গুৱাহাটীঃ ব’হাগৰ উল্লাসৰ মাজতো এইবাৰৰ বিহু মঞ্চত স্পষ্ট হৈ উঠিল এক গভীৰ আৱেগ। লতাশিল খেলপথাৰ-ত অনুষ্ঠিত গুৱাহাটী বিহু সন্মিলনীৰ মঞ্চত উপস্থিত হৈ অশ্ৰুসিক্ত কণ্ঠে বহু কথা ক’লে গৰিমা শইকীয়া গাৰ্গ-এ।
জুবিন গাৰ্গ-ৰ অনুপস্থিতিত মঞ্চত উঠি তেওঁ কয়, “এইখন মঞ্চলৈ আহি মই অনুভৱ কৰা নাই যে জুবিন আমাৰ মাজত নাই। জুবিন আমাৰ মাজত আছে, আমাৰ অন্তৰত আছে আৰু সদায় থাকিব।”
ব’হাগ মানেই যি কণ্ঠ, যি উপস্থিতি — সেই জুবিন গাৰ্গ অবিহনে এইবাৰৰ বিহু যেন সঁচাকৈয়ে শূন্য। একেদৰে আগতে মানুহে তেওঁৰ নামত উল্লাস কৰিছিল, এইবাৰ সেই চিঞৰত স্পষ্ট আৱেগ আৰু আকুলতা।
দশকজুৰি ব’হাগৰ মঞ্চত সংগী হৈ থকা গৰিমাই এইবাৰ নিজকে ধৰি ৰাখিবলৈ চেষ্টা কৰি কয়, “বহুত দিন ধৰি মানুহৰ মাজলৈ আহিবলৈ সাহস নাছিল। কিন্তু আপোনালোকৰ পৰা শক্তি পাইছোঁ। মই অনুভৱ কৰিছোঁ, জুবিন ইয়াতেই আছে।”
মঞ্চত উপস্থিত আছিল জুবিনৰ ঘনিষ্ঠ বাদ্যযন্ত্ৰীসকল — ৰাজা বৰুৱা, পাৰ্থ গোস্বামী, প্ৰিয়াংকু বৰদলৈ, ঋষভ ভূঞা আদি। তেওঁলোকৰ সঙ্গত গৰিমাৰ ভাষণে মঞ্চত উপস্থিত সকলোকে আৱেগিক কৰি তোলে।
নিজৰ অনুভৱ ব্যক্ত কৰি তেওঁ আৰু কয়, “আমি সকলো জুবিনৰ কণ্ঠ। আপোনালোক সকলোৰে মাজতেই জুবিন জীয়াই আছে। মই চেষ্টা কৰিম — আজিৰ পৰা আৰু চকুলো বোৱাই নাথাকোঁ। শক্তিশালী হৈ আপোনালোকৰ মাজত থাকিম।”
জুবিনৰ সপোন আৰু কাম আগবঢ়াই নিয়াৰ প্ৰতিশ্ৰুতি দি গৰিমাই কয় যে সংগীত, চিনেমা, সমাজ আৰু সংস্কৃতিৰ বাবে জুবিনে যি কৰিবলৈ বিচাৰিছিল, সেয়া সকলোৰে সহযোগত আগবঢ়াই নিয়া হ’ব।
এই আবেগিক মুহূৰ্তই পুনৰ এটা বাৰ প্ৰমাণ কৰিলে — জুবিন গাৰ্গ কেৱল এজন শিল্পী নহয়, তেওঁ অসমবাসীৰ হৃদয়ত জীয়াই থকা এক অনুভৱ।
