কটন বিশ্ববিদ্যালয় আছু গোট আৰু কটন পৰিয়ালৰ সহযোগত বʼহাগী উৎসৱ ২০২৬ যোৱা ৮ মে’ত অনুষ্ঠিত হয়।বʼহাগী উৎসৱৰ লগত সংগতি ৰাখি ৬ আৰু ৭ মে’ত বিহু নাচৰ আখৰা অনুষ্ঠিত হয় । পুৱাৰে পৰা অনুষ্ঠিত হোৱা বিভিন্ন কাৰ্যসূচীয়ে এইবেলি বʼহাগী উৎসৱ ২০২৬ সফল কৰি তোলে। চাফাই অভিযান,ছহিদ স্মৰণ কাৰ্যসূচীৰ পিছতেই অনুষ্ঠানটো মুকলি হয় জুবিন গাৰ্গৰ “মায়াবিনী ৰাতিৰ বুকুত” শীৰ্ষক গীতেৰে। কটন বিশ্ববিদ্যালয় ছাত্ৰ একতা সভাৰ সাধাৰণ সম্পাদক কৃতিময় কাশ্যপৰ উদ্যোগত কটন বিশ্ববিদ্যালয়ৰ দেৱালত জুবিন গাৰ্গ আৰু হীৰেণ ভট্টাচাৰ্য এখন বৃহৎ আকাৰৰ চিত্ৰ মুকলি কৰা হয়।
বিভিন্ন থলুৱা খেল -ধেমালি প্ৰতিযোগিতাত কটন বিশ্ববিদ্যালয়ৰ শিক্ষাৰ্থীৰ উপৰি কৰ্মচাৰীৰে অংশগ্ৰহণ কৰে।লাৰু-পিঠা আৰু থলুৱা খাদ্যৰ প্ৰতিযোগিতাত কটন বিশ্ববিদ্যালয়ৰ অসমীয়া বিভাগৰ সহকাৰী অধ্যাপিকা ড০ কাকলি গগৈয়ে এনে প্ৰতিযোগিতাই অসমীয়া থলুৱা খাদ্যক জনপ্ৰিয় কৰে বুলি উল্লেখ কৰে।বʼহাগী উৎসৱৰ লগত সংগতি ৰাখি “বসন্ত বৈভৱ” শীৰ্ষক আলোচনীখনৰ প্ৰথম সংখ্যাটি উন্মোচন কৰে কটন বিশ্ববিদ্যালয়ৰ পঞ্জীয়ক ড০ হীৰেণ ডেকাই।জেং বিহু প্ৰতিযোগিতা আৰু কটন বিহু কুঁৱৰী প্ৰতিযোগিতাত ব্যাপক সহাঁৰি দেখিবলৈ পোৱা যায়।
কটন বিশ্ববিদ্যালয়ৰ নৱ নিযুক্ত কৰ্মচাৰী সকলকো চা-চিনাকীৰ লগতে সম্বৰ্ধনা জ্ঞাপন কৰে কটন বিশ্ববিদ্যালয় আছু গোটে। কণ্ঠশিল্পী দিপান্বিতা ডেকাৰ উপৰিও বিভিন্নজনে অনুষ্ঠান পৰিবেশন কৰে।কটন বিশ্ববিদ্যালয় আছু গোটৰ সাধাৰণ সম্পাদক কুলদীপ গৌতম শৰ্মা পৰিচালনা কৰা অনুষ্ঠানটোত কটন বিশ্ববিদ্যালয় আছু গোটৰ উপদেষ্টা হৃষীকেশ দত্ত, হিমাংশু কুমাৰ দাস,হীৰক মালি,ৰিংকু চৌধুৰী প্ৰমুখ্যে গোটৰ সভাপতি নৱজ্যোতি দাস উপস্থিত থাকে।
