সিদ্ধান্ত সলালে (Nandita Garlosa) নন্দিতা গাৰ্লোচাই, বিজেপিতে থাকিব তেওঁ৷ হাফলং সমষ্টিৰ বিজেপিৰ বৰ্তমান বিধায়িকা নন্দিতা গাৰ্লোচাই শেষমুহূৰ্তত ভাৰতীয় জাতীয় কংগ্ৰেছত যোগদান কৰাৰ পূৰ্বৰ সিদ্ধান্ত সলনি কৰি বিজেপি দলতে থকাৰ সিদ্ধান্ত লৈছে ৷ ১১৩ নম্বৰ হাফলং [জনজাতি] সমষ্টিৰ পৰা বিজেপিৰ টিকট নাপাই বিজেপি দল ত্যাগ কৰি কংগ্ৰেছ দলত যোগদান কৰাৰ সিদ্ধান্ত লৈছিল আৰু সেয়া লৈ ডিমা হাছাও জিলাৰ ৰাজনীতিত এক হুলস্থূলীয় পৰিস্থিতিৰ সৃষ্টি কৰিছিল৷
অৱশেষত বিজেপি নেত্ৰীগৰাকীয়ে কংগ্ৰেছত যোগদান কৰাৰ নিজৰ স্থিতি সলনি কৰি বিজেপি দলৰ হৈ কাম কৰাৰ সিদ্ধান্ত গ্ৰহণ কৰে৷ বিজেপিৰ টিকটৰ পৰা বঞ্চিত হোৱাৰ পিছতে যোৱা তিনি দিন বিজেপি নেত্ৰী নন্দিতা গাৰ্লোচাৰ লগত কংগ্ৰেছ নেতৃত্বৰ লগতে বহুকেইখন বৈঠক অনুষ্ঠিত হয়৷
কংগ্ৰেছ দলত যোগদান কৰিলে হাফলং সমষ্টিৰ পৰা নন্দিতা গাৰ্লোচাক কংগ্ৰেছৰ প্ৰাৰ্থী কৰা হ’ব বুলি দলীয় নেতৃত্বই তেওঁক আশ্বাস প্ৰদান কৰিছিল৷ দলৰ স্বাৰ্থত হাফলং সমষ্টিৰ পৰা কংগ্ৰেছ প্ৰাৰ্থিত্বৰ প্ৰবল দাবীদাৰ নিৰ্মল লাংথাচাই প্ৰাৰ্থিত্ব এৰি দিয়াৰ সিদ্ধান্ত লৈছিল৷ যাৰ বাবে আজিলৈকে কংগ্ৰেছ দলে হাফলং সমষ্টিৰ কংগ্ৰেছ প্ৰাৰ্থীৰ নাম ঘোষণা কৰা নাছিল৷ শুকুৰবাৰে কংগ্ৰেছ দলে সাতজনীয়া প্ৰাৰ্থী তালিকা ঘোষণা কৰে ৷ কিন্তু সেই তালিকাত হাফলং সমষ্টিত কংগ্ৰেছ প্ৰাৰ্থীৰ নাম ঘোষণা কৰা নাছিল৷
শুকুৰবাৰে নিশালৈকে গুৱাহাটীত নন্দিতা গাৰ্লোচাৰ লগতে কংগ্ৰেছ নেতৃত্বৰ মাৰাথন বৈঠক অনুষ্ঠিত হৈছিল৷ কিন্তু অৱশেষত হাফলং সমষ্টিৰ বৰ্তমান বিধায়িকাগৰাকীয়ে শেষ মুহূৰ্তত তেওঁৰ কংগ্ৰেছ দলত যোগদানৰ সিদ্ধান্ত সলনি কৰে ৷ উল্লেখযোগ্য যে, হাফলং সমষ্টিৰ পৰা বিজেপিৰ টিকট নাপাই ক্ষোভিত হৈ বিজেপি দল ত্যাগ কৰি কংগ্ৰেছ দলত যোগদান কৰাৰ সিদ্ধান্ত গ্ৰহণ কৰিছিল৷ ইপিনে এইবাৰ হাফলং সমষ্টিত বৰ্তমান বিধায়িকা নন্দিতা গাৰ্লোচাক টিকট নিদি বিজেপিৰ যুৱ নেত্ৰী ৰূপালী লাংথাচাক বিজেপি দলে টিকট প্ৰদান কৰে৷
