২৭ আৰু ২৮ জানুৱাৰী তাৰিখে কটন বিশ্ববিদ্যালয়ত Cultural Materialism of Northeast India শীৰ্ষক এখনি দুদিনীয়া ৰাষ্ট্ৰীয় আলোচনা চক্ৰ অনুষ্ঠিত হয়। প্ৰাগজ্যোতিষ চেণ্টাৰ ফৰ কালচাৰেল ৰিচাৰ্চ (PCCR)ৰ উদ্যোগত,(Cotton University)কলকাতাৰ মৌলানা আবুল কালাম আজাদ ইনষ্টিটিউট অৱ এছিয়ান ষ্টাডিজ (MAKAIAS), কটন বিশ্ববিদ্যালয়ৰ পুৰাতত্ত্ব বিভাগ, INTACH ৰ অসম অধ্যায় আৰু Scientific Temperament Assam য়ে আয়োজিত কৰা আলোচনা চক্ৰখনি আৰম্ভ হয় ৰাষ্ট্ৰীয় সংগীতেৰে। কটন বিশ্ববিদ্যালয়ৰ পুৰাতত্ত্ব বিভাগৰ সহকাৰী অধ্যাপক ড০ মঞ্জিল হাজৰিকাই আঁত ধৰা অনুষ্ঠানটিত পিচিচিআৰৰ সম্পাদক ফনীন্দ্ৰ তালুকদাৰে আলোচনাচক্ৰৰ উদ্দেশ্য বাখ্যা কৰে। কটন বিশ্ববিদ্যালয়ৰ উপাচাৰ্য অধ্যাপক ড°ৰমেশ চন্দ্ৰ ডেকাই আলোচনা চক্ৰখন উদ্বোধন কৰাৰ লগতে “বুক অফ এবচ্ষ্ট্ৰাক্ট” খন আনুষ্ঠানিকভাৱে মুকলি কৰে। সভাখনৰ মূল ভাষণত তেজপুৰ বিশ্ববিদ্যালয়ৰ অধ্যাপক ড° চন্দন কুমাৰ শৰ্মাই উত্তৰ-পূব ভাৰতৰ প্ৰত্নতাত্ত্বিক, ভাষিক আৰু সাংস্কৃতিক ইতিহাসৰ গভীৰ অন্বেষণৰ প্ৰয়োজনীয়তাৰ ওপৰত গুৰুত্ব আৰোপ কৰে। তেখেতে ড° নিশান্ত চৌকছি, জাভেদ খাট্ৰী, মঞ্জিল হাজৰিকা আৰু ফণীন্দ্ৰ তালুকদাৰে সম্পাদনা কৰা “Movements Through Time and Space: Ecology and Lingua-Cultural Change in South and Southeast Asia” শীৰ্ষক গ্ৰন্থখনিও উন্মোচন কৰে ।
সন্মানীয় অতিথিসকলৰ ভিতৰত জৱাহৰলাল নেহৰু বিশ্ববিদ্যালয়ৰ অধ্যাপক আৰু MAKAIAS কাৰ্যবাহী সদস্য ড° বিনয় কুমাৰ ৰাৱে ভাৰতীয় সাংস্কৃতিক প্ৰেক্ষাপটত অসম আৰু উত্তৰ পূব ভাৰতৰ অবদানৰ লগতে ইয়াৰ অধ্যয়নত পুৰাতত্ত্ব, ইতিহাস, দৰ্শন, মৌখিক সাহিত্য আদিৰ প্ৰয়োজনীয়তাৰ ওপৰত আলোকপাত কৰে। অখিল ভাৰতীয় ইতিহাস সংকলন যোজনাৰ ৰাষ্ট্ৰীয় সাধাৰণ সম্পাদক শ্ৰীযুত হেমন্ত ধিং মজুমদাৰে উত্তৰ-পূব ভাৰতৰ জনগোষ্ঠীসমূহৰ মাজত যুগে যুগে ধৰি চলি অহা পৰম্পৰাগত জ্ঞান আৰু প্ৰাকৃতিক ঐতিহ্যৰ সংৰক্ষণৰ ওপৰত বক্তব্য আগবঢ়ায়। INTACH ৰ হৈ আহ্বায়ক অধ্যাপক শীলা বৰাই এই সংৰক্ষণৰ প্ৰচেষ্টাত স্থানীয় জনগোষ্ঠীৰ বিশেষ ভূমিকাৰ ওপৰত আলোচনা কৰে।
উল্লেখযোগ্য যে এই অনুষ্ঠানৰ মাজতে কটন বিশ্ববিদ্যালয় আৰু অসম ৰাজ্যিক সংগ্ৰহালয়ৰ মাজত এখন বুজাবুজিৰ চুক্তি স্বাক্ষৰিত হয়। এই চুক্তিখনত স্বাক্ষৰ কৰে কটন বিশ্ববিদ্যালয়ৰ হৈ পঞ্জীয়ক ড° অৰিন্দম গাৰ্গ আৰু ৰাজ্যিক সংগ্ৰহালয়ৰ হৈ সঞ্চালক শ্ৰী অৰিন্দম বৰুৱাই। এই চুক্তিৰ জৰিয়তে অসমৰ প্ৰত্নতাত্ত্বিক আৰু সাংস্কৃতিক সম্পদসমূহৰ গৱেষণা, অধ্যয়ন আৰু সংৰক্ষণৰ উপৰিও ছাত্ৰ ছাত্ৰীসকলৰ সুবিধাৰ্থে বিভিন্ন শিক্ষামূলক আঁচনি গ্ৰহণ কৰা হব বুলি জানিব দিয়ে সঞ্চালকালয়ৰ সঞ্চালক শ্ৰী বৰুৱাই। সভাখনিৰ শেষত শলাগৰ শৰাই আগবঢ়াই কটন বিশ্ববিদ্যালয়ৰ পূৰাতত্ব বিভাগৰ মুৰব্বী ড° ৰীতিকা চাহুৱে।
এই আলোচনা চক্ৰখনিত মহাপুৰুষ শ্ৰীমন্ত শংকৰদেৱ বিশ্ববিদ্যালয়ৰ অধ্যাপক গজেন্দ্ৰ অধিকাৰী, কটন বিশ্ববিদ্যালয়ৰ ড° জোনালী দেৱী, অসম চৰকাৰৰ ইতিহাস আৰু পুৰাতত্ব সঞ্চালকালয়ৰ ড° সংগীতা গগৈ, জৱাহৰলাল নেহৰু বিশ্ববিদ্যালয়ৰ অধ্যাপক ড° ৰক্তিম পাটৰ, হাৰিয়ানা কেন্দ্ৰীয় বিশ্ববিদ্যালয়ৰ ড° কুলভূষণ মিশ্ৰ, এইচ. এন. বি গঢ়ৱাল বিশ্ববিদ্যালয়ৰ ড° নাগেন্দ্ৰ ৰাৱাট, গুজৰাটৰ নৱৰচনা বিশ্ববিদ্যালয়ৰ ড° জাভেদ খাট্ৰী আদি সমল ব্যক্তিসকল উপস্থিত থাকে ।
কটন বিশ্ববিদ্যালয়ৰ লগতে ভাৰতৰ বিভিন্ন ঠাইত অবস্থিত শিক্ষানুষ্ঠান যেনে, দিল্লী স্কুল অৱ ইকন’মিকছ্, লক্ষ্নৌ বিশ্ববিদ্যালয়, নৰ্থ ইষ্টাৰ্ণ হিল ইউনিভাৰ্ছিটি, ৰয়েল গ্ল’বেল ইউনিভাৰ্ছিটি, মাজুলী সাংস্কৃতিক বিশ্ববিদ্যালয়, মণিপুৰ বিশ্ববিদ্যালয়, ডিব্ৰুগড় বিশ্ববিদ্যালয়, গৌহাটী বিশ্ববিদ্যালয়, ড° সৰ্বপল্লী ৰাধাকৃষ্ণণ টীছাৰ্চ ট্ৰেইনিং এণ্ড ৰিচাৰ্ছ ইনষ্টিটিউট, কৃষ্ণগুৰু আধ্যাত্মিক বিশ্ববিদ্যালয়, কোকৰাঝাৰৰ চেণ্ট্ৰেল ইনচটিটিউট অৱ টেকনলজি আদিৰ পৰা প্ৰায় ১০০ ৰো অধিক ছাত্ৰ ছাত্ৰী আৰু গৱেষকে অংশগ্ৰহণ কৰি আলোচনা চক্ৰখনিৰ সৌষ্ঠৱ বৃদ্ধি কৰে। এই দুদিনীয়া আলোচনাচক্ৰখনিত পাঠ কৰা গৱেষণা পত্ৰসমূহ গ্ৰন্থ আকাৰে প্ৰকাশ কৰা হব বুলি আহ্বায়কদ্বয় ফণীন্দ্ৰ তালুকদাৰ আৰু ড° মঞ্জিল হাজৰিকাই জানিবলৈ দিছে।
