শান্তি নাই, কেৱল যুদ্ধ৷ ইজৰাইলৰ পাৰমাণৱিক গৱেষণা কেন্দ্ৰক লক্ষ্য কৰি ইৰাণে প্ৰত্যাক্ৰমণ চলায়৷ ডিমোনা আৰু আৰাদত থকা পাৰমাণৱিক কেন্দ্ৰ দুটাৰ সমীপত পৰে ইৰাণৰ ক্ষেপণাস্ত্ৰ৷ এই ঘটনাত শতাধিক লোক আহত হয়৷ ইয়াৰ পিছত তেজস্কিয় বিকিৰণ নিৰ্গত হোৱাৰ আশংকাৰ সৃষ্টি হৈছে৷ সংবাদ সংস্থাৰ বাতৰি মতে, শনিবাৰে নিশা ইৰাণৰ এটা ক্ষেপণাস্ত্ৰ প্ৰথমে ডিমোনাৰ শ্বিমন পেৰেছ নেগেভ পাৰমাণৱিক কেন্দ্ৰৰ ওচৰত পৰে৷ কিছু সময়ৰ পিছতে তেহৰাণে আৰাদত থকা আন এটা পাৰমাণৱিক কেন্দ্ৰত পুনৰ আক্ৰমণ চলায়৷ অৱশ্যে এই ক্ষেপণাস্ত্ৰই প্ৰত্যক্ষভাৱে পাৰমাণৱিক কেন্দ্ৰটোত আঘাত কৰিব পৰা নাছিল বুলি জনা যায়৷ এই ক্ষেপণাস্ত্ৰই পাৰমাণৱিক কেন্দ্ৰটোৰ সমীপৰ কেইবাটাও ওখ অট্টালিকাত আঘাত কৰে৷ ফলত ঘৰবোৰ প্ৰায় ধবংসাৱশেষলৈ পৰিণত হয়৷
কিন্তু এই আক্ৰমণৰ ফলত কোনো ধৰণৰ তেজস্কিয় দূষণৰ খবৰ পোৱা নাই৷ ইজৰাইলৰ ৰাষ্ট্ৰীয় জৰুৰীকালীন কৰ্মীসকলে এই আক্ৰমণৰ খবৰ লাভ কৰি ঘটনাস্থলীত উপস্থিত হয়৷ এই আক্ৰমণত এশৰো অধিক লোক আহত হৈছে৷ ইতিমধ্যে এই ঘটনাৰ এটা ভিডিঅ’ ভাইৰেল হৈছে [যদিও ভিডিঅ’টোৰ সত্যতা পৰীক্ষা কৰা হোৱা নাই]৷ খবৰ অনুসৰি ইজৰাইলৰ প্ৰতিৰক্ষা ব্যৱস্থাই ইৰাণৰ দুটা ক্ষেপণাস্ত্ৰ ধবংস কৰাত ব্যৰ্থ হয়৷ ক্ষেপণাস্ত্ৰ দুটা ‘আইৰণ ড’ম’ ভেদ কৰি আঘাত হানে৷ কিন্তু এই আক্ৰমণৰ প্ৰতি ইজৰাইল চৰকাৰৰ কোনো প্ৰতিক্ৰিয়া দেখা যোৱা নাই৷ উল্লেখ্য যে শনিবাৰে ইজৰাইলে ইৰাণৰ নাটা পাৰমাণৱিক ঘাটিত আক্ৰমণ চলাইছিল৷ তেহৰাণৰ পৰা ২২০ কিলোমিটাৰ দক্ষিণ-পূবত অৱস্থিত এই ঘাটিটোত ইয়াৰ পূৰ্বেও কেইবাবাৰো আক্ৰমণ কৰা হৈছে৷ অৱশ্যে ৰাষ্ট্ৰসংঘৰ পাৰমাণৱিক নিৰীক্ষণ সংস্থাই নিশ্চিত কৰিছে যে শনিবাৰৰ আক্ৰমণত কোনো তেজস্কিয় বিকিৰণ ঘটা নাই৷ এইবাৰ ইৰাণে সেই আক্ৰমণৰ প্ৰতিশোধ লয়৷
