বেংমৰা মটক ৰাজ্যৰ প্ৰতিষ্ঠা কৰা স্বৰ্গদেউ সৰ্বানন্দ সিংহৰ পৱিত্ৰ পুণ্য তিথি উপলক্ষ্য মটক জনগোষ্ঠী গুৱাহাটীবাসী ৰাইজৰ সৌজন্যত মটক জনগোষ্ঠী গৱেষণা আৰু বিকাশ সংস্থাৰ সহযোগত ২২৪ সংখ্যক স্বৰ্গদেউ সৰ্বানন্দ সিংহ দিৱস উদযাপন।
২২৪ সংখ্যক মৃত্য দিৱস উপলক্ষে তিনিচুকীয়া জিলাৰ লগতে ৰাজ্যৰ বিভিন্ন প্ৰান্তত মটক ৰজা জনক সোঁৱৰি অনুষ্ঠিত কৰিছে বিভিন্ন ধৰণৰ অনুষ্ঠান। ক’ৰবাত যদি শ্ৰদ্ধাঞ্জলি অনুষ্ঠান, ক’ৰবাত আকৌ বীৰপুৰুষ গৰাকীৰ স্মৃতি বিজড়িত কৰি ৰাখিবলৈ স্বৰ্গদউ সৰ্বানন্দ সিংহৰ প্ৰতিমূৰ্তি স্থাপন কৰিছে মটক জনগোষ্ঠীৰ জাতীয় সংগঠনসমূহে। গুৱাহাটী মহানগৰীৰ বামুণীমৈদামস্থিত মটক জনগোষ্ঠী গৱেষণা আৰু বিকাশ সংস্থাৰ অস্থায়ী কার্যালয় মটক জনগোষ্ঠী গুৱাহাটীবাসী ৰাইজৰ সৌজন্যত স্বৰ্গদেউ সৰ্বানন্দ সিংহ দিৱস উদযাপন ।
ওঠৰ শতিকাৰ শেষভাগত অসমত সংঘটিত হোৱা ঐতিহাসিক মোৱামৰীয়া বিদ্ৰোহৰ সফল সেনা নায়কজনেই হৈছে স্বৰ্গদেউ সৰ্বানন্দ সিংহ। উক্ত গণবিদ্ৰোহৰ পৰিণতি হিচাপে উজনি অসমৰ অবিভক্ত ডিব্ৰুগড় জিলাৰ ভৌগোলিক পৰিসীমাত জন্ম হয় স্বাধীন মটক ৰাজ্যৰ। এক সংগ্ৰামী সত্তাৰ অধিকাৰী, পৰাক্ৰমী, সুদক্ষ মটক ৰজা সৰ্বানন্দ সিংহই ৰাজত্ব কৰিছিল ১৭৮৮ খ্ৰীঃৰপৰা ১৮০৫ খ্ৰীঃলৈকে। ফৰাচী বিপ্লৱতকৈ (১৭৮৬) ১৭বছৰ পূৰ্বেই অশিক্ষিত প্ৰজা বাহিনীক সংগঠিত কৰি অন্যান্যসকলৰ লগতে সৰ্বানন্দ সিংহৰ নেতৃত্বত এইদৰে অসমৰ প্রজাসাধাৰণে প্ৰথম শোষণ-নিষ্পেষণ আৰু বৈষম্যৰ বিৰুদ্ধে বিপ্লৱৰ সূচনা কৰি ৰাজশক্তি ওফৰাই দি নতুন ইতিহাস ৰচনা কৰিছিল।
বেংমৰা পুখুৰী, তিনিকোণীয়া পুখুৰী, দেৱী পুখুৰী, চাউলধোৱা পুখুৰী আদি জলসিঞ্চন তথা মৎস্য পালনৰ বাবে ৰাজধানীৰ ভিতৰে বাহিৰে মুঠ ২৪ টা পুখুৰী খন্দোৱাছিল স্বৰ্গদেউ সৰ্বানন্দ সিংহই।স্বৰ্গদেৱে শাসনত অধিষ্ঠিত হৈয়ে মটক ৰাজ্যখনৰ বিভিন্ন প্ৰান্তত বসবাস কৰা জনগোষ্ঠীটোৰ মুৰব্বী ব্যক্তিসকলৰ মতামত গ্ৰহণেৰে ৰাজদৰবাৰ পৰিচালনাৰ ব্যৱস্থা কৰি এক গণতান্ত্ৰিক আদৰ্শ প্ৰতিষ্ঠা কৰিছিল। এনে সামূহিক ব্যৱস্থাৰে মটক ৰাজ্যৰ সামগ্ৰিক উন্নতিৰ ভেটি সুদৃঢ় হৈছিল। এই প্ৰজাৰঞ্জক ৰজাজনা ১৭৯৯ চন মানৰ পৰা অসুস্থ হৈ শয্যাশায়ী হৈ পৰাত তেঁওৰ বৰপুত্ৰ মাটিবৰৰ যোগেদি ৰাজ্য চলাইছিল আৰু ১৮০৫ চনত উজনীৰ সৌমাৰখণ্ডৰ ৰজাগৰাকীৰ পৰলোকপ্ৰাপ্তি ঘটে। দেওবাৰে , মটক জনগোষ্ঠী গুৱাহাটীবাসী ৰাইজৰ সৌজন্যত মটক জনগোষ্ঠী গৱেষণা আৰু বিকাশ সংস্থাৰ সহযোগত ২২৪ সংখ্যক স্বৰ্গদেউ সৰ্বানন্দ সিংহ দিৱসটো পুৱা ১০ বজাৰ পৰা বিভিন্ন কাৰ্যসূচিৰে অনুষ্ঠিত কৰে । স্বৰ্গদেউ সৰ্বানন্দ সিংহৰ প্ৰতিচ্ছৱিত মাল্যাৰ্পন কৰাৰ লগতে বেংমৰা মটক ৰাজ্যৰ প্ৰতিষ্ঠা কৰা স্বৰ্গদেউ সৰ্বানন্দ সিংহৰ কৰ্মৰাজীৰ বিষয়ে আলোকপাত কৰে বিভিন্ন জনে । ইয়াৰ উপৰিও বৰ্তমানেও সামাজিক আৰু অৰ্থনৈতিক দিশত যথাযথ উন্নতি নঘটা মটক জনগোষ্ঠীৰ কাৰণ সম্পৰ্কেও আলোচনা হয় । উক্ত অনুষ্ঠানত মুখ্য অতিথি হিচাপে উপস্থিত থাকে তিনিচুকীয়া সমষ্টিৰ বিধায়ক পুলক গোহাঁই। বিধায়ক পুলক গোহাঁই, মটক জনগোষ্ঠীটো কেনেকৈ প্ৰতিয়োগীতাৰ মাধ্যমেৰে ৰাজনৈতিৰ আৰু অৰ্থনৈতিক ভাবে আগবাঢ়িছে তেও মন্তব্য কৰি কয় ।
মটক জনগোষ্ঠীৰ গুৱাহাটীবাসী ৰাইজ আৰু মটক জনগোষ্ঠী গৱেষণা আৰু বিকাশ সংস্থাৰ আহ্বায়ক সমিতিত আছিল – অনুপ চেতিয়া, শংকৰ গোহাঁই, অমূল্য সেনাপতি, নৱজ্যোতি শইকীয়া, দেৱকান্ত বৰুৱা, তৰুণ গগৈ ৰ দৰে বিশিষ্ট ব্যক্তিসকল ।
