৯৩নং সোণাৰি (Topon Kumar Gogoi) বিধানসভা সমষ্টিৰ এসময়ৰ সদৌ অসম ছাত্ৰ সন্থা চমুকৈ আছুৰ কেন্দ্ৰীয় সাধাৰণ সম্পাদক পৰৱৰ্তী সময়ত সংসদীয় ৰাজনীতিত যোগদান কৰি বিজেপি দলৰ পৰা টিকট লাভ কৰি ২০১৬ চনত সোণাৰি বিধানসভা সমষ্টিত কংগ্ৰেছৰ অপ্ৰতিৰোধ্য নেতা, সোণাৰি সমষ্টিৰ বিধায়ক তথা অসম চৰকাৰৰ প্ৰাক্তন মন্ত্ৰী শৰৎ বৰকটকীক পৰাস্ত কৰি বিধানসভালৈ নিৰ্বাচিত হৈ ৰাজনৈতিক জীৱন আৰম্ভ কৰা তপন কুমাৰ গগৈক ২০২৬ ৰ বিধানসভা নিৰ্বাচনত বিজেপিৰ দলীয় টিকটৰ পৰা বঞ্চিত কৰাত সচেতন মহলে তপন কুমাৰ গগৈৰ ৰাজনৈতিক ভৱিষ্যতক লৈ সন্দেহ প্ৰকাশ কৰিছে ৷
এসময়ৰ সদৌ অসম ছাত্ৰ সন্থাৰ কেন্দ্ৰীয় সাধাৰণ সম্পাদক, পৰৱৰ্তী সময়ত ৰাজনীতিত প্ৰৱেশ কৰি বিজেপি দলৰ পৰা নিৰ্বাচনত প্ৰতিদ্বন্দ্বিতা কৰি জয়ী হৈ পৰ্যায়ক্ৰমে যোৰহাট লোকসভা সমষ্টিৰ প্ৰাক্তন সাংসদ, অসম চৰকাৰৰ প্ৰাক্তন কেবিনেট মন্ত্ৰী, ভাৰতীয় জনতা পাৰ্টী অসম প্ৰদেশৰ উপ-সভাপতি তথা অসম ঔদ্যোগিক নিগমৰ অধ্যক্ষ তপন কুমাৰ গগৈয়ে শীঘ্ৰে বিজেপি দল ত্যাগ কৰি কংগ্ৰেছত যোগদান কৰাৰ সম্ভাৱনা প্ৰকট হৈ পৰিছে বুলি সৰ্বত্ৰ চৰ্চা লাভ কৰিছে৷ আগন্তুক ২০২৬ চনৰ ৯ এপ্ৰিল তাৰিখে ৰাজ্যত হ’ব লগা বিধানসভা নিৰ্বাচনৰ সোণাৰি বিধানসভা সমষ্টিৰ প্ৰাৰ্থীৰূপে প্ৰতিদ্বন্দ্বিতা আগবঢ়াবলৈ যোৱা পাঁচ বছৰৰ বিধায়ক ধৰ্মেশ্বৰ কোঁৱৰ, প্ৰাক্তন বিধায়িকা নৱনীতা সন্দিকৈ, বিজেপি মহিলা মৰ্চাৰ সভানেত্ৰী মীনা চাহু, বিজেপিৰ চাহ মৰ্চাৰ সম্পাদক লক্ষ্মীনাথ তাছাৰ উপৰি তপন কুমাৰ গগৈয়েও দলৰ ফালৰ পৰা প্ৰাৰ্থিত্ব বিচাৰি আবেদন জনাইছিল৷ বিজেপি দলৰ একাংশ দলীয় কৰ্মকৰ্তাৰ লগতে নেতা-কৰ্মী আৰু অনুগামীসকলেও তপন কুমাৰ গগৈক দলে টিকট প্ৰদান কৰাটো মনে-প্ৰাণে কামনা কৰিছিল৷ তপন কুমাৰ গগৈয়ে শেষমুহূৰ্তত দলে তেওঁকে টিকট প্ৰদান কৰিব বুলি আত্মবিশ্বাসী হৈ আছিল৷ আনকি টিকটৰ আশাত দিল্লীলৈ উৰা মাৰি শীৰ্ষ নেতৃত্বক সাক্ষাৎ কৰিছিল যদিও মূৰকত যোৱা পাঁচ বছৰৰ বিধায়ক ধৰ্মেশ্বৰ কোঁৱৰক দলে পুনৰ প্ৰাৰ্থিত্ব প্ৰদান কৰাত তপন কুমাৰ গগৈৰ অনুগ্ৰামীসকল ভিতৰি ক্ষুণ্ণ হৈ পৰিছে৷ বিজেপিৰ দলীয় টিকটৰ পৰা বঞ্চিত হৈ তপন কুমাৰ গগৈয়ে সোণাৰি সমষ্টিত ধৰ্মেশ্বৰ কোঁৱৰৰ বিৰুদ্ধে নিৰ্দলীয়ভাৱে নিৰ্বাচনত অৱতীৰ্ণ হ’ব বুলি সমষ্টিবাসীৰ মাজত চৰ্চিত হোৱাৰ সমান্তৰালকৈ আন একাংশই তপন কুমাৰ গগৈয়ে কংগ্ৰেছ দলৰ পৰা ৯৪নং মাহমৰা বিধানসভা সমষ্টিৰ পৰা বিৰো¸ধী উমৈহতীয়া মিত্ৰজোঁটৰ প্ৰাৰ্থী হিচাপে নিৰ্বাচনী যুঁজত নমাৰ সন্দেহ প্ৰকাশ কৰিছে৷
ইতিমধ্যে তপন কুমাৰ গগৈয়ে কংগ্ৰেছ দলত যোগদান কৰিব বুলি সৰ্বত্ৰ প্ৰচাৰ হোৱাৰ সমান্তৰালকৈ কংগ্ৰেছ দলৰ হৈ মাহমৰাত নিৰ্বাচনত প্ৰতিদ্বন্দ্বিতা অৱতীৰ্ণ হ’বৰ বাবে তপন কুমাৰ গগৈৰ নামত মনোনয়ন-পত্ৰ সংগ্ৰহ কৰাৰ খবৰ ভোটাৰ মাজত বিয়পি পৰিছে৷ এসময়ৰ সদৌ অসম ছাত্ৰ সন্থাৰ কেন্দ্ৰীয় সমিতিৰ সাধাৰণ সম্পাদক তপন কুমাৰ গগৈয়ে আছু ত্যাগ কৰাৰ পিছত সংক্ৰিয় ৰাজনীতিত যোগদান কৰিছিল৷ গগৈয়ে আছু ত্যাগ কৰাৰ সময়ত তৰুণ গগৈ নেতৃত্বাধীন কংগ্ৰেছ চৰকাৰৰ বিৰুদ্ধে প্ৰতিষ্ঠান বিৰুধী ঢৌ তুংগত উঠিছিল৷ প্ৰাক্তন আছু তপন কুমাৰ গগৈয়ে সেই সময়ত শাসকীয় কংগ্ৰেছ দল বা আঞ্চলিকতাবাদী শিবিৰ অসম গণ পৰিষদ দলত যোগদান কৰাৰ পৰিৱৰ্তে বিৰোধী বিজেপি দলত যোগদান কৰি সক্ৰিয় ৰাজনীতিত জড়িত হৈছিল৷ পৰৱৰ্তী সময়ত ২০১৬ চনত বিজেপি দলৰ পৰা সোণাৰি বিধানসভা সমষ্টিৰ দলীয় প্ৰাৰ্থী হিচাপে নিৰ্বাচনত প্ৰতিদ্বন্দ্বিতাত অৱতীৰ্ণ হৈ দীৰ্ঘদিনে কংগ্ৰেছৰ দখলত থকা সমষ্টিটো উদ্বাৰ কৰিবলৈ সক্ষম হৈছিল৷ তপন কুমাৰ গগৈয়ে বিধায়ক হিচাপে নিৰ্বাচিত হৈ সমষ্টি উন্নয়নত মনোনিৱেশত নামি পৰিছিল ৷
২০১৯ চনৰ এপ্ৰিল দেশত অনুষ্ঠিত হোৱা ১৭সংখ্যক লোকসভা নিৰ্বাচনত দলে যোৰহাট সংসদীয় লোকসভা সমষ্টিৰ পৰা নিৰ্বাচনত অৱতীৰ্ণ হ’বৰ বাবে দলীয় টিকট প্ৰদান কৰাত নিৰ্বাচনত জয়ী হৈ ২০১৯ চনৰ পৰা ২০২৪ চনলৈ দিল্লীৰ মছনদত যোৰহাট লোকসভাৰ সাংসদৰ পদ শুৱনি কৰা তপন কুমাৰ গগৈ পুনৰ ২০২৪ চনৰ ১৯ এপ্ৰিলত অনুষ্ঠিত হোৱা ১৮সংখ্যক লোকসভা নিৰ্বাচনত প্ৰাক্তন মুখ্যমন্ত্ৰী তৰুণ গগৈৰ পুত্ৰ গৌৰৱ গগৈৰ হাতত শোচনীয়ভাৱে পৰাজয়বৰণ কৰিছিল৷ ২০২৬ৰ দলীয় টিকটৰ পৰা বঞ্চিত তপন কুমাৰ গগৈৰ ৰাজনৈতিক ভৱিষ্যতক লৈও সচেতন মহলে সন্দেহ প্ৰকাশ কৰিছে ৷ আনহাতে, তপন কুমাৰ গগৈয়ে দল বিৰো¸ধী কাৰ্যত লিপ্ত নহয় বুলি উল্লেখ কৰাৰ লগতে সোণাৰি সমষ্টি নিৰ্দলীয়ভাৱে নিৰ্বাচনত অৱতীৰ্ণ হোৱা আৰু কংগ্ৰেছ দলত যোগদান কৰি ৯৪নং মাহমৰা সমষ্টিৰ পৰাও নিৰ্বাচন খেলাৰ কোনো ধৰণৰ অভিলাস নাই বুলি নিজা ফেচবুক পেজৰ জৰিযতে অৱগত কৰিছে৷ অৱশ্যে ৰাজনীতিত অসম্ভৱ বুলি একো নাই, ৰাজনীতিত সকলো সম্ভৱ, ৰাজনীতিত ৰাতিটোৰ ভিতৰতে সকলো ওলট-পালট হৈ যায়৷ এই কথা সময় আৰু ইতিহাসে প্ৰমাণ কৰি আহিছে ৷ সময়ে প্ৰমাণ কৰিব টিকটবঞ্চিত তপন কুমাৰ গগৈয়ে বিজেপিতে থাকিব নে আন দললৈ ঢাপলি মেলিব ইয়ো এক লাখটকীয়া প্ৰশ্ন হিচাপে সাধাৰণ ৰাইজ আৰু ভোটাৰৰ মাজত বিবেচিত হৈ ৰ’ব৷
