কংগ্ৰেছ দলৰ সভাপতি গৌৰৱ গগৈ আৰু ৰাইজৰ দলৰ সভাপতি অখিল গগৈৰ বিৰুদ্ধে জাতীয় সংগ্ৰামী সেনা, অসমৰ সভাপতি চিতু বৰুৱাই এক বিস্ফোৰক অভিযোগ উত্থাপন কৰিছে৷ কি কাৰণে এইবাৰ অখিল গগৈ আৰু গৌৰৱ গগৈয়ে নামাজ নপঢ়িলে? তেওঁলোকে ধৰ্মনিৰপেক্ষতাৰ কথা কৈ আৰু নিৰ্বাচনৰ প্ৰতি লক্ষ্য ৰাখি নামাজ নপঢ়িলে নেকি? তাৰ স্পষ্টীকৰণৰ দাবী তুলিলে জাতীয় সংগ্ৰামী সেনা, অসমৰ সভাপতি চিতু বৰুৱাই৷ এটা বিশেষ ভিডিঅ’যোগে অখিল গগৈ আৰু গৌৰৱ গগৈলৈ প্ৰশ্ন কৰি তেওঁ কয়- ‘প্ৰত্যেক বছৰে দেখিবলৈ পাওঁ যে, ৰাইজৰ দলৰ সভাপতি অখিল গগৈ আৰু কংগ্ৰেছ দলৰ সভাপতি গৌৰৱ গগৈয়ে ঈদত মুছলমান লোকসকলৰ সৈতে নামাজ পঢ়ে, কিন্তু এইবাৰ তাৰ বিপৰীত ছবি দেখিবলৈ পালোঁ৷ আজি পৱিত্ৰ ঈদৰ দিনটোত অখিল গগৈ আৰু গৌৰৱ গগৈক ক’তো নামাজ পঢ়া দেখা নাপালোঁ৷ নিজকে সংখ্যালঘু লোকসকলৰ ত্ৰাণকৰ্তা বুলি পৰিচয় দি অহা গৌৰৱ গগৈ আৰু অখিল গগৈয়ে এইবাৰ পৱিত্ৰ ঈদৰ দিনাখন নামাজ নপঢ়াৰ কাৰণটো কি? নিৰ্বাচন আহি আছে, নিৰ্বাচনৰ আগত যাতে ইয়াৰ কোনো ধৰণৰ প্ৰভাৱ নপৰে তাৰ প্ৰতি লক্ষ্য ৰখাৰ বাবে ক’তো দেখা নগ’ল নেকি দুয়োজনকে? লগতে, কয় ঈদৰ দিনাখন নামাজ পঢ়াৰ পিছত হিন্দু ভোটখিনি যাতে কাট নাখায় তেনে ধৰণৰ কিছুমান কথা-বতৰা চিন্তা কৰি অখিল গগৈ বা গৌৰৱ গগৈয়ে এইবাৰ নামাজ নপঢ়িলে নেকি বুলিও প্ৰশ্ন উত্থাপন কৰে৷
