অসমৰ (Assam Rajya Sabha)পৰা ৰাজ্যসভাৰ তিনিখন আসনৰ বাবে এইবাৰ বিজেপি আৰু ইউ পি পি এলৰ প্ৰাৰ্থীসকল বিনা প্ৰতিদ্বন্দ্বিতাৰে নিৰ্বাচিত হৈছে। সোমবাৰে মনোনয়ন পত্ৰ প্ৰত্যাহাৰৰ সময়সীমা শেষ হোৱাৰ পিছতে ৰিটাৰ্ণিং বিষয়া ৰাজীৱ ভট্টাচাৰ্যই বিজেপিৰ যোগেন মহন, তেৰছ গোৱালা আৰু ইউ পি পি এলৰ প্ৰমোদ বড়োক আনুষ্ঠানিকভাৱে বিজয়ী ঘোষণা কৰে।
প্ৰতিখন আসনৰ বিপৰীতে মাত্ৰ এগৰাকী প্ৰাৰ্থীয়ে মনোনয়ন দাখিল কৰাৰ ফলত কোনো ভোটগ্ৰহণৰ প্ৰয়োজন নোহোৱাকৈয়ে তিনিওগৰাকী প্ৰাৰ্থী ৰাজ্যসভাৰ সাংসদ হিচাপে নিৰ্বাচিত হয়। অহা ১৬ মাৰ্চত এই নিৰ্বাচন অনুষ্ঠিত হোৱাৰ কথা আছিল যদিও বিৰোধী পক্ষৰ পৰা কোনো প্ৰাৰ্থীয়ে প্ৰতিদ্বন্দ্বিতা নকৰাত ভোটগ্ৰহণৰ প্ৰয়োজন নোহোৱাকৈয়ে ফলাফল ঘোষণা কৰা হয়।
ইয়াৰ পিছতে অসম বিধানসভা সচিবালয়ত থকা ৰাজ্যসভা নিৰ্বাচনৰ কাৰ্যালয়ত ৰিটাৰ্ণিং বিষয়াই নব-নিৰ্বাচিত সাংসদসকলক আনুষ্ঠানিকভাৱে বিজয়ীৰ প্ৰমাণপত্ৰ প্ৰদান কৰে। উল্লেখযোগ্য যে অহা মে’ মাহত ৰাজ্যসভাত অসমৰ তিনিখন আসন খালী হ’ব। বৰ্তমান এই আসনকেইখনত বিজেপিৰ ৰামেশ্বৰ তেলী আৰু ভূৱনেশ্বৰ কলিতা, লগতে বিৰোধীৰ উমৈহতীয়া প্ৰাৰ্থী হিচাপে অজিত কুমাৰ ভূঞাই প্ৰতিনিধিত্ব কৰি আছে। সেই আসনকেইখন পূৰণ কৰাৰ বাবেই এইবাৰ ৰাজ্যসভাৰ নিৰ্বাচনৰ প্ৰক্ৰিয়া আৰম্ভ কৰা হৈছিল।
কিন্তু অসম বিধানসভাত শাসকীয় এন ডি এ মিত্ৰজোঁটৰ সংখ্যাগত শক্তিৰ বাবে আৰম্ভণিৰ পৰাই বিজেপি-নেতৃত্বাধীন মিত্ৰজোঁটৰ প্ৰাৰ্থীসকলৰ জয় প্ৰায় নিশ্চিত বুলি ধৰা হৈছিল। শেষত সোমবাৰে মনোনয়ন পত্ৰ প্ৰত্যাহাৰৰ অন্তিম দিনটোত সেই অনুমানকেই আনুষ্ঠানিক ৰূপ পায়। বিজেপিৰ জ্যেষ্ঠ নেতা যোগেন মহন আৰু তেৰছ গোৱালাৰ লগতে ব’ডোলেণ্ড টেৰিটৰিয়েল ৰিজিয়নৰ মুখ্য কাৰ্যবাহী সদস্য প্ৰমোদ বড়োৰ এই জয়ে ৰাজ্যসভাত শাসকীয় পক্ষৰ শক্তি আৰু অধিক দৃঢ় কৰিলে বুলি ৰাজনৈতিক মহলে মত প্ৰকাশ কৰিছে। মনোনয়ন পত্ৰ দাখিলৰ দিনাৰ পৰাই তেওঁলোকৰ জয় প্ৰায় নিশ্চিত আছিল যদিও মনোনয়ন পত্ৰ প্ৰত্যাহাৰৰ অন্তিম দিনটোত তাৰ ওপৰত চৰকাৰী মোহৰ পৰে। এই ফলাফলৰ জৰিয়তে অসমৰ পৰা ৰাজ্যসভাত শাসকীয় এন ডি এ মিত্ৰজোঁটৰ উপস্থিতি অধিক শক্তিশালী হ’ল বুলি ৰাজনৈতিক মহলে মন্তব্য কৰিছে।
