মহাপুৰুষ শঙ্কৰদেৱ কলা-কৃষ্টি গৱেষণা কেন্দ্ৰ,যোৰহাটত ‘যুৱশক্তি-ৰাষ্ট্ৰ শক্তি’ এই মূলমন্ত্ৰত বিশ্বাসী ভাৰতীয় জনতা যুৱমৰ্চা, যোৰহাট জিলাৰ উদ্যোগত এখনি যুৱ সম্বৰ্ধনা সভা অনুষ্ঠিত হয়। ভাৰতীয় জনতা যুৱমৰ্চা, যোৰহাট জিলাৰ সভাপতি পাৰ্শ্বজ্যোতি বৰাৰ সভাপতিত্বত অনুষ্ঠিত সভাখনত ভাৰতীয় জনতা পাৰ্টী নেতৃত্বাধীন কেন্দ্ৰীয় চৰকাৰখনৰ অষ্টম বৰ্ষপূৰ্তি উপলক্ষে স্বাধীনতাৰ ৭৫তম ‘অমৃত মহোৎসৱ’ৰ সৈতে সংগতি ৰাখি নিজ নিজ কৰ্মক্ষেত্ৰত উজ্জ্বলি উঠা জিলাখনৰ বিভিন্ন প্ৰান্তৰ ৭৫গৰাকী ‘যুৱ’ক বিশেষভাৱে সম্বৰ্ধনা জনোৱা হয়। যুৱমৰ্চাৰ জিলা সাধাৰণ সম্পাদক সুমন্ত হাজৰিকাই আঁত ধৰা বন্তি প্ৰজ্বলনৰ পাছতে বৰগীতেৰে শুভাৰম্ভ কৰা উক্ত কাৰ্যসূচীত যোৰহাটৰ সাংসদ তপন গগৈ, মৰিয়নি সমষ্টিৰ বিধায়ক ৰূপজ্যোতি কুৰ্মী, ভাৰতীয় জনতা পাৰ্টী , যোৰহাট জিলাৰ সভাপতি হেমন্ত কলিতা, ফিচফেড,অসমৰ অধ্যক্ষা সুশীলা হাজৰিকাকে ধৰি বহুকেইজন বিশিষ্ট ব্যক্তিৰ লগতে যুৱমৰ্চাৰ জিলা বিষয়ববীয়াসকল উপস্থিত থাকে।
সম্বৰ্ধিত ব্যক্তিসকলৰ মাজৰপৰা উদীয়মান সংগীতশিল্পী জনম কাশ্যপে বাদ্যসংগতকাৰী বাঞ্চন বৰকটকীৰ সহযোগত এটি গীত পৰিৱেশন কৰাৰ উপৰিও সমৰ বৰুৱা, মৃদুস্মিতা নেওগ, বিস্মিতা দত্ত, প্ৰেৰণা বৰদলৈ আৰু মাধুৰীমা বৰুৱাই কৃতজ্ঞতাসূচক বক্তব্য প্ৰদান কৰি অনাগত দিনত গঠনমূলক কাম-কাজত সহযোগিতা আগবঢ়োৱাৰ প্ৰতিশ্ৰুতি দিয়ে।
