দেশৰ দুৰ্গম তথা প্ৰতিটো অঞ্চললৈকে চৰকাৰী আঁচনিসমূহৰ কাৰ্যকৰী, প্ৰসাৰ নিশ্চিত কৰাৰ উদ্দেশ্যে সমগ্ৰ দেশজুৰি কেন্দ্ৰীয় চৰকাৰে আৰম্ভ কৰিছে “বিকশিত ভাৰত সংকল্প যাত্ৰা” শীৰ্ষক এক কাৰ্যসূচী।
সংকল্প যাত্ৰাৰ কাৰ্যসূচী দ্বাৰা অনাময় সুবিধা, অত্যাৱশ্যকীয় বিত্তীয় সেৱা, বিদ্যুৎ সংযোগ, এলপিজি চিলিণ্ডাৰৰ প্ৰৱেশাধিকাৰ, দৰিদ্ৰ লোকসকলৰ বাবে বাসস্থান, খাদ্য সুৰক্ষা, সঠিক পুষ্টি, নিৰ্ভৰযোগ্য স্বাস্থ্যসেৱা, বিশুদ্ধ খোৱা পানী আদিৰ দৰে কল্যাণমূলক আঁচনিসমূহৰ সুবিধা প্ৰদান কৰাৰ লগতে জনসাধাৰণৰ কাষলৈ গৈ তেওঁলোকৰ মাজত সজাগতাৰ সৃষ্টি কৰা।
যাত্ৰাৰ সময়ত নিশ্চিত কৰা বিৱৰণৰ জৰিয়তে সাম্ভাব্য হিতাধিকাৰীসকলৰ নামভৰ্তি কৰা হ’ব। দেওবাৰে মাৰ্ঘেৰিটা বিধানসভা সমষ্টি অন্তৰ্গত কেটেতং আৰু বৰগোলাই গাওঁ পঞ্চায়তত ‘বিকশিত ভাৰত যাত্ৰাৰ কাৰ্যসূচী অনুষ্ঠিত কৰা হয়।
এই কাৰ্যসূচীত বিভিন্ন বিভাগৰ বিষয়া কৰ্মচাৰীসকল উপস্থিত থাকি ঠাইতে হিতাধিকাৰীসকলৰ পৰা আবেদন গ্ৰহণ কৰে।
উক্ত কাৰ্যসূচীত কেন্দ্ৰীয় মন্ত্ৰী ৰামেশ্বৰ তেলী, মাৰ্ঘেৰিটা বিধায়ক ভাস্কৰ শৰ্মাসহ বিজেপিৰ দলৰ বহু নেতা কৰ্মী উপস্থিত থাকে।
