২০২৬ৰ (Gaurav Gogoi) বিধানসভা নিৰ্বাচনলৈ আৰু বেছি দিন নাই৷ খুব কম দিনৰ ভিতৰতে নিৰ্বাচন আয়োগে অসমৰ বিধানসভা নিৰ্বাচনৰ দিন ঘোষণা কৰাৰ সম্ভাৱনা আছে৷ কিন্তু এনে সময়তো সিজি অহা নাই কংগ্ৰেছ-ৰাইজৰ দলৰ মিত্ৰতাৰ চাউল৷ ইয়াৰ বিপৰীতে হঠাতে মিত্ৰতাৰ বিষয়ৰ পৰা অলপ সময়ৰ বাবে বিৰতি লোৱাৰ কথাহে ঘোষণা কৰিছে গৌৰৱ গগৈয়ে৷ ৰাইজৰ দলৰ অভিযোগ অনুসৰি কংগ্ৰেছ দলে এতিয়ালৈকে আনুষ্ঠানিকভাৱে মিত্ৰতা ভংগ কৰা নাই যদিও কাৰ্যতঃ চাৰিবাৰকৈ অনানুষ্ঠানিকভাৱে মিত্ৰতা ভংগ কৰিছে৷ সমষ্টি ভাগ-বাটোৱাৰাক লৈ আলোচনা চলি থকাৰ মাজতে বৰচলা, ডিমৌ, দিছপুৰ আৰু মাৰ্ঘেৰিটা সমষ্টিত কংগ্ৰেছ দলে একপক্ষীয়ভাৱে প্ৰাৰ্থী ঘোষণা কৰি দিয়াৰ ঘটনাই প্ৰথম আউল লগাইছিল৷ ইয়াৰ পিছতে ৰাইজৰ দলক সম্পূৰ্ণৰূপে বাদ দি কংগ্ৰেছে সংবাদ মেলযোগে আনুষ্ঠানিকভাৱে মিত্ৰজোঁট ঘোষণা কৰা কাৰ্যই দুয়োটা দলৰ মাজৰ দূৰত্ব বৃদ্ধি কৰে৷
বিশেষকৈ ৰঙানদী সমষ্টিটোক কেন্দ্ৰ কৰি দুয়োটা দলৰ মাজত ডাঙৰ বিভেদৰ সৃষ্টি হৈছে৷ ৰাইজৰ দলৰ মতে, পূৰ্বৰ আলোচনাত ৰঙানদী সমষ্টিটো তেওঁলোকক এৰি দিয়াৰ সিদ্ধান্ত হৈছিল যদিও কংগ্ৰেছে কোনো আলোচনা নকৰাকৈয়ে জয়ন্ত খাউণ্ডক দলত যোগদান কৰোৱাই সেই সমষ্টিৰ প্ৰাৰ্থী হিচাপে প্ৰক্ষেপ কৰে৷ কেৱল এয়াই নহয়, যোৱা ১০ মাৰ্চৰ মাজনিশা পৰ্যন্ত মিত্ৰতাৰ আলোচনা চলি থকাৰ মাজতে প্ৰদেশ কংগ্ৰেছৰ সভাপতি গৌৰৱ গগৈয়ে ফেচবুকযোগে হঠাৎ মিত্ৰতাৰ বিষয়টোৰ পৰা অলপ সময়ৰ বাবে বিৰতি লোৱা বুলি ঘোষণা কৰে৷ ৰাইজৰ দলে ইয়াক কংগ্ৰেছৰ একপক্ষীয় আৰু মিত্ৰতাবিৰোধী স্থিতি বুলি অভিহিত কৰিছে৷ ৰাইজৰ দলৰ মতে তেওঁলোকে বিজেপিবিৰোধী ভোট বিভাজন ৰোধ কৰাৰ স্বাৰ্থত ২৭খন আসনৰ পৰা নিজৰ দাবী হ্ৰাস কৰি মাত্ৰ ১৫খন আসন বিচাৰিছিল৷ কিন্তু কংগ্ৰেছে তেওঁলোকক মাত্ৰ কেইখনমান আসনহে পোনপটীয়াকৈ এৰি দি বাকী থকা সমষ্টিবোৰত বন্ধুত্বমূলক প্ৰতিদ্বন্দ্বিতাৰহে প্ৰস্তাৱ দিছিল৷ ৰাইজৰ দলৰ নেতৃত্বই অভিযোগ কৰিছে যে কংগ্ৰেছৰ ভিতৰচ’ৰাৰ গোষ্ঠীগত সংঘাত আৰু বিভিন্ন নেতাৰ ব্যক্তিগত স্বাৰ্থই মিত্ৰতাৰ আলোচনাত জটিলতাৰ সৃষ্টি কৰিছে৷ বিৰোধী দলপতি দেৱব্ৰত শইকীয়া, ৰিপুণ বৰা, প্ৰদু্যৎ বৰদলৈ আৰু ৰকিবুল হুছেইনৰ দৰে জ্যেষ্ঠ নেতাই সমষ্টি এৰি দিয়াত সন্মতি দিলেও শেষমুহূৰ্তত কোনে বিধি-পথালি দিছে তাক লৈও প্ৰশ্ন উত্থাপন হৈছে৷ বৰ্তমান সময়ত নিৰ্বাচনৰ যিহেতু বেছি দিন বাকী নাই, সেয়েহে ৰাইজৰ দলে মিত্ৰতাৰ নামত কোনো ধৰণৰ বিৰতি নিবিচাৰে৷ তেওঁলোকৰ স্পষ্ট কথা যে এই গুৰুত্বপূৰ্ণ সন্ধিক্ষণত আলোচনাৰ বিৰতি নহয়, বৰঞ্চ তড়িৎ গতিত মিত্ৰতাৰ বিষয়টো ছীল-মোহৰ মাৰি চূড়ান্ত কৰিব লাগে৷ অসমৰ ৰাইজৰ স্বাৰ্থত আৰু এক শক্তিশালী বিৰোধী ঐক্য গঠনৰ বাবে কংগ্ৰেছে নিজৰ স্থিতি স্পষ্ট কৰাটো জৰুৰী বুলি ৰাইজৰ দলে কৈ আহিছে৷
সংবাদমেল পাতি কংগ্ৰেছৰ বিৰুদ্ধে সৰব ৰাইজৰ দল– কংগ্ৰেছ দলে ৰাইজৰ দলৰ সৈতে চাৰিবাৰকৈ মিত্ৰতা ভংগ কৰিছে-
সংবাদ মেল পাতি কংগ্ৰেছৰ বিৰুদ্ধে সৰব হৈ পৰিল ৰাইজৰ দল৷ উল্লেখ্য, এতিয়াও ৰাইজৰ দল আৰু কংগ্ৰেছৰ মিত্ৰতা আনুষ্ঠানিকভাৱে চূড়ান্ত হোৱা নাই৷ ৰাইজৰ দলক একাষৰীয়া কৰি কংগ্ৰেছ দলে আন বিৰোধী দলৰ সৈতে ইতিমধ্যে মিত্ৰতা চূড়ান্ত কৰিছে ৷ সমান্তৰালকৈ কংগ্ৰেছ দলৰ নেতৃত্বৰ সৈতে ৰাইজৰ দলৰ শীৰ্ষ নেতাসকল কেইবাবাৰো মিত্ৰতা সম্পৰ্কীয় বৈঠকত বহিছে যদিও এইমুহূৰ্তলৈ চূড়ান্ত সিদ্ধান্তত উপনীত হোৱা নাই ৷ তাৰ মাজতে মিত্ৰতা সম্পৰ্কত ক্ষোভ প্ৰকাশ কৰিলে ৰাইজৰ দলে৷ কংগ্ৰেছ দলে এতিয়ালৈকে চ্ছ্ৰ বাৰকৈ ৰাইজৰ দলৰ সৈতে মিত্ৰতা ভংগ কৰিলে বুলি গুৰুতৰ অভিযোগ কৰিছে ৰাইজৰ দলে৷ বুধবাৰে গুৱাহাটীৰ মঠঘৰীয়াস্থিত ৰাইজৰ দলৰ কেন্দ্ৰীয় কাৰ্যালয়ত অনুষ্ঠিত এক সংবাদ মেলত কংগ্ৰেছৰ বিৰুদ্ধে ৰাইজৰ দলে আন কেতবোৰ অভিযোগ উত্থাপন কৰে৷ সংবাদ মেলত ৰাইজৰ দলৰ কাৰ্যকৰী সভাপতি ভাস্ক’ ডি শইকীয়াই কয়, ‘ৰাইজৰ দলৰ সৈতে সমষ্টি ভাগ-বাটোৱাৰাক লৈ আলোচনা চলি থকাৰ মাজতে চ্ছ্ৰটা সমষ্টিত- বৰছলা, ডিমৌ, দিছপুৰ আৰু মাৰ্ঘেৰিটাত কংগ্ৰেছ দলে প্ৰাৰ্থী ঘোষণা কৰে৷ মিত্ৰতাৰ আলোচনা চলি থাকোতেই ৰাইজৰ দলক বাদ দি সংবাদ মেলযোগে আনুষ্ঠানিকভাৱে কংগ্ৰেছে মিত্ৰজোঁট ঘোষণা কৰে৷’ তেওঁ কয়, ‘ৰাইজৰ দলৰ সৈতে সমষ্টি ভাগ-বাটোৱাৰাৰ আলোচনাত ৰঙানদী সমষ্টিত ৰাইজৰ দলে প্ৰতিদ্বন্দ্বিতা কৰিব বুলি সিদ্ধান্ত হৈ গৈছিল৷ কিন্তু ৰাইজৰ দলৰ লগত কোনো আলোচনা নকৰাকৈ ৰঙানদী সমষ্টিত জয়ন্ত খাউণ্ডক যোগদান কৰোৱাই প্ৰাৰ্থী হিচাপে প্ৰক্ষেপ কৰে৷ যোগদানৰ পিছতহে আমাক জনাই যে ৰঙানদী সমষ্টিত ৰাইজৰ দল নহয় কংগ্ৰেছেহে প্ৰতিদ্বন্দ্বিতা কৰিব৷ ১০ মাৰ্চৰ মাজনিশা পৰ্যন্ত মিত্ৰতাৰ আলোচনা চলি আছিল৷ ৰাইজৰ দলে আশা কৰিছিল পুৱা মিত্ৰতাকেন্দ্ৰিক আলোচনা সফলভাৱে পৰিসমাপ্তি ঘটিব৷ কিন্তু মিত্ৰতাৰ আলোচনা সন্দৰ্ভত কোনো যোগাযোগ নকৰাকৈ প্ৰদেশ কংগ্ৰেছৰ সভাপতি গৌৰৱ গগৈৰ ফেচবুকযোগে একপক্ষীয়ভাৱে ঘোষণা কৰি জনায়– ৰাইজৰ দলৰ সৈতে মিত্ৰতাৰ বিষয়টোৰ পৰা অলপ সময়ৰ বাবে বিৰতি লৈছোঁ৷ পৰৱৰ্তী সময়ত এই বিষয়টো আমি পুনৰ বিবেচনা কৰিম৷’ সংবাদ মেলত ভাস্ক’ ডি শইকীয়াই লগতে কয়, ‘ৰাইজৰ দলে কংগ্ৰেছৰ সৈতে হোৱা মিত্ৰতাকেন্দ্ৰিক আলোচনাৰ কথা অসমবাসীক মুকলিকৈ জনাই আহিছোঁ৷ অসমবাসীক আমি ইতিমধ্যে ৰাইজৰ দলে যে ২৭খন আসনৰ পৰা হ্ৰাস কৰি ২০খন আৰু পৰৱৰ্তী সময়ত ১৫খন আসনহে বিচাৰিছোঁ সেই কথাও অৱগত কৰিছোঁ৷
আমি অসমবাসীক কংগ্ৰেছে যে এই ১৫খন আসনৰ পৰা আমাক আমাৰ তালিকাৰ পৰা কেৱল ৬খন আসন পোনপটীয়াকৈ আৰু আন ৬খন আসন বন্ধুত্বমূলক প্ৰতিদ্বন্দ্বিতাৰ বাবে আৰু আনকেইখন আসন আমাৰ তালিকাৰ বাহিৰৰ পৰা প্ৰতিদ্বন্দ্বিতাৰ বাবে দিছে সেই কথাও অৱগত কৰিছোঁ৷ অৱশেষত মিত্ৰতাৰ স্বাৰ্থত আমাক কেৱল আৰু এখন আসন পোনপটীয়াকৈ প্ৰতিদ্বন্দ্বিতাৰ বাবে দিলেই হ’ব বুলিও কংগ্ৰেছক জনাইছিলোঁ৷’ তেওঁ লগতে কয়, ‘কংগ্ৰেছে ৰাইজৰ দলক বাদ দি সংবাদ মেলযোগে মিত্ৰজোঁট ঘোষণা কৰাৰ পিছত আচলতে কাৰ্যতঃ ৰাইজৰ দলৰ বাবে মিত্ৰতাৰ দুৱাৰ বন্ধ কৰি দিছিল৷ কিন্তু বৃহত্তৰ স্বাৰ্থৰ খাতিৰত ৰাইজৰ দলৰ উদ্যোগতহে পুনৰ মিত্ৰতাকেন্দ্ৰিক আলোচনা আৰম্ভ হৈছিল৷ ৰাইজৰ দলৰ নেতৃত্বই পোনপটীয়াকৈ প্ৰদেশ কংগ্ৰেছৰ সভাপতি গৌৰৱ গগৈৰ লগত আলোচনাত বহিব বিচাৰিছিল৷ কিন্তু আমাক ৰিপুণ বৰাৰ লগত আলোচনাত বহিব দিয়ে৷ ফেব্ৰুৱাৰীত ৰিপুণ বৰাৰ লগত হোৱা আলোচনাত মিত্ৰতাকেন্দ্ৰিক সকলো জটিলতা আঁতৰ হৈছিল৷ সমষ্টিৰ তালিকা পৰ্যন্ত চূড়ান্ত হৈ গৈছিল৷ কিন্তু আলোচনা শেষ হোৱাৰ ২ ঘণ্টাৰ পিছতে ফোন আহে আৰু আমাক জনাই যে ৰঙানদী সমষ্টিত ৰাইজৰ দলে নহয় কংগ্ৰেছ দলেহে প্ৰতিদ্বন্দ্বিতা কৰিব৷ কেৱল আলোচনাৰ দিনা অগপ দলৰ পৰা অহা নেতা জয়ন্ত খাউণ্ডক প্ৰাৰ্থিত্ব দিবৰ বাবেই কংগ্ৰেছে পুনৰ মিত্ৰতাৰ আলোচনাত অচলাৱস্থাৰ সৃষ্টি কৰে৷’ ভাস্ক’ ডি শইকীয়াই কয়, ‘ৰঙানদী ৰাইজৰ দলক নিদিয়ে? তাৰ পিছতো ৰাইজৰ দলে আলোচনা চলাই যায়৷ ৰঙানদী সমষ্টিত ৰাইজৰ দলে পোনপটীয়াকৈ প্ৰতিদ্বন্দ্বিতা কৰাৰ কথা আছিল৷ ৰাইজৰ দলে পোনপটীয়াকৈ প্ৰতিদ্বন্দ্বিতা কৰিবৰ বাবে ৰাইজৰ দলৰ পূৰ্ণ প্ৰস্তুতি থকা সমষ্টি বিচাৰোঁ৷ কংগ্ৰেছে কিন্তু দিব নিবিচাৰে৷ তাক লৈ আলোচনা চলি থকাৰ মাজতে গৌৰৱ গগৈৰ একপক্ষীয়ভাৱে ঘোষণা মিত্ৰতাত বিৰতি৷ পুনৰ বিবেচনা কৰিব৷ কিন্তু এই মুহূৰ্তত বিৰতি সম্ভৱপৰ নে?’
বিৰোধীৰ মিত্ৰতা সন্দৰ্ভত গৌৰৱ গগৈয়ে গান্ধাৰীৰ ভূমিকা লৈছে ঃ ভূমি পূজন আৰু উদ্বোধন বিজেপিৰ নতুন কৰ্মযজ্ঞৰ নমুনা ঃ ড॰ দেৱজিৎ মহন্ত ঃঃ অখিল গগৈ আধুনিক অসমৰ বদন বৰফুকন আৰু গৌৰৱ গগৈ মোগলৰ প্ৰধান সেনাপতি ৰাম সিংহ
চবকা চাথ, চবকা বিকাশৰ মহামন্ত্ৰৰে আমাৰ চৰকাৰৰ দিনতে ভূমি পূজন, আমাৰ চৰকাৰৰ দিনতে শুভ উদ্বোধনৰ নতুন কৰ্মযজ্ঞৰ ধাৰা সৃষ্টি কৰিছে বিজেপিয়ে৷ গুৱাহাটীত ব্ৰহ্মপুত্ৰৰ ওপৰত তৃতীয়খন দলং কুমাৰ ভাস্কৰ বৰ্মাৰ সেতু প্ৰধানমন্ত্ৰী নৰেন্দ্ৰ মোদীয়ে ২০১৯ চনত শিলান্যাস কৰিছিল আৰু ২০২৬ চনৰ ১৪ ফেব্ৰুৱাৰীত প্ৰধানমন্ত্ৰী নৰেন্দ্ৰ মোদীয়ে উদ্বোধন কৰিছে৷ একেদৰে মহাপুৰুষ শ্ৰীমন্ত শংকৰদেৱ গুৰুজনাৰ স্মৃতিবিজড়িত বটদ্ৰৱা প্ৰকল্প গৃহমন্ত্ৰী অমিত শ্বাহে শিলান্যাস আৰু শুভাৰম্ভ কৰিছে৷ সংবাদ মেলযোগে এই মন্তব্য কৰে অসম প্ৰদেশ বিজেপিৰ মুখপাত্ৰ ড॰ দেৱজিৎ মহন্তই৷ কৰ্মযজ্ঞৰ নতুন নিদৰ্শন নিৰ্ধাৰিত ৩৬ মাহৰ পৰিৱৰ্তে ২৭ মাহত অসমৰ পৰিবহণ আন্তঃগাঁথনিত নৱতম গুৱাহাটী দীঘলীপুখুৰীৰ পৰা বামুণীমৈদাম সংযোজিত চ্ছ্ৰ.২ কিঃমিঃ সংযোজিত মহাৰাজ পৃথু উৰণীয়া সেতু৷ জন আশীৰ্বাদ যাত্ৰাক জন অভিশাপ যাত্ৰা বুলি অভিহিত কৰা লুৰীণজ্যোতি গগৈক কঠোৰ সমালোচনা কৰি মুখপাত্ৰ ড॰ মহন্তই কয় যে ‘কা’ আন্দোলনৰ গইনা লৈ আছুৰ ঔৰষত জন্মগ্ৰহণ কৰা অসম জাতীয় পৰিষদৰ সভাপতি লুৰীণজ্যোতি গগৈয়ে কংগ্ৰেছৰ বোকাছাত উঠি বিধায়ক হোৱাৰ দিবাস্ব›Ÿ দেখিছে৷ অসম আন্দোলনৰ ৮৬০গৰাকী শ্বহীদৰ স্মৃতিত গুৱাহাটীৰ বৰাগাঁৱত নিৰ্মিত শ্বহীদ স্মাৰকলৈ গৈ বীৰ শ্বহীদসকলক শ্ৰদ্ধাঞ্জলি জনোৱাৰ সামান্যতম জ্ঞানকণো নাই লুৰীণজ্যোতি গগৈৰ৷ ৮৬০গৰাকী শ্বহীদৰ হত্যাকাৰী দল কংগ্ৰেছৰ সভাপতি গৌৰৱ গগৈক সুধিবলৈ সাহস আছেনে লুৰীণজ্যোতি গগৈৰ কিয় তৰুণ গগৈ নেতৃত্বাধীন কংগ্ৰেছ চৰকাৰৰ সময়ত অচিনাকি মিঞা মুছলমানক চৰকাৰী ভূমি, জলাশয় আৰু বনাঞ্চলত বহাইছিল? বিৰোধীৰ মিঞা সন্দৰ্ভত ড॰ মহন্তই কয় যে গৌৰৱ গগৈয়ে মিত্ৰতা সন্দৰ্ভত ধৃতৰাষ্ট্ৰৰ পত্নী গান্ধাৰীৰ ভূমিকা লৈছে৷ চকু থাকিও চকুত কাপোৰ বান্ধি নেদেখাৰ ভাও জুৰিছে৷ কংগ্ৰেছৰ নিলম্বিত বিধায়ক বাঘবৰৰ শ্বেৰমান আলী আৰু গোৱালপাৰা পশ্চিমৰ বিধায়ক আব্দুল ৰছিদ মণ্ডল ৰাইজৰ দলত অন্তৰ্ভুক্ত কৰাৰ বাবে দোষ আৰোপ কৰি গৌৰৱ গগৈয়ে মিত্ৰতা কৰিব খোজা নাই৷ কংগ্ৰেছৰ দুই নিলম্বিত বিধায়কে বহু দিন পূৰ্বে ৰাইজৰ দলত যোগ দিছে, যি কথা গৌৰৱ গগৈয়ে বহু দিন পূৰ্বে অৱগত৷ ড॰ মহন্তই কয় যে যি ধিং সমষ্টিক লৈ দুয়োটা দলে মিত্ৰতাত উপনীত হ’ব পৰা নাই বুলি যি ধাৰণা দিব বিচাৰিছে সেয়া সঁচা নহয়৷
ধিং সমষ্টিত ৯১ শতাংশ ভোট সংখ্যালঘুৰ৷ য’ত কংগ্ৰেছ আৰু ৰাইজৰ দলে বন্ধুত্বমূলক প্ৰতিদ্বন্দ্বিতা কৰিলেও বিজেপি জয়ী নহয়৷ তেওঁলোকৰ মূল সমস্যা হৈছে কংগ্ৰেছ আৰু ৰাইজৰ দলৰ খেলপথাৰ এখনেই, দুয়োটা দলৰে বিদ্যালয় এখনেই৷ সেয়া হৈছে সংখ্যালঘু অধ্যুষিত ২২টা সমষ্টি৷ সংখ্যাগুৰুৰ মাজত দুয়োটা দলে গণভিত্তি হেৰুৱাইছে৷ ড॰ মহন্তই কটাক্ষ কৰি কয় যে অখিল গগৈ হৈছে আধুনিক অসমৰ বদন বৰফুকন আৰু গৌৰৱ গগৈ মোগলৰ প্ৰধান সেনাপতি ৰাম সিংহ৷ আসন্ন ২৬১ ৰণক্ষেত্ৰত দুয়োৰে পৰাজয় নিশ্চিত, তাৰেই প্ৰতীয়মান হৈছে মুখ্যমন্ত্ৰী ড॰ হিমন্ত বিশ্ব শৰ্মা আৰু ৰাজ্যিক সভাপতি দিলীপ শইকীয়াৰ নেতৃত্বত যোৱা ১০ দিনজোৰা ‘জন আশীৰ্বাদ যাত্ৰা’ত ১৫ লাখতকৈ অধিক লোকৰ স্বতঃস্ফূৰ্ত সঁহাৰিত৷ ড॰ মহন্তই সংবাদ মেলত কয় যে ভাৰতীয় জনতা পাৰ্টীয়ে দলৰ ঊধ্বৰ্ত গৈ স্বদেশ আৰু স্বজাতিৰ বীৰপুৰুষসকলক স্বীকৃতি দিয়াৰ ক্ষেত্ৰত কেতিয়াও কাৰ্পণ্য কৰা নাই৷ স্বাধীনতা আন্দোলনৰ অক্লান্ত যোদ্ধা, ছমাহতকৈ অধিক সময় আন্দোলনৰ বাবে কাৰাবৰণ কৰা অসম প্ৰদেশ কংগ্ৰেছৰ প্ৰথমগৰাকী সভাপতি বাবু ছবিলাল উপাধ্যায়ক বিজেপিয়ে সন্মান প্ৰদান কৰিছে৷ বিজেপি নেতৃত্বাধীন এনডিএ চৰকাৰে বিশ্বনাথ জিলাৰ বিহালীত নৱনিৰ্মিত অভিযান্ত্ৰিক মহাবিদ্যালয়ক ‘ছবিলাল উপাধ্যায় অভিযান্ত্ৰিক মহাবিদ্যালয় বিহালী, বিশ্বনাথ’ নামেৰে নামকৰণ কৰিছে৷ ২০২০ চনৰ ২১ জুনত দিছপুৰৰ আনন্দ চন্দ্ৰ আগৰৱালা উদ্যানত মুখ্যমন্ত্ৰী ড॰ হিমন্ত বিশ্ব শৰ্মাই বাবু ছবিলাল উপাধ্যায়ৰ জীৱন্ত আকাৰৰ প্ৰতিমূৰ্তি উন্মোচন কৰিছে৷ সেই বাবেই ভাৰতীয় জনতা পাৰ্টী সৰ্বধৰ্মী, সৰ্বস্পৰ্শী আৰু সৰ্বব্যাপী বুলি উল্লেখ কৰে মুখপাত্ৰ ড॰ দেৱজিৎ মহন্তই৷
