পহিলা ব’হাগত পাঁচগৰাকী বয়োজ্যেষ্ঠ বিশিষ্ট ব্যক্তিক সম্বৰ্ধনা জ্ঞাপন । অসম সাহিত্য সভাৰ অন্যতম সক্ৰিয় শাখা হিচাপে সুপৰিচিত মাজুলী জিলাৰ অন্তৰ্গত উত্তৰ কমলাবাৰী শাখা সাহিত্য সভাই পহিলা ব’হাগৰ দিনটোত অসম সাহিত্য সভাৰ আহ্বান মৰ্মে “নিজৰ দিন”ৰ কাৰ্যসূচী সম্পূৰ্ণ সফলতাৰে উদযাপন কৰে। সেই অনুসৰি অসমীয়া ভাষা-সাহিত্য, কৃষ্টি-সংস্কৃতি তথা সমাজ জীৱনলৈ অৰিহণা আগবঢ়াই অহা উত্তৰ কমলাবাৰী শাখা সাহিত্য সভাৰ বৃহত্তৰ এলেকাৰ পাঁচ গৰাকী বয়োজ্যেষ্ঠ বিশিষ্ট ব্যক্তিক ঘৰে ঘৰে গৈ সম্বৰ্ধনা জ্ঞাপন কৰে।
অসম সাহিত্য সভাৰ মাজুলী জিলাৰ প্ৰতিনিধি মনোজ্যোতি ৰেগন, অসম সাহিত্য সভাৰ প্ৰচাৰ আহ্বায়ক শংকুসিদ্ধ নাথ, মাজুলী জিলা সাহিত্য সভাৰ সভাপতি প্ৰফুল্ল বৰুৱা, সম্পাদক সঞ্জীৱ বৰা, কাৰ্যনিৰ্বাহক সদস্যা কৃষ্ণাৰাণী শইকীয়া বৰুৱা, উত্তৰ কমলাবাৰী শাখা সাহিত্য সভাৰ সভাপতি অনুপ্ৰভা দেৱী, সম্পাদক বিজয় শইকীয়া, সহকাৰী সম্পাদক জ্যোতি শইকীয়াৰ নেতৃত্বত জাতীয় সাজ পৰিধান কৰা এটি প্ৰতিনিধি দলে সোণাপৰা গাওঁৰ সমাজকৰ্মী-সাতোলা বংশীধৰ পামেগাম, বিষ্ণুপুৰ গাওঁৰ অৱসৰপ্ৰাপ্ত জ্যেষ্ঠ কাৰ্যালয় সহায়ক ডিম্বেশ্বৰ বৰা, ১ নং মৰিটুনী গাওঁৰ সমাজকৰ্মী বক্সিৰাম ৰেগন, দৰিয়া গাওঁৰ ধৰ্মপ্ৰাণ ব্যক্তি গোপীৰাম বৰা আৰু ভাৰতীয় সামৰিক বাহিনীৰ অৱসৰপ্ৰাপ্ত জোৱান দিলীপ বৰুৱাক অসম সাহিত্য সভাই প্ৰেৰণ কৰা ওলগনি পত্ৰৰ লগতে থলুৱা শিপিনীয়ে বোৱা ফুলাম গামোচা আৰু থুৰীয়া তামোলেৰে ‘নিজৰ দিন’ৰ সম্বৰ্ধনা জ্ঞাপন কৰে।সম্বৰ্ধনা অনুষ্ঠানত চমু বক্তব্য প্ৰদান কৰি সম্বৰ্ধিত পাঁচোগৰাকী ব্যক্তিয়ে উত্তৰ কমলাবাৰী শাখা সাহিত্য সভাৰ এনে পদক্ষেপে তেওঁলোকক উৎসাহিত কৰিছে বুলি উল্লেখ কৰি কৃতজ্ঞতা জ্ঞাপন কৰে।।
