কামৰূপ গ্ৰাম্য জিলাৰ বামুন্দীত দেওবাৰে বিশিষ্ট শিক্ষাবিদ, লেখিকা প্ৰমীলা দেৱী চক্ৰৱৰ্তীৰ গ্ৰন্থ বামুন্দীৰ ঐতিহ্য, সংস্কৃতি আৰু লোক সাহিত্য উন্মোচন কৰা হয়। গোপালেশ্বৰ থানৰ সভাগৃহত লেখিকাগৰাকীৰ অসংখ্য গুণমুগ্ধৰ উপস্থিতিত গ্ৰন্থ খন উন্মোচন কৰে জ্যেষ্ঠ সাংবাদিক তথা দ্য আছাম ৰাইজিং ইংৰাজী দৈনিক কাকতৰ কাৰ্যবাহী সম্পাদক দুলাল মিশ্ৰই। শাৰীৰিক অসুস্থতাকো নেওচি লেখিকা প্ৰমীলা দেৱী চক্ৰৱৰ্তীয়ে লিখি উলিওৱা বামুন্দীৰ ঐতিহ্য, সংস্কৃতি আৰু লোক সাহিত্য গ্ৰন্থ খনত বামুন্দী অনছলত যুগ যুগ ধৰি প্ৰচলিত লোক কথা, লোক বিশ্বাস আদিৰ বিষযে সুন্দৰকৈ উপস্থাপন কৰিছে।
গ্ৰন্থখন উন্মোচন কৰি উন্মোচকে কয় যে এই গ্ৰন্থখন অনাগত দিনত এক আপুৰুগীয়া সম্পদ হিচাবে পৰিগণিত হব। গ্ৰন্থ খন সংৰক্ষণৰ প্ৰয়োজনীয়তা আছে বুলি সাংবাদিক মিশ্ৰই কয়। গ্ৰন্থ উন্মোচনী সভাত লেখিকা লিলি দেৱী গোস্বামী, সমাজকৰ্মী গিৰিণ কলিতা, নন্দৰাম কলিতা , কৌশিক চক্ৰৱৰ্তী, কবি তথা প্ৰাক্তন বেংক বিষয়া প্ৰভাত ভাগৱতী, বিনোদ ভাগৱতীৰ উপৰি লেখিকাৰ পৰিয়ালৰ বহু বহু লোক উপস্থিত থাকে।
