পেট্ৰল-ডিজেলৰ দাম হ্ৰাস পাবনে? কেন্দ্ৰীয় পেট্ৰলিয়াম মন্ত্ৰী হৰদীপ পুৰীয়ে ৰাজ্য চৰকাৰক লক্ষ্য কৰি কি ক’লে?
কেন্দ্ৰীয় পেট্ৰলিয়াম মন্ত্ৰী হৰদীপ সিং পুৰীয়ে দেওবাৰে তেল কোম্পানীসমূহক ইন্ধনৰ মূল্য হ্ৰাস কৰিবলৈ আহ্বান জনায়। ইয়াৰ সমান্তৰালকৈ তেওঁ ভেট হ্ৰাস নকৰাৰ বাবেও ৰাজ্য চৰকাৰসমূহক লক্ষ্য কৰি লয়। হৰদীপ সিং পুৰীয়ে কয় যে আন্তঃৰাষ্ট্ৰীয় মূল্যবৃদ্ধিৰ পিছতো আমি তেলৰ মূল্য পৰিচালনা কৰিব পাৰিম কাৰণ ২০২১ চনৰ নৱেম্বৰ আৰু ২০২২ চনৰ মে’ মাহত কেন্দ্ৰই আবকাৰী শুল্ক হ্ৰাস কৰিছিল।
পেট্ৰলিয়াম মন্ত্ৰীগৰাকীয়ে আৰু কয় যে ইয়াৰ পিছতো কিছুমান ৰাজ্য চৰকাৰে ভেট হ্ৰাস কৰা নাছিল আৰু তাতো তেলৰ মূল্য এতিয়াও অধিক। হৰদীপ সিং পুৰীয়ে কয় যে আন্তঃৰাষ্ট্ৰীয় তেলৰ মূল্য নিয়ন্ত্ৰণত থাকিলে আৰু তেওঁলোকৰ কোম্পানীসমূহৰ আণ্ডাৰ-ৰিকোভাৰী বন্ধ হৈ গ’লে ভাৰততো তেলৰ মূল্য হ্ৰাস কৰিবলৈ তেল কোম্পানীসমূহক অনুৰোধ জনাইছে।
কেন্দ্ৰীয় পেট্ৰলিয়াম মন্ত্ৰী হৰদীপ সিং পুৰীয়ে দেওবাৰে উত্তৰ প্ৰদেশৰ বাৰাণসীত এক কাৰ্যসূচীত উপনীত হয়। তেওঁ কয় যে ভাৰত বিশ্বৰ তৃতীয় বৃহত্তম শক্তি গ্ৰাহক। তেওঁ জোৰ দি কয় যে ভাৰতে ঘৰুৱা তেল আৰু গেছৰ অন্বেষণৰ কাম কৰি আছে, আমদানিৰ ভিত্তি বৈচিত্ৰ্যময় কৰিছে, বিকল্প শক্তিৰ উৎসলৈ পৰিৱৰ্তন হৈছে আৰু শক্তি সুৰক্ষাৰ পথ হিচাপে গেছ আৰু সেউজ হাইড্ৰজেন ব্যৱহাৰ কৰিছে।
তেওঁ কয় যে বাৰাণসীৰ গংগাৰ পাৰৰ আশে-পাশে শব্দ আৰু বায়ু প্ৰদূষণ হ্ৰাস কৰাৰ কৌশল হিচাপে এতিয়া পৰিৱেশ অনুকূল চি এন জিৰে নাও চলাবলৈ আৰম্ভ কৰা হৈছে। এই পৰ্যন্ত ৫৮৩ খন নাও চি এন জি চালিত নাওলৈ ৰূপান্তৰিত হৈছে। নমোঘাটত গেইলে স্থাপন কৰা দেশৰ প্ৰথমটো ভাসমান চিএনজি ষ্টেচনৰ পৰা এই নাওসমূহলৈ চিএনজি যোগান ধৰা হৈছে।