ৰাষ্ট্ৰপতি বুলিলেই আপোনাৰ সততে মনলৈ ভাঁহি অহা প্ৰতিপত্তিশালী ছবিখনৰ বিপৰীতে এজন ব্যতিক্ৰমী ৰাষ্ট্ৰপতিৰ জীৱন-কাহিনী ।
আজি আপোনাক এনে এজন ৰাষ্ট্ৰপতিৰ সৈতে চিনাকি কৰাই দিম, যিয়ে অৰ্থ-বিত্তৰ পৰা বিৰত থাকে অথচ নিজৰ কাপোৰো নিজেই ধোৱে । জীৱন যাপন কৰে ফুল বিক্ৰীৰ ধনেৰে ।
তেওঁ আন কোনো নহয়, উৰুগুৱেৰ তদানীন্তন ৰাষ্ট্ৰপতি হোচে মুহিকা ।২০১০ ৰ পৰা ২০১৫ চন পৰ্যন্ত ৫ বছৰ ধৰি ৰাষ্ট্ৰপতি হৈ থকা স্বত্বেও তেওঁৰ নাই কোনো বিলাসী আবাস । ৰাজধানীৰ মন্ত্ৰী আবাসৰ পিছফালে থকা এটা ভগা পঁজাতেই তেওঁৰ আশ্ৰয় ।য’ত কোনো নিৰাপত্তাৰক্ষীয়ে আৱৰি নাথাকে ।
যদিও নীতিগত ভাৱে নিৰাপত্তাৰক্ষী থকাটো বাঞ্চনীয় । কিন্তু কেৱল দুজন আৰক্ষী আৰু এটা কুকুৰেই তেওঁৰ নিৰাপত্তাৰ ভূমিকাত । আনকি সেই কুকুৰটোৰো নাই এখন ঠেং । ৰাষ্ট্ৰপতি হৈয়ো তেওঁ ব্যৱহাৰ নকৰে চৰকাৰী আৱাস-চৰকাৰী গাড়ী। শীত-তাপ নিয়ন্ত্ৰিত কোঠাটো বাদেই তেওঁৰ আবাসত নাই এটা ৱাশ্বিং মেচিনো ।আবাসৰ সমীপৰ এটা ভগা কুৱাই তেওঁৰ নিত্য-ব্যৱহাৰ্য পানীৰ উৎস ।পত্নীৰ সৈতে তেওঁ ব্যস্ত থাকে ফুলনিত । নিজেই হৈ পৰে মালী, নিজেই বিক্ৰেতা ।
ফুল বিক্ৰীৰ ধনেৰেই চলে তেওঁৰ জীৱন-সংসাৰ । সাধাৰণ নাগৰিকৰ দৰেই চলে তেওঁৰ দৈনন্দিন জীৱন । সততে ৰাষ্ট্ৰপতিৰ কনভয় আহিলে পথ এৰি দিয়াৰ নিয়মো অপ্ৰযোজ্য তেওঁৰ ক্ষেত্ৰত । সাধাৰণ নাগৰিকৰ দৰেই মানি চলে যান-বাহনৰ নিয়ম । ৰাষ্ট্ৰপতি হৈয়ো বাৰমহলীয়া অট্টালিকাৰ পঞ্চতাৰকা হোটেলৰ বিপৰীতে তেওঁ আহাৰ গ্ৰহণ কৰে ৰাস্তাৰ দাঁতিৰ হোটেলত ।
ৰাষ্ট্ৰপতি হৈ তেওঁৰ উপাৰ্জন ১২ হাজাৰ ডলাৰ ।মাত্ৰ ৭৮০ ডলাৰ ৰাখি বাকী অংশ দান দিয়ে ৰাজহুৱা স্বাৰ্থত । তেওঁৰ জনপ্ৰিয়তা হয়তো আপোনাক দুনাই কোৱাৰ প্ৰয়োজন নাই ।১৯৩৫ চনৰ পিছত চৰম ৰাজনৈতিক দুৰ্যোগক নেওচি তেওঁ গঠন কৰিছিল গেৰিলা দল ।
ৰাজনৈতিক মেৰ-পাকত কেবাবাৰো কাৰাবাস খাটিবলগীয়া হোৱা এইগৰাকী সৎ ৰাষ্ট্ৰপতি প্ৰতিপন্ন হ’ল আটাইতকৈ দুখীয়া ৰাষ্ট্ৰপতিৰূপে । ইতিহাসৰ পাতত সোণালী আখৰেৰে জিলিকি থাকিব এইগৰাকী ৰাষ্ট্ৰপতি হোচে মুহিকা ।
