ষষ্ঠদশ অসম বিধানসভা নিৰ্বাচনৰ আজি ঘোষিত ফলাফলত কংগ্ৰেছ মিত্ৰজোঁটৰ সমৰ্থিত আৰু ৰাইজৰ দলৰ প্ৰক্ষেপিত প্ৰাৰ্থী অখিল গগৈয়ে দ্বিতীয়বাৰৰ বাবে শিৱসাগৰ সমষ্টিৰ পৰা জয়লাভ কৰিবলৈ সক্ষম হৈছে৷ আজি অসম বিধানসভা নিৰ্বাচনৰ ফলাফলত ধূলিস্যাৎ হৈ পৰিল বিৰোধী ঐক্য৷ উজনি অসমত নিঃশেষ হোৱা বিৰোধী ঐক্য মঞ্চৰ সন্মান ৰক্ষা কৰিলে ৰাইজৰ দলৰ সভাপতি অখিল গগৈয়ে৷ ৯৬নং শিৱসাগৰ সমষ্টিৰ পৰা ৰাইজৰ দলৰ সভাপতি তথা শিৱসাগৰ সমষ্টিৰ পূৰ্বৰ বিধায়ক অখিল গগৈয়ে ১৭২৭২টা ভোটত জয়লাভ কৰি বিজেপি দলৰ প্ৰাৰ্থী কুশল দুৱৰীক পৰাজিত কৰে৷ জয়ৰ পাছত অখিল গগৈয়ে সংবাদ মাধ্যমৰ আগত কয় যে নিৰ্বাচনত জয়লাভ কৰিও মই দুখ অনুভৱ কৰিছো৷ কিয়নো বিৰোধী ঐক্য মঞ্চে এইবাৰ নিৰ্বাচনত জয়লাভ কৰি চৰকাৰ গঠন কৰিম বুলি ভাবিছিলো যদিও বিৰোধী শোচনীয়ভাৱে পৰাজিত হয়৷ বিশেষকৈ যোৰহাট সমষ্টিত গৌৰৱ গগৈ, খোৱাং সমষ্টিত লুৰিণজ্যোতি গগৈ আৰু নাজিৰা সমষ্টিত দেৱব্ৰত শইকীয়াৰ পৰাজয় দুখজনক৷
এইবাৰ বিধান সভাত তেওঁৰ দায়িত্ব সহজ ন’হব বুলি তেওঁ উল্লেখ কৰি কয় বিধানসভাত অভাৱনীয়ভাৱে শাসক পক্ষৰ বিধায়ক বৃদ্ধি পালে৷ আনহাতে বিৰোধীৰ বিধায়ক টুটি আহিল৷ যাৰ ফলত শাসক পক্ষৰ চাপৰ মাজত বিধানসভাত নিজৰ দায়িত্ব পালন কৰিব লাগিব বুলিও তেওঁ উল্লেখ কৰে৷ আনহাতে শিৱসাগৰ সমষ্টিৰ ৰাইজক অখিল গগৈয়ে ধন্যবাদ জ্ঞাপন কৰি কয় যে যোৱবাৰ মোৰ অনুপস্থিতিত শিৱসাগৰৰ ৰাইজে মোক জয়ী কৰিছিল, এইবাৰ মোৰ উপস্থিতিত মোক জয়ী কৰালে৷ শিৱসাগৰৰ ৰাইজক তেওঁ আন্তৰিক ধন্যবাদ জ্ঞাপন কৰে৷ শিৱসাগৰ সমষ্টিত বিজেপি দলৰ প্ৰাৰ্থী কুশল দুৱৰীয়ে ৬৯২৪৯ ভোট, অগপ দলৰ প্ৰদীপ হাজৰিকাই ১৪৭৫৭ টা ভোট, আপৰ প্ৰাৰ্থী তপন গগৈয়ে ৭২১ টা ভোট, নিৰ্দলীয় প্ৰাৰ্থী ভৱেন্দ্ৰ নাথ মহনে ৮০৪ টা ভোট, ৰূপক ভূঞাই ৫২৯ টা ভোট, ৰাজকুমাৰ দুৱৰাই ৫০৬ টা ভোট আৰু হেমন্ত বৰুৱাই ৪৬২ টা ভোট লাভ কৰাৰ বিপৰীতে ন’টাত পৰে ১৭১৯ টা ভোট৷ ডিমৌ সমষ্টিত সুশান্ত বৰগোঁহাইৰ বৃহৎ জয়– প্ৰত্যাশিত ধৰণে ৯৫ নং ডিমৌ সমষ্টিৰ পৰা বিজেপি দলৰ সুশান্ত বৰগোঁহাই জয়ী হয়৷
এইয়া জনগণৰ জয় বুলি তেওঁ উল্লেখ কৰি বিজেপি দলৰ শীৰ্ষ নেতৃত্বক ধন্যবাদ জ্ঞাপন কৰে৷ আজিৰ গণনাত বৰগোঁহাইয়ে ৮৯৬৮১ ভোট লাভ কৰি তেওঁৰ নিকটতম প্ৰাৰ্থী কংগ্ৰেছ দলৰ অজয় গগৈক ৩৩৫২৮টা ভোটৰ ব্যৱধানত পৰাজিত কৰে৷ গগৈয়ে ৫৬১৫৩ সংখ্যক ভোট লাভ কৰাৰ বিপৰীতে উক্ত সমষ্টিৰ চিপিআই দলৰ প্ৰাৰ্থী অজয় বৰাই ২৫৭৫ ভোট লাভ কৰাৰ বিপৰীতে ন’টাত পৰে ১৭১৭ ভোট৷ নাজিৰা সমষ্টিত বিজেপি দলৰ ময়ূৰ বৰগোঁহাইৰ বিপুল জয়– অৱশেষত বহু বছৰৰ পাছত নাজিৰা সমষ্টিৰ পৰা কংগ্ৰেছ দলৰ দূৰ্গ খহাই বিজেপি দলে বিজয় ধবজা উৰুৱাবলৈ সক্ষম হয়৷ বিজেপি দলৰ প্ৰাৰ্থী ময়ূৰ বৰগোঁহাইয়ে ৯৮১৯৮ ভোট লাভ কৰি নাজিৰা সমষ্টিৰ বহু বাৰৰ বিধায়ক কংগ্ৰেছ দলৰ দেৱব্ৰত শইকীয়াক ৪৬৭০১ ভোটত পৰাজিত কৰে৷ শইকীয়াই ৫১৪৯৭ ভোট লাভ কৰাৰ বিপৰীতে চিপিআই দলৰ প্ৰাৰ্থী কনক গগৈয়ে ২৬৯১, নিৰ্দলীয় প্ৰাৰ্থী ক্ৰমে পংকজ মহন্তই ১০২৮, দিলৱাৰ হুছেইনে ৫৪৩, জয়ৰাম চৰাইমূৰীয়াই ৩৯২, গুফৰনূৰ ৰহমানে ৩৭১ আৰু দিলীপ সাহাই ৩১৩টা ভোট লাভ কৰে৷ নাজিৰা সমষ্টিত ন’টাত পৰে ১৭৩৫ সংখ্যক ভোট৷
