অসমৰ যোগাযোগ ব্যৱস্থাত এক যুগান্তকাৰী পৰিবৰ্তন আনিবলৈ ব্ৰহ্মপুত্ৰ নদীৰ তলত দেশৰ প্ৰথমটো ৰে’ল-সহ পথ সুৰংগ নিৰ্মাণৰ বাবে কেন্দ্ৰীয় চৰকাৰে অনুমোদন প্ৰদান কৰিছে। ১৮,৬৬২.০২ কোটি টকা ব্যয়ৰ উক্ত গহপুৰ–নুমালীগড় ৰে’ল-কাম-ৰোড আণ্ডাৰৱাটাৰ সুৰংগ প্ৰকল্পক মুখ্যমন্ত্ৰী ড° হিমন্ত বিশ্ব শৰ্মাই অসম ৰাজ্যৰ বাবে “এক বৃহৎ সাফল্য আৰু গুৰুত্বপূৰ্ণ অভিযান্ত্ৰিক মাইলৰ খুঁটি” বুলি উল্লেখ কৰিছে। দেওবাৰে গুৱাহাটীত অনুষ্ঠিত এখন সংবাদমেলত মুখ্যমন্ত্ৰীয়ে জনায় যে এই প্ৰকল্পটো সঠিক ৰূপায়ণ হ’লে ই হ’ব ভাৰতৰ প্ৰথম ৰে’ল-সহ পথ আণ্ডাৰৱাটাৰ সুৰংগ আৰু ব্ৰহ্মপুত্ৰ নদীৰ ওপৰত চতুৰ্থ ৰে’ল-পথ সংযোগ ব্যৱস্থা।
আন্তঃৰাষ্ট্ৰীয় পৰ্যায়তো জাৰ্মানী আৰু ডেনমাৰ্কৰ মাজত নিৰ্মীয়মাণ ফেমাৰ্নবেল্ট সংযোগ প্ৰকল্পৰ পিছত এইটো হ’ব বিশ্বৰ দ্বিতীয় এনে ধৰণৰ প্ৰকল্প। মুখ্যমন্ত্ৰী কয়, মুঠ ৩৩.৭ কিলোমিটাৰ দৈৰ্ঘ্যৰ এই কৰিডৰে উত্তৰ পাৰৰ গহপুৰ (এনএইচ-১৫) আৰু দক্ষিণ পাৰৰ নুমালীগড় (এনএইচ-৭১৫)-ক সংযোগ কৰিব। ইয়াৰ ভিতৰত ১৫.৭৯ কিলোমিটাৰ থাকিব নদীৰ তলত সুৰংগ আৰু অৱশিষ্ট ১৭.৯১ কিলোমিটাৰ থাকিব সংযোগ পথ। সুৰংগটো নদীৰ তলদেশৰ পৰা প্ৰায় ৫২ মিটাৰৰ পৰা ৫৭ মিটাৰ গভীৰতাত নিৰ্মাণ কৰা হ’ব। ইয়াত দুটা পৃথক টিউব থাকিব, য’ত প্ৰতিটো টিউবত দুটা লেনৰ পথ থাকিব। প্ৰয়োজন অনুসৰি ইয়াৰে এটা টিউবত ৰে’ল চলাচলৰ ব্যৱস্থাও সংযোজন কৰা হ’ব। সুৰক্ষাৰ বাবে প্ৰতি ৫০০ মিটাৰ অন্তৰে সংযোগ পথ (ক্ৰছ পেচেজ) নিৰ্মাণ কৰা হ’ব।
উল্লেখ্য, বৰ্তমান গহপুৰৰ পৰা নুমালীগড়লৈ যাত্ৰা কৰিবলৈ প্ৰায় ২৪০ কিলোমিটাৰ পথ অতিক্ৰম কৰিবলগীয়া হয় আৰু ইয়াত প্ৰায় ছয় ঘণ্টা সময় লাগে। সুৰংগটো সম্পূৰ্ণ হ’লে এই দূৰত্ব হ্ৰাস পাই মাত্ৰ ৩৪ কিলোমিটাৰলৈ নামি আহিব আৰু যাত্ৰাৰ সময় প্ৰায় ২০ মিনিটলৈ কমি আহিব। ইয়াৰ ফলত উত্তৰ আৰু দক্ষিণ অসমৰ মাজত যোগাযোগ ব্যৱস্থা অধিক দ্ৰুত, সুচল আৰু কাৰ্যকৰী হ’ব। প্ৰকল্পটোৰ নিৰ্মাণ ব্যয় ধাৰ্য কৰা হৈছে ১১,৯৮২.৩৬ কোটি টকা আৰু মুঠ মূলধনী ব্যয় ১৮,৬৬২.০২ কোটি টকা। এই ব্যয় সড়ক পৰিবহণ আৰু মহাসড়ক মন্ত্ৰালয় আৰু প্ৰতিৰক্ষা মন্ত্ৰালয়ে ৮০:২০ অনুপাতে বহন কৰিব। নিৰ্মাণ ব্যয়ৰ ওপৰত ৰাজ্য চৰকাৰে ৰাজ্যিক সামগ্ৰী আৰু সেৱা কৰ (SGST)-ৰ ৫০ শতাংশ, অৰ্থাৎ প্ৰায় ৫৩৯ কোটি টকা বহন কৰিব।
প্ৰকল্পটো ৰাষ্ট্ৰীয় ঘাইপথ প্ৰাধিকৰণ (এনএইচএআই)-ৰ তত্বাৱধানত কাৰ্যকৰী কৰা হ’ব। পথ অংশ পৰিচালনা কৰিব এনএইচএআই ডিচিএল-এ আৰু ৰে’ল অংশ পৰিচালনা কৰিব ভাৰতীয় ৰে’লৱেই। অহা কেইদিনমানৰ ভিতৰতে ভূমি অধিগ্ৰহণ প্ৰক্ৰিয়া আৰম্ভ কৰা হ’ব বুলি মুখ্যমন্ত্ৰীয়ে জানিবলৈ দিয়ে। মুখ্যমন্ত্ৰীয়ে লগতে কয় যে, এই প্ৰকল্প বাস্তৱায়িত হ’লে সীমান্ত অঞ্চলসমূহৰ সৈতে যোগাযোগ ব্যৱস্থা অধিক শক্তিশালী হ’ব, বাণিজ্য আৰু পৰ্যটনৰ বিকাশ ঘটিব আৰু উত্তৰ-পূৰ্বাঞ্চলৰ সামগ্ৰিক অৰ্থনৈতিক উন্নয়নত গুৰুত্বপূৰ্ণ ভূমিকা পালন কৰিব। লগতে নিৰ্মাণকালত বৃহৎ পৰিমাণৰ কৰ্মসংস্থাপনৰ সুযোগ সৃষ্টি হ’ব।
ইয়াৰ উপৰিও, মুখ্যমন্ত্ৰীয়ে ঘোষণা কৰে যে অহা মাৰ্চ মাহত প্ৰধানমন্ত্ৰী নৰেন্দ্ৰ মোদীয়ে অসম ভ্ৰমণকালত প্ৰায় ২২,৮৬৪ কোটি টকা ব্যয়ৰ শিলচৰ–শ্বিলং–গুৱাহাটী উচ্চ-গতি কৰিডৰৰ আধাৰশিলা স্থাপন কৰিব। এই কৰিডৰটো নিৰ্মাণ সম্পূৰ্ণ হ’লে গুৱাহাটীৰ পৰা শিলচৰলৈ যাত্ৰাৰ সময় প্ৰায় চাৰে চাৰি ঘণ্টাৰ পৰা পাঁচ ঘণ্টাৰ ভিতৰত সীমাবদ্ধ হ’ব। ইয়াৰ ফলত অসম আৰু মেঘালয়ৰ মাজত যোগাযোগ ব্যৱস্থা অধিক উন্নত হ’ব আৰু বাণিজ্য, পৰ্যটন তথা আঞ্চলিক অৰ্থনৈতিক বিকাশত নতুন গতি আহিব বুলি চৰকাৰে আশা প্ৰকাশ কৰিছে।
