১০ ৰাজ্যৰ ২৪খন ৰাজ্যসভাৰ আসনৰ বাবে নিৰ্বাচনৰ দিন ঘোষণা কৰিলে নিৰ্বাচন আয়োগে৷ সেই মৰ্মে ১৮ জুনত ২৪খন ৰাজ্যসভাৰ আসনৰ বাবে নিৰ্বাচন অনুষ্ঠিত হ’ব৷ শুকুৰবাৰে নিৰ্বাচন আয়োগে এই কথা প্ৰকাশ কৰে৷ নিৰ্বাচন আয়োগে উল্লেখ কৰা মতে– মেঘালয়, মিজোৰাম, অৰুণাচল প্ৰদেশ, মণিপুৰ, মধ্যপ্ৰদেশ, কৰ্ণাটক, গুজৰাট, ৰাজস্থান, অন্ধ্ৰ প্ৰদেশ আৰু ঝাৰখণ্ড – এই ১০খন ৰাজ্যৰ ২৪খন ৰাজ্যসভাৰ আসনৰ বাবে নিৰ্বাচন অনুষ্ঠিত হ’ব৷ এই উচ্ছ সদনৰ [ৰাজ্যসভা] আসনসমূহৰ বাবে আয়োগে নিৰ্বাচন ঘোষণা কৰে, কাৰণ বৰ্তমানৰ সদস্যসকলৰ কাৰ্যকাল অহা দুমাহৰ ভিতৰত শেষ হ’ব বুলি জানিব পৰা গৈছে ৷
নিৰ্বাচন আয়োগৰ সূচী অনুসৰি, ৰাজ্যসভাৰ ২৪খন আসনৰ ভিতৰত গুজৰাট, অন্ধ্ৰপ্ৰদেশ আৰু কৰ্ণাটকৰ চাৰিখন, ৰাজস্থান আৰু মধ্যপ্ৰদেশৰ তিনিখন, ঝাৰখণ্ডৰ দুখনৰ লগতে মণিপুৰ, মেঘালয়, অৰুণাচল প্ৰদেশ আৰু মিজোৰামৰ পৰা এখনকৈ আসন আছে৷ ইফালে মধ্যপ্ৰদেশত অৱসৰ লোৱা সদস্যসকলৰ ভিতৰত আছে প্ৰাক্তন মুখ্যমন্ত্ৰী তথা জ্যেষ্ঠ কংগ্ৰেছ নেতা দিগ্বিজয় সিং৷ কৰ্ণাটকত ৰাজ্যসভাৰ পৰা অৱসৰ লোৱা সদস্যসকলৰ ভিতৰত আছে প্ৰাক্তন প্ৰধানমন্ত্ৰী তথা জনতা দলৰ জ্যেষ্ঠ নেতা এইচ ডি দেৱেগৌড়া আৰু কংগ্ৰেছৰ ৰাষ্ট্ৰীয় সভাপতি তথা ৰাজ্যসভাৰ বিৰোধী দলপতি মল্লিকাজুৰ্ন খাৰ্গে৷ নিৰ্বাচন আয়োগে দিয়া তথ্য মতে, নিৰ্বাচনৰ বাবে অধিসূচনা ১ জুনত জাৰি কৰা হ’ব আৰু মনোনয়ন দাখিলৰ শেষ তাৰিখ ৮ জুন৷ পিছদিনা মনোনয়ন-পত্ৰৰ তদন্ত হ’ব৷ প্ৰাৰ্থী প্ৰত্যাহাৰৰ অন্তিম তাৰিখ ১১ জুন৷ নিৰ্বাচন আয়োগে উল্লেখ কৰা মতে, ১৮ জুনত ভোটগ্ৰহণ হ’ব৷ পুৱা ৯ বজাৰ পৰা আৰম্ভ হৈ বিয়লি ৪ বজালৈকে এই ভোটগ্ৰহণ চলিব৷ ভোটগ্ৰহণৰ পৰৱৰ্তী পৰ্যায়ত ইয়াৰ ভোটগণনা হ’ব৷
