ইনষ্টাগ্ৰামত গোপনীয় মেছেজ কৰোতে সাৱধান হওক! ইনষ্টাগ্ৰামত ব্যক্তিগত কথা-বতৰা বন্ধ কৰক! ৮ মে’ৰ পৰা ইনষ্টাগ্ৰামৰ জগতখন সম্পূৰ্ণৰূপে সলনি হৈছে। মাৰ্ক জুকাৰবাৰ্গৰ মেটা কোম্পানীয়ে ভয় নোহোৱাকৈ মেছেজ কৰিব পৰা ছিকিউৰিটি শ্বিল্ড আঁতৰাই পেলাইছে।
আজিৰ পৰা ‘মেটা’ই বন্ধ কৰি দিছে ইনষ্টাগ্ৰাম ‘ডাইৰেক্ট মেছেজ’ (DM)ত ‘এণ্ড টু এণ্ড এনক্ৰিপচন’ (End-to-End Encryption)। পূৰ্বে End-to-End Encryptionৰ দ্বাৰা আপোনাৰ মেছেজসমূহ সুৰক্ষিত আছিল অৰ্থাৎ মেছেজ দিয়া ৰিচিভ কৰোতাজনেহে পঢ়িব পাৰিছিল৷ কিন্তু এতিয়াৰ পৰা আৰু আপোনাৰ মেছেজৰ গোপনীয়তা নাথাকে! Metaই আপোনাৰ মেছজসমূহ পঢ়িব বা পৰীক্ষা কৰিব পাৰিব।
কিয় এই বৃহৎ সিদ্ধান্ত লোৱা হ’ল?
চাইবাৰ বিশেষজ্ঞসকলৰ মতে এই সিদ্ধান্তৰ আঁৰৰ প্ৰধান কাৰণ হৈছে শিশুৰ সুৰক্ষা। ২০২৬ চনৰ মাৰ্চ মাহত নিউ মেক্সিকোৰ জুৰীয়ে মেটাক ৩৭৫ মিলিয়ন ডলাৰৰ ডাঙৰ জৰিমনা বিহে। কোম্পানীটোৱে প্লেটফৰ্মৰ নিৰাপত্তাৰ বিষয়ে ব্যৱহাৰকাৰীক বিপথে পৰিচালিত কৰাৰ অভিযোগ উত্থাপন হৈছিল, যাৰ ফলত শিশু নিৰ্যাতনৰ কাণ্ড সংঘটিত হৈছিল। এনক্ৰিপচন আঁতৰোৱাৰ লগে লগে মেটাই এতিয়া প্ৰয়োজনৰ সময়ত বাৰ্তাসমূহ স্কেন কৰিব পাৰিব। ইয়াৰ দ্বাৰা শিশু যৌন নিৰ্যাতনৰ সামগ্ৰী (CSAM), গ্ৰুমিং, আৰু অন্যান্য অনলাইন অপৰাধ প্ৰতিৰোধ কৰাত সহায়ক হ’ব।
আমেৰিকা, ব্ৰিটেইন, ইউৰোপীয় সংঘৰ দৰে দেশৰ চৰকাৰে দীৰ্ঘদিন ধৰি টেক কোম্পানীসমূহক ব্যক্তিগত বাৰ্তা প্ৰেৰণ এপত সন্দেহজনক কাৰ্যকলাপ নিৰীক্ষণ কৰিবলৈ হেঁচা প্ৰয়োগ কৰি আহিছে। ব্ৰিটেইনৰ অনলাইন ছেফটি এক্ট ২০২৩ আৰু ইউৰোপীয় ইউনিয়নৰ চেট কণ্ট্ৰল ৰেগুলেচনৰ দৰে কঠোৰ আইনসমূহে কোম্পানীসমূহক ক্ষতিকাৰক বিষয়বস্তু চিনাক্ত কৰিবলৈ বাধ্য কৰাইছে।
মেটাৰ এই পদক্ষেপক অপৰাধ প্ৰতিৰোধৰ দিশত এক ডাঙৰ পদক্ষেপ হিচাপে প্ৰশংসা কৰা হৈছে যদিও মানুহে গোপনীয়তাৰ প্ৰতিও চিন্তিত হৈ পৰিছে।
