মাৰ্ঘেৰিটাৰ আগশাৰীৰ নৃত্য প্ৰশিক্ষণ কেন্দ্ৰ ‘আনন্দ ডান্স একাডেমী’ৰ উদ্যোগত শনিবাৰে প্ৰতিষ্ঠা দিৱসটি উলহ-মালহেৰে উদযাপন কৰা হয়।
মাৰ্ঘেৰিটাৰ ইণ্ডিয়া ক্লাৱত সন্ধিয়া আয়োজিত এই অনুষ্ঠানটোৱে এক উৎসৱমুখৰ পৰিৱেশৰ সৃষ্টি কৰে।
অনুষ্ঠানৰ আৰম্ভণিতে কণ-কণ ছাত্ৰ-ছাত্ৰীসকলে জুবিন গাৰ্গৰ জনপ্ৰিয় ‘মায়াবিনী’ গীতটিৰ সুৰত এক সুন্দৰ সমবেত সংগীত পৰিৱেশ কৰি সকলোকে মন্ত্ৰমুগ্ধ কৰে।
ইয়াৰ পিছতে অসমৰ হাৰ্টথ্ৰব তথা মহান শিল্পী জুবিন গাৰ্গৰ প্ৰতিচ্ছবিত বন্তি প্ৰজ্বলন কৰি শ্ৰদ্ধা নিবেদন কৰা হয়।
প্ৰতিষ্ঠা দিৱসৰ লগত সংগতি ৰাখি ছাত্ৰ-ছাত্ৰীসকলৰ মাজত এক আকৰ্ষণীয় নৃত্য প্ৰতিযোগিতা অনুষ্ঠিত কৰা হয়।
একক আৰু দলীয় শাখাত অনুষ্ঠিত এই প্ৰতিযোগিতাত মাৰ্ঘেৰিটা আৰু ইয়াৰ ওচৰ-পাজৰৰ অঞ্চলৰ শতাধিক কণ-কণ প্ৰতিযোগীয়ে অংশগ্ৰহণ কৰি নিজৰ পাৰদৰ্শিতা প্ৰদৰ্শন কৰে।
অনুষ্ঠানটোত অঞ্চলটোৰ বহুকেইগৰাকী গণ্য-মান্য ব্যক্তি, স্থানীয় ৰাইজৰ লগতে ছাত্ৰ-ছাত্ৰীসকলৰ অভিভাৱক-অভিভাৱিকা সকলৰ উপস্থিতিয়ে অনুষ্ঠানৰ সৌষ্ঠৱ বৃদ্ধি কৰে।
আনন্দ ডান্স একাডেমীৰ এই প্ৰয়াসে অঞ্চলটোৰ কণ কণ ছাত্ৰ ছাত্ৰীসকলৰ সুপ্ত প্ৰতিভাসমূহক এক উপযুক্ত মঞ্চ প্ৰদান কৰা বুলি সচেতন মহলে মত প্ৰকাশ কৰিছে।
