অসম সাহিত্য সভাৰ উদ্যোগত শনিবাৰৰ পৰা ব্যাপক উৎসাহ-উদ্দীপনাৰে দুদিনীয়া বর্ণাঢ্য কাৰ্যসূচীৰে গুৱাহাটীৰ ভগৱতীপ্রসাদ বৰুৱা ভৱনত দ্বিতীয় লেখক-শিৱিৰ আৰম্ভ হৈছে। ৰাজ্যখনৰ ভিন্ন প্ৰান্তৰ পৰা অহা ন-পুৰণি লেখক-সাহিত্যিকসকলৰ অংশগ্রহণেৰে অনুষ্ঠিত এই লেখক-শিৱিৰ আজি পুৱা সভাৰ সভাপতি ড° বসন্তকুমাৰ গোস্বামীয়ে পতাকা উত্তোলনেৰে আৰু আদৰণী সমিতিৰ কাৰ্যকৰী সভাপতি প্রশান্ত শইকীয়াই স্মৃতি তর্পণেৰে শুভাৰম্ভ কৰে। পতাকা উত্তোলন কৰি দিয়া ভাষণত সভাপতি ড’ বসন্তকুমাৰ গোস্বামীয়ে কয়- ‘লেখক-শিৱিৰৰ আয়োজনে অসম সাহিত্য সভাক এটি নতুন মাত্ৰা প্ৰদান কৰিব। এই আয়োজনৰ দ্বাৰা ৰাজ্যখনৰ বৌদ্ধিক পৰিমণ্ডলক আমি সাহিত্য সভাৰ মজিয়াত মর্যাদা প্রদান কৰিবলৈ চেষ্টা কৰিছোঁ।’ ইয়াৰ পাছতে অনুষ্ঠিত উদ্বোধনী-সত্ৰৰ উদ্দেশ্যৰ কথকতাৰ প্ৰসংগত সভাৰ প্ৰধানসম্পাদক দেৱজিৎ বৰাই কয়-‘অসম সাহিত্য সভাই ২০২৫-২৭ কার্যবর্ষত বিভিন্ন কার্যসূচী হাতত লৈ বুদ্ধিজীবী, লেখক-সাহিত্যিক তথা ভিন্ন স্তৰৰ ৰাইজৰ মাজলৈ যোৱাৰ প্ৰয়াস কৰিছে। তাৰে এটা অংশ হিচাপে এই লেখক-শিৱিৰৰ আয়োজন। এই কাৰ্যবৰ্ষত ২০২৫ চনৰ জুন মাহত নগাঁৱত প্ৰথমখন লেখক-শিৱিৰ সফলভাৱে ৰূপায়ণ হোৱাৰ পাছত অসমৰ বিভিন্ন জিলাৰ পৰা লেখক-শিৱিৰ অনুষ্ঠিত কৰিব লাগে বুলি আমালৈ পত্র আহিছিল। আমি এই লেখক-শিৱিৰৰ জৰিয়তে উপন্যাস সাহিত্য, ৰহস্য সাহিত্য, গল্প সাহিত্য, সংবাদ সাহিত্য, নাট্য সাহিত্য, কাব্য সাহিত্য, ব্যঙ্গ সাহিত্য, গীতি সাহিত্যৰ চৰ্চা অব্যাহত ৰখাৰ চেষ্টা কৰিছে। যাৰ ফলস্বৰূপে ন-পুৰণি লেখক, সাহিত্যিক সকলোকে একোখন মঞ্চ দিবলৈ প্রয়াস কৰা হৈছে।’ আদৰণী সমিতিৰ সভাপতি ড° পৰাগ কুমাৰ বৰুৱাই আদৰণী ভাষণেৰে আৰম্ভ কৰা অনুষ্ঠানটি উদ্বোধন কৰে নাগালেণ্ড বিশ্ববিদ্যালয়ৰ আচার্য্য ড° সমুদ্রগুপ্ত কাশ্যপে। কর্মসূত্রে ৰাজ্যৰ বাহিৰলৈ যাব লগা হোৱাৰ বাবে তেখেতে ভিডিঅ’ৰেকর্ডিং যোগে উদ্বোধনী ভাষণ প্রদান কৰি কয়-‘বানানৰ প্ৰতি আমি সকলোৱেই অবহেলা কৰোঁ। বানানৰ বিশুদ্ধতাই ভাষাটোৰ বিশুদ্ধতা আৰু ভাষাটোৰ নির্মূলতাৰ পৰা ৰক্ষা কৰে। সময়ৰ পৰিবৰ্তনৰ লগে লগে আমি নিজৰ নিগাজী সৰল-সহজ থলুৱা ভাষা পৰিহাৰ কৰি বঙালীমূলৰ, ইংৰাজীমূলৰ বা হিন্দীমূলৰ ভাষা ব্যৱহাৰ কৰিবলৈ লৈছোঁ। নিজৰ শব্দৰ ভাণ্ডাৰ পৰিহাৰ কৰিছোঁ। এইবোৰ শুভ লক্ষণ নহয়।’ আজিৰ অনুষ্ঠানত এগছি বন্তি প্রজ্বলনেৰে শিৱিৰ মুকলি কৰে বিশিষ্ট সাহিত্যিক-বিজ্ঞানী ড° দীনেশ চন্দ্র গোস্বামীয়ে আৰু শিৱিৰৰ লগত সংগতি ৰাখি প্রকাশ কৰা স্মৃতিগ্রন্থ উন্মোচন কৰে অসম প্রকাশন পৰিষদৰ সচিব প্রমোদ কলিতাই।
ইয়াৰ পাছতে দিনৰ ১১-৩০ বজাৰ পৰা সংগীতাচাৰ্য্য লক্ষ্মীৰাম বৰুৱা সদন, নেহা আগৰৱালা সোঁৱৰণী সভাকক্ষ আৰু সিংহপুৰুষ ৰাধাগোবিন্দ বৰুৱা সভাগৃহত সমান্তৰালভাৱে উপন্যাস সাহিত্য, ৰহস্য সাহিত্য আৰু গীতি সাহিত্য সত্র অনুষ্ঠিত হয়। সংগীতাচাৰ্য্য লক্ষ্মীৰাম বৰুৱা সদনত অনুষ্ঠিত উপন্যাস সাহিত্য সত্রত সঞ্চালক হিচাপে ড° ধ্ৰুৱজ্যোতি বৰা আৰু আলোচক হিচাপে উপস্থিত থাকে প্রমোদ কলিতা, ড° মেঘনা চৌধুৰী, গোবিন কুমাৰ খাউণ্ড। নেহা আগৰৱালা সোঁৱৰণী সভাকক্ষত অনুষ্ঠিত হোৱা ৰহস্য সাহিত্য সত্রত সঞ্চালক হিচাপে ড° দীনেশ চন্দ্র গোস্বামী আৰু আলোচক হিচাপে অভিজিত শৰ্মা বৰুৱা, ড° বিনীতা বৰা দেৱচৌধুৰী, সত্যব্রত বৰা উপস্থিত থাকে। সমান্তৰালভাৱে সিংহপুৰুষ ৰাধাগোবিন্দ বৰুৱা সভাগৃহত অনুষ্ঠিত হোৱা গীতি সাহিত্য সত্রত সঞ্চালক হিচাপে গৌতম শর্মা আৰু আলোচক হিচাপে ড° সৰোজ কাকতি, চয়নিকা বৰুৱাই অংশগ্রহণ কৰে।
আনহাতে বিয়লি ২-৩০ বজাৰ পৰা পুনৰ সংগীতাচাৰ্য্য লক্ষ্মীৰাম বৰুৱা সদন, নেহা আগৰৱালা সোঁৱৰণী সভাকক্ষ আৰু সিংহপুৰুষ ৰাধাগোবিন্দ বৰুৱা সভাগৃহত সমান্তৰালভাৱে ক্রীড়া সাহিত্য, গল্প সাহিত্য আৰু সংবাদ সাহিত্য সত্র অনুষ্ঠিত হয়। নেহা আগৰৱালা সোঁৱৰণী সভাকক্ষত অনুষ্ঠিত হোৱা ক্রীড়া সাহিত্য সত্ৰখন সঞ্চালনা কৰে পংকজ বৰঠাকুৰে। এই সত্রত আলোচক হিচাপে অংশগ্রহণ কৰে ক্ৰমে সুবোধমল্ল বৰুৱা, দিগন্ত বুঢ়াগোহাঁই আৰু বিদ্যুৎ কলিতাই। সংগীতাচার্য্য লক্ষ্মীৰাম বৰুৱা সদনত অনুষ্ঠিত হোৱা গল্প সাহিত্য সত্ৰখন সঞ্চালনা কৰে ইমৰান হুছেইনে আৰু আলোচক হিচাপে অংশগ্রহণ কৰে গীতালি বৰা, অপু ভৰদ্বাজ, ডাঃ নমিতা বৈশ্য। সমান্তৰালভাৱে সিংহপুৰুষ ৰাধাগোবিন্দ বৰুৱা সভাগৃহত অনুষ্ঠিত হোৱা সংবাদ সাহিত্য সত্ৰ সঞ্চালনা কৰে দিলীপ চন্দনে আৰু আলোচক হিচাপে উপস্থিত থাকে পুলিন কলিতা, নৱ ঠাকুৰীয়া, ড০ গীতালি শইকীয়া। আজিৰ এই লেখক-শিৱিৰৰ ভিন্ন সত্ৰত অসম সাহিত্য সভাৰ উপসভাপতি পদুম ৰাজখোৱাকে ধৰি জিলা সভা, শাখা সভাৰ বিষয়ববীয়াসকলৰ লগতে প্রায় ৫০০ ৰো অধিক ন-পুৰণি লেখক-সাহিত্যিকে অংশগ্ৰহণ কৰে।
ইফালে আজি দ্বিতীয় লেখক শিৱিৰৰ অন্তিম দিনা পুনৰ সংগীতাচাৰ্য্য লক্ষ্মীৰাম বৰুৱা সদন, নেহা আগৰৱালা সোঁৱৰণী সভাকক্ষ আৰু সিংহপুৰুষ ৰাধাগোবিন্দ বৰুৱা সভাগৃহত সমান্তৰালভাৱে নাট্য সাহিত্য, শিশু সাহিত্য, অনুবাদ সাহিত্য, কাব্য সাহিত্য, ব্যঙ্গ সাহিত্য আৰু সাহিত্য সমালোচনা সত্র অনুষ্ঠিত হ’ব।দিনৰ ১১-৩০ বজাৰ পৰা সংগীতাচাৰ্য্য লক্ষ্মীৰাম বৰুৱা সদনত অনুষ্ঠিত হ’ব লগা নাট্য সাহিত্য সত্রত সঞ্চালক হিচাপে নৰেন পাটগিৰি আৰু আলোচক হিচাপে ড° সুব্রত জ্যোতি নেওগ, ৰবিজিতা গগৈ, ঋতুপর্ণ দাস উপস্থিত থাকিব। সিংহপুৰুষ ৰাধাগোবিন্দ বৰুৱা সভাগৃহত অনুষ্ঠিত হ’বলগা শিশু সাহিত্য সত্ৰত সঞ্চালক হিচাপে হৰপ্রিয়া বাৰুকিয়াল বৰগোহাঞি আৰু আলোচক হিচাপে সুৰেন্দ্ৰমোহন দাস, যুগললোচন দাস, ড’ নয়নমণি বৰুৱা উপস্থিত থাকিব। সমান্তৰালভাৱে নেহা আগৰৱালা সোঁৱৰণী সভাকক্ষত অনুষ্ঠিত হ’বলগা অনুবাদ সাহিত্য সত্রত সঞ্চালক হিচাপে নীৰেন্দ্ৰ নাথ ঠাকুৰীয়া আৰু আলোচক হিচাপে ড° পৰী হিলৈদাৰী, কৃষ্ণদুলাল বৰুৱা, ড° জুৰি দত্ত উপস্থিত থাকিব।
আনহাতে বিয়লি ২-৩০ বজাৰ সংগীতাচাৰ্য্য লক্ষ্মীৰাম বৰুৱা সদনত অনুষ্ঠিত হ’বলগা কাব্য সাহিত্যত সঞ্চালক হিচাপে ড° প্রাণজিৎ বৰা আৰু আলোচক হিচাপে ড° বিজয় শংকৰ বৰ্মন, মৃদুল হালৈ, বর্ণালী বৰগোহাঁই উপস্থিত থাকিব। নেহা আগৰৱালা সোঁৱৰণী সভাকক্ষত হ’বলগা ব্যঙ্গ সাহিত্য সত্রত সঞ্চালক হিচাপে প্রভাত গোস্বামী আৰু আলোচক হিচাপে ডাঃ অঞ্জনজ্যোতি চৌধুৰী, ৰিপুঞ্জয় গগৈ, ড° ধৰণী লাহন উপস্থিত থাকিব। আনহাতে সিংহপুৰুষ ৰাধাগোবিন্দ বৰুৱা সভাগৃহত অনুষ্ঠিত হ’বলগা সাহিত্য সমালোচনা সত্রত সঞ্চালক হিচাপে ড’ আনন্দ বৰমুদৈ আৰু আলোচক হিচাপে ড° বিভাস চৌধুৰী, ড° বিৰিঞ্চি কুমাৰ দাস, ড° চুমী কলিতা উপস্থিত থাকিব। সন্ধিয়া ৫-৩০ বজাত অনুষ্ঠিত হ’বলগা সামৰণী অনুষ্ঠান আৰু সাংস্কৃতিক সমাবেশত অসম সাহিত্য সভাৰ প্রাক্তন সভাপতি ড’ কুলধৰ শইকীয়া বিশিষ্ট অতিথি আৰু উচ্চ শিক্ষা সঞ্চালকালয়ৰ সঞ্চালক পমী বৰুৱাই আমন্ত্রিত অতিথি হিচাপে অংশগ্রহণ কৰিব বুলি প্রধানসম্পাদক দেৱজিৎ বৰাই সংবাদ মাধ্যমক জানিবলৈ দিয়ে।
