নলবাৰী জিলাৰ বিভিন্ন প্ৰান্তত চোৰে নাকত ধৰি চাকত ঘূৰাইছে বহু পৰিয়ালক। নলবাৰী জিলাৰ ৪০ নং টিহু বিধানসভা সমষ্টিৰ অন্তৰ্গত গোৱালপাৰা পশ্চিম চুবুৰীৰ অৱসৰপ্ৰাপ্ত এ.পি.আৰ (APR) ইন্সপেক্টৰ বিষয়া আব্দুল ফাজেৰ আলী (৬৪) আৰু ৰীণা বেগম(৪৭)ৰ বাসগৃহত যোৱা ২৮ মে’ ঈদৰ দিনা নিশা ঘৰত কোনো নথকাৰ সুযোগতে সংঘটিত হয় চুৰিকাণ্ড।চোৰৰ দলটোৱে বাঁহৰ জেওৰা পাৰ হৈ আহি মূল গৃহৰ লোৰ গ্ৰীলৰ তলা আৰু মূল দৰ্জাৰ ল’ক ভাঙি গৃহত প্ৰৱেশ কৰি সংঘটিত কৰে এই চুৰিকাণ্ডৰ ঘটনা।
আনহাতে,চোৰৰ দলটোৱে চুৰিকাণ্ডত ব্যৱহৃত চিপৰাং এৰি থৈ যায়। চোৰৰ দলটোৱে আব্দুল ফাজেৰ আলীৰ ঘৰৰ পৰা কাঁহৰ বাচন ৪ খন,পাটৰ কাপোৰ ৭ যোৰ, সোণৰ আঙুঠি ৩ টা,সোণৰ নেকলেচ ১ ডাল, সোণৰ চেইন ১ ডাল, সোণৰ কাণফুলি ২ যোৰ, নগদ ধন ৯২ হেজাৰৰ লগতে ২ টাকে কুকাৰকে ধৰি অন্যান্য সা- সামগ্রী চুৰি কৰি লৈ যোৱাৰ কথা জানিবলৈ দিছে। চোৰৰ দলটোৱে পৰিয়ালটোৰ বিভিন্ন কোঠাৰ পৰা দুটা গড্ৰেজ আৰু এটা শ্বো-কেচ্ ভাঙি পাট মুগাৰ কাপোৰ আৰু সোণৰ আ অলঙ্কাৰ ,নগদ ধন লৈ যায়।
আনহাতে, চোৰৰ দলটোৱে বক্স পালেংৰ মেট্ৰেছৰ কাপোৰ-কানি লণ্ড-ভণ্ড কৰে। উল্লেখ্য যে ঈদ উপলক্ষে পৰিয়ালটোৰ চাৰিজনীয়া পৰিয়ালটো তেওঁলোকৰ গুৱাহাটীৰ ভেটাপাৰা সাওকুছিস্থিত নিজ গৃহলৈ বুলি যোৱাৰ সুযোগ বুজি সংঘটিত কৰে এই চুৰিকাণ্ডৰ। ভুক্তভোগী পৰিয়ালটোৱে ইতিমধ্যে বেলশৰ আৰক্ষী থানাত ঘটনা সংক্ৰান্তত লিখিত এজাহাৰ দাখিল কৰিছে। অঞ্চলটোত সঘনাই সংঘটিত চুৰিকাণ্ডত এতিয়া অতিষ্ঠ হৈ পৰিছে স্থানীয় সচেতন মহল। অঞ্চলটোত গাঁওৰক্ষী বাহিনী আৰু আৰক্ষীৰ টহলৰ সু-ব্যৱস্থা গ্ৰহণৰ দাবী জনাইছে স্থানীয় সচেতন মহলে।
