ শৰ্মাই উপস্থিত মহিলা সকলক জানিবলৈ দিয়ে।
তিতাবৰ বিধান সভা সমষ্টিত অধিকাংশ মহিলাই অৰুণোদয় আঁচনি লাভ কৰিছে আৰু যিসকল ৰৈ গৈছে বঞ্চিত মহিলাক শীঘ্ৰে অৰুণোদয় দিয়া হ’ব। ৰাজ্যৰ ৪০ লাখ অৰুণোদয় হিতাধিকাৰীৰ একাউণ্টত চলিত মাহৰ ২০ তাৰিখে ৮ হেজাৰ টকাকৈ জমা কৰা হ’ব। সমষ্টিটোত পুনৰ নতুনকৈ দুহেজাৰ হিতাধিকাৰীক অৰুণোদয় আঁচনিত অন্তৰ্ভূক্ত কৰা হ’ব। তেওঁ কয় যে, সমষ্টিটোত ছাত্ৰীৰ বাবে ৰূপায়ন কৰা নিযুত মইনা আঁচনিৰ জৰিয়তে উপকৃত হৈছে। নিযুত মইনা আঁচনিৰ জৰিয়তে ৰাজ্যৰ ৪ লাখ ছাত্ৰী উপকৃত হৈছে। তেওঁ কয় যে, জনসাধাৰণ বিশেষকৈ মহিলা সমাজ উপকৃত হোৱা এনে বৃহৎ আঁচনি পূৰ্বতে অসমত গ্ৰহণ কৰা হোৱা নাছিল।বৰ্তমান চৰকাৰৰ কাৰ্যকালত ডেৰ লাখ যুৱক-যুৱতীয়ে এটকাও ঘোচ নিদিয়াকৈ স্বচ্ছতাৰে চৰকাৰী চাকৰি লাভ কৰিছে। এইখন চৰকাৰে সকলো মানুহকে কিবা নহয় কিবা প্ৰকাৰে সহায় কৰিছে বুলি মুখ্যমন্ত্ৰীয়ে উল্লেখ কৰে। তিতাবৰত বিৰোধী বিধায়ক থকা স্বত্বেও চৰকাৰে ১২৮ কোটি টকা পুঁজিৰে যোৰহাট-তিতাবৰ-বৰহোলা সংযোগী পথ নিৰ্মাণ কৰিছে। মুঠ ১১১ কোটি টকা পুঁজিৰে তিতাবৰৰ কাকডোঙা দলঙৰ পৰা তিতাবৰ নগৰ হৈ মৰিয়নি সমষ্টিৰ দেবেৰাপাৰালৈ ধোদৰ আলি নিৰ্মাণ কৰিছে। তদুপৰি বিগত পাঁচ বছৰত ২৮৫ কিঃমিঃ পথ অনুমোদন হৈছে। ভাৰতৰ ভিতৰতে অসম সৰ্বশ্ৰেষ্ঠ ৰাজ্য হিচাপে পৰিগণিত কৰাৰ সংকল্পৰে মহিলা সৱলীকৰণৰ ক্ষেত্ৰত অসম প্ৰথম হওক, বাল্য বিবাহ, বহু বিবাহ প্ৰতিৰোধ কৰা, অসমৰ যুৱক-যুৱতীয়ে কাকো এটকা ঘোচ নিদিয়াকৈ চাকৰি লাভ কৰাৰ উপৰিও অসমত উদ্যোগ স্থাপন কৰা আৰু সেই উদ্যোগত অসমৰ যুৱক-যুৱতীয়ে সংস্থাপন লাভ কৰা আদি বিভিন্ন উন্নয়নমুখী কামত চৰকাৰে বিভিন্ন আঁচনি ৰূপায়নেৰে জন কল্যাণ সাধন কৰি আহিছে। অৰুণোদয় আঁচনিয়ে গাৰ্হস্থ্য হিংসা হ্ৰাস কৰিছে, যাৰফলত সমাজখন সৰ্বাংগসুন্দৰ ৰূপত জিলিকি উঠিছে।
