লোকসভাত মহিলাৰ আসন সংৰক্ষণ সম্পৰ্কীয় গুৰুত্বপূৰ্ণ ১৩১ সংখ্যক সংবিধান সংশোধনী বিধেয়ক গৃহীত হ’ব নোৱাৰিলে। বিৰোধীৰ তীব্ৰ বাধা আৰু প্ৰয়োজনীয় দুই-তৃতীয়াংশ সংখ্যাগৰিষ্ঠতা লাভ নকৰাত বিধেয়কখন ব্যৰ্থ হয়।Women’s Reservation Bill: বিৰোধীৰ বাধাত লোকসভাত গৃহীত নহ’ল মহিলাৰ আসন সংৰক্ষণ বিধেয়ক
সদনত এই বিধেয়ক সন্দৰ্ভত দীঘলীয়া আলোচনা আৰু ভোটদান প্ৰক্ৰিয়া অনুষ্ঠিত হয়। বৈদ্যুতিন ভোটদানৰ সময়ত উপস্থিত ৪৮৯ জন সাংসদৰ ভিতৰত ২৭৮ জনে সপক্ষে আৰু ২১১ জনে বিপক্ষে ভোটদান কৰে। পিছত প্ৰকাশ পোৱা চূড়ান্ত তথ্য অনুসৰি, বিধেয়কখনৰ সপক্ষে ২৯৮টা আৰু বিপক্ষে ২৩০টা ভোট পৰে। তথাপিও সংবিধান সংশোধনৰ বাবে প্ৰয়োজনীয় দুই-তৃতীয়াংশ সমৰ্থন নোপোৱাৰ ফলত বিধেয়কখন গৃহীত নহ’ল।
এই ঘটনাৰ পাছতে চৰকাৰে লোকসভাত উত্থাপন কৰা আন দুটা বিধেয়কো প্ৰত্যাহাৰ কৰে। সদনৰ কাৰ্যসূচী শনিবাৰে পুৱা ১১ বজালৈ স্থগিত ৰখা হয়।
বিধেয়কখনৰ ওপৰত ভাষণ প্ৰদান কৰি কেন্দ্ৰীয় গৃহমন্ত্ৰী অমিত শ্বাহই বিৰোধীৰ ভূমিকা তীব্ৰ সমালোচনা কৰে। তেওঁ কয় যে চৰকাৰে আগবঢ়োৱা বহু গুৰুত্বপূৰ্ণ সিদ্ধান্তত বিৰোধীয়ে সদায় বাধা সৃষ্টি কৰি আহিছে। তেওঁ নৰেন্দ্ৰ মোদী নেতৃত্বাধীন চৰকাৰৰ কিছুমান উল্লেখযোগ্য পদক্ষেপৰ কথাও উল্লেখ কৰে, যেনে Article 370 বাতিল, ৰাম মন্দিৰ নিৰ্মাণ, আৰু তিনি তালাক প্ৰথা বিলোপ।
মহিলা সংৰক্ষণ সন্দৰ্ভত তেওঁ আৰু কয় যে ২০২৯ চনৰ ভিতৰত এই লক্ষ্য পূৰণ কৰাৰ বাবে চৰকাৰে পুনৰ চেষ্টা চলাব। তেওঁ প্ৰতিশ্ৰুতি দিয়ে যে ২০২৯ চনৰ লোকসভা নিৰ্বাচনত মহিলা সংৰক্ষণ সম্পূৰ্ণ ৰূপে কাৰ্যকৰী কৰাৰ লক্ষ্য গ্ৰহণ কৰা হৈছে।
বৰ্তমান লোকসভাত শাসকীয় এনডিএৰ ২৯৩ জন সাংসদ আছে, যিয়ে প্ৰায় ৫৪ শতাংশ আসন দখল কৰি আছে। আনহাতে বিৰোধীৰ সংখ্যা ২৩৩। সংবিধান সংশোধনী বিধেয়ক গৃহীত কৰিবলৈ উপস্থিত আৰু ভোটদান কৰা সদস্যৰ দুই-তৃতীয়াংশ সমৰ্থন বাধ্যতামূলক।
বিধেয়কখন লোকসভাত গৃহীত নহোৱাৰ ফলত এইবাৰ ৰাজ্যসভাতো উত্থাপন কৰা নহ’ব। ৰাজ্যসভাত এনডিএৰ ১৪১ জন সাংসদ আছে আৰু বিৰোধীৰ সংখ্যা ৮৩। দুই-তৃতীয়াংশ সমৰ্থন লাভ কৰিবলৈ ইয়াত ১৬৩ জন সাংসদৰ প্ৰয়োজন হ’ব।
ইফালে, ওড়িশাৰ মুখ্যমন্ত্ৰী নবীন পাটনায়কই সাংসদসকলক ৰাজ্যৰ স্বাৰ্থ ৰক্ষাৰ ক্ষেত্ৰত একত্ৰিত হৈ থাকিবলৈ আহ্বান জনায়। তেওঁ মহিলাৰ আসন সংৰক্ষণৰ প্ৰতি সমৰ্থন জনালেও বিধেয়কখনৰ বৰ্তমানৰ ৰূপক লৈ কিছু উদ্বেগ প্ৰকাশ কৰে।
