১৯৯২ চনৰ ১ অক্টোবৰ। দুৰ্গা পূজাৰ মহাষষ্ঠীৰ দিন আছিল সেইটো। ষষ্ঠীৰ শুভক্ষণতেই অসমবাসীৰ মাজলৈ আহিছিল এখন নতুন অসমীয়া কেছেট। নাম ‘অনামিকা’। সুৰ আৰু সংগীতেৰে সজাইছিল সেইসময়ৰ নৱাগত কণ্ঠশিল্পী জুবিন গাৰ্গে।
‘অনামিকা’ মুক্তি পোৱাৰ পাছতেই অসমজুৰি সৃষ্টি হৈছিল সাংগীতিক চাঞ্চল্য। অসমীয়া সংগীতলৈ নামি আহিছিল নতুন সুবাস। জুবিন হৈ পৰে হাৰ্টথ্ৰ’ৱ জুবিনদা, জাতিৰ প্ৰাণস্পন্দন ।
আজি দুৰ্গা পূজাৰ ষষ্ঠী। ১৯৯২ চনৰ ষষ্ঠীৰ দিনটোতেই অসমীয়া মনবোৰক উজ্জীৱিত কৰিছিল এটা নতুন কণ্ঠই। ‘হাঁহিলে তুমি মুকুতামণি সৰে’, ‘প্ৰীতিৰ সুবাসে’, ‘মনৰ নিজানত’, ‘গানে কি আনে’, ‘পথে পথে জোনাকে’, ‘শুনা শুনা’, ‘হিয়া দহে বুকু ভাগে’, ‘কিয় জানো আজি মন’ সেই আঠটা গীতে ঘৰ সাজিছিল অসমীয়াৰ বুকুত।
