সত্ৰনগৰী বৰপেটাত গৰু বিহুৰ দিনটোত দেখা গ’ল এক অনন্য আৰু ব্যতিক্ৰমী পৰিৱেশ। বৰপেটাৰ দঙৰকুছিৰ মাধৱ নগৰত বিগত কেইবছৰৰ দৰে এইবাৰো হিন্দু বাঙালী সম্প্ৰদায়ৰ লোকসকলে উলহ-মালহৰে পালন কৰিলে গৰু বিহু।
মাধৱ নগৰ অঞ্চলটোৰ অসমীয়া আৰু হিন্দু বাঙালী সম্প্ৰদায়ৰ বহু লোক গো-পালনৰ সৈতে জড়িত। সেই সূত্ৰেই গৰু বিহুক কেন্দ্ৰ কৰি গাঁওখনত পুৱাৰে পৰাই সৃষ্টি হয় উৎসৱমুখৰ পৰিৱেশ।
উদযাপনৰ অংশ হিচাপে দুয়োটা সম্প্ৰদায়ৰ লোকসকলে অসমীয়া পৰম্পৰা অনুসৰি গৰুক মাহ আৰু হালধী সানি চাউলখোৱা নদীত গা ধুৱাই। তাৰ পাছত গৰুক লাও-বেঙেনাৰ মালা পিন্ধাই দীঘলতি আৰু মাখিয়তিৰে কোবাই গৰুৰ স্বাস্থ্য আৰু শ্ৰীবৃদ্ধিৰ বাবে প্ৰাৰ্থনা কৰে।
এই অনুষ্ঠানত অসমীয়া আৰু হিন্দু বাঙালী সম্প্ৰদায়ৰ মিলিত অংশগ্ৰহণে সামাজিক সম্প্ৰীতি আৰু ঐক্যৰ এক সুন্দৰ দৃষ্টান্ত দাঙি ধৰে। গাঁওবাসীৰ মতে, এনে অনুষ্ঠানেই বিভিন্ন সম্প্ৰদায়ৰ মাজত ভাতৃত্ববোধ আৰু পাৰস্পৰিক সম্পৰ্ক অধিক মজবুত কৰে।
