প্ৰতিকূল বতৰকো নেওচি দুলীয়াজানত মুখ্যমন্ত্ৰীৰ বিশাল নিৰ্বাচনী সভা। ধাৰাসাৰ বৰষুণ আৰু প্ৰতিকূল বতৰৰ বাবে পূৰ্বনিৰ্ধাৰিত সূচীৰ কিছু সালসলনি ঘটিলেও, আজি দুলীয়াজানত মুখ্যমন্ত্ৰী ড° হিমন্ত বিশ্ব শৰ্মাৰ নিৰ্বাচনী প্ৰচাৰ সভাত জনতাৰ উছাহ আছিল লক্ষ্যণীয়। উল্লেখ্য যে, আজিৰ এই বিশাল সভাখন প্ৰথমে দুলীয়াজানৰ দিৰিয়েল চাহ বাগিচাৰ খেলপথাৰত অনুষ্ঠিত হোৱাৰ কথা আছিল। কিন্তু ধাৰাসাৰ বৰষুণৰ ফলত খেলপথাৰখন ব্যৱহাৰৰ অনুপযোগী হৈ পৰাত পৰৱৰ্তী সময়ত সভাখন কছাৰী পথাৰ ৰাজহুৱা খেলপথাৰলৈ স্থানান্তৰ কৰা হয়।
কছাৰী পথাৰৰ এই বিশাল জনসভাত বিজেপি প্ৰাৰ্থী ৰামেশ্বৰ তেলীৰ হৈ প্ৰচাৰ চলাই মুখ্যমন্ত্ৰীগৰাকীয়ে কেইবাটাও গুৰুত্বপূৰ্ণ ঘোষণা কৰে: দুলীয়াজানৰ মহিলাসকলৰ বাবে অতিৰিক্ত ১০ হাজাৰ অৰুণোদয় আঁচনি আৰু মহিলা উদ্যমিতা বিকাশৰ বাবে চৰকাৰে বিশেষ পদক্ষেপ গ্ৰহণ কৰিব। চৰকাৰী খণ্ডত ২ লাখ চাকৰি প্ৰদানৰ প্ৰতিশ্ৰুতি দোহাৰি তেওঁ ৰাজ্যৰ যুৱ প্ৰজন্মৰ উন্নয়নৰ কথা উল্লেখ কৰে।
বিৰোধী দল কংগ্ৰেছক আক্ৰমণৰ লক্ষ্য কৰি মুখ্যমন্ত্ৰীয়ে কয়, “কংগ্ৰেছৰ ৰাজনীতি কেৱল ধূতি, কম্বল, লুঙী আৰু সূতা বিতৰণতে সীমাবদ্ধ। কিন্তু বিজেপিয়ে চাকৰি আৰু আঁচনিৰ জৰিয়তে ৰাইজক স্বাৱলম্বী কৰাত বিশ্বাস কৰে।”
প্ৰাৰ্থী ৰামেশ্বৰ তেলীৰ মৰ্যাদা বৃদ্ধিৰ ইংগিত দি মুখ্যমন্ত্ৰী ড° শৰ্মাই ঘোষণা কৰে যে যদি দুলীয়াজানৰ ৰাইজে তেলীক জয়ী কৰি বিধানসভালৈ পঠিয়ায়, তেন্তে তেওঁক বিধানসভাত এখন উচ্চ আসন (মৰ্যাদাপূৰ্ণ স্থান) প্ৰদান কৰা হ’ব।
প্ৰতিকূল বতৰকো নেওচি কছাৰী পথাৰত সমবেত হোৱা সহস্ৰাধিক লোকে আগন্তুক নিৰ্বাচনৰ পূৰ্বে বিজেপিৰ শক্তিৰ পৰিচয় দিছে।
