স্বচ্ছ সৰ্বেক্ষণ ২০২৬-ত গুৱাহাটীক শীৰ্ষস্থানত অধিষ্ঠিত কৰাৰ লক্ষ্যৰে গুৱাহাটী পৌৰ নিগমে (GMC) এক ব্যতিক্ৰমী আৰু জনসম্পৃক্ত পদক্ষেপ গ্ৰহণ কৰিছে। নগৰখনৰ মহিলা সমিতি, উন্নয়ন সমিতি, নাগৰিক সমিতি আৰু বিভিন্ন সংঘক সামৰি এলেকাভিত্তিক “স্বচ্ছতা প্ৰতিযোগিতা” ঘোষণা কৰা হৈছে। এই প্ৰতিযোগিতাৰ জৰিয়তে পৰিস্কাৰ-পৰিচ্ছন্নতা, সেউজীয়া আৰু স্বাস্থ্যসন্মত গুৱাহাটী গঢ়াৰ ক্ষেত্ৰত নাগৰিক সমাজৰ সক্ৰিয় অংশগ্ৰহণ নিশ্চিত কৰাৰ লক্ষ্য লোৱা হৈছে।
এই সন্দৰ্ভত আজি গুৱাহাটী পৌৰ নিগমৰ উজানবজাৰস্থিত কাৰ্যালয়ত অনুষ্ঠিত সংবাদমেলত সভাপতিত্ব কৰে মেয়ৰ মৃগেন শৰণীয়াই। অনুষ্ঠানত উপস্থিত থাকে উপ-মেয়ৰ স্মিতা ৰয়, পাৰিষদ অসীম শইকীয়া,পৌৰ আয়ুক্ত চিন্ময় প্ৰকাশ ফুকন, অতিৰিক্ত আয়ুক্ত ড০ ধ্ৰুৱজ্যোতি হাজৰিকা আৰু পৌৰ নিগমৰ অন্যান্য জ্যেষ্ঠ বিষয়াসকল। মেয়ৰ শৰণীয়াই কয় যে, “স্বচ্ছতা কেৱল চৰকাৰ বা পৌৰ নিগমৰ দায়িত্ব নহয়, ই সমগ্ৰ সমাজৰ এক সামূহিক দায়বদ্ধতা। এই প্ৰতিযোগিতাই নাগৰিকসকলক নিজৰ এলেকাক পৰিস্কাৰ পৰিচ্ছন্ন, সজীৱ আৰু আদৰ্শ অঞ্চল হিচাপে গঢ়ি তোলাৰ বাবে উৎসাহিত কৰিব।”
প্ৰতিযোগিতাত ১০০ৰ পৰা ৩০০টা পৰিয়াল সামৰি থকা মহিলা সমিতি, উন্নয়ন সমিতি, নাগৰিক সমিতি আৰু ক্লাবসমূহে অংশগ্ৰহণ কৰিব পাৰিব। মুঠ ১৫০ নম্বৰৰ ভিত্তিত মূল্যায়ন কৰা হ’ব। আৱৰ্জনা পৃথকীকৰণ, পৰিষ্কাৰ নলা-নৰ্দমা, মুকলি আৱৰ্জনামুক্ত এলেকা, বৃক্ষৰোপণ, সামাজিক সচেতনতা, পেলনীয়া জাৱৰৰ পৰা পচন সাৰ উৎপাদনৰ ব্যৱস্থা, পৰিষ্কাৰ পথ আৰু নান্দনিক সৌন্দৰ্যবৰ্ধনৰ দৰে বিভিন্ন মানদণ্ডৰ ওপৰত মূল্যায়ন সম্পন্ন হ’ব। বিশেষভাৱে, উন্নয়ন সমিতিৰ সিদ্ধান্ত অনুসৰি দোকান, ঘৰ আৰু দেৱালসমূহত অসমৰ ৰাজ্যিক ফুল কপৌফুলৰ বেঙুনীয়া ৰং ব্যৱহাৰ কৰি নান্দনিক সৌন্দৰ্যবৰ্ধন কৰিলে সৰ্বাধিক ৫০ নম্বৰ লাভ কৰিব পাৰিব।
পুৰস্কাৰসমূহঃ
প্ৰথম পুৰস্কাৰ – ৩,০০,০০০.০০ টকা
দ্বিতীয় পুৰস্কাৰ – ২,০০,০০০.০০ টকা
তৃতীয় পুৰস্কাৰ – ১,০০,০০০.০০ টকা
তিনিটা উদগনি মূলক পুৰস্কাৰ – প্ৰতিটোৰ বাবদ ৫০,০০০.০০ টকা
ব্যতিক্ৰমীভাৱে উৎকৃষ্ট এখন সমিতিলৈ বিশেষ পুৰস্কাৰ – ৫,০০,০০০ টকা
ইয়াৰ উপৰিও, অংশগ্ৰহণ কৰা সকলো সমিতিক প্ৰমাণপত্ৰ প্ৰদান কৰা হ’ব।
নগৰখনত পৰিচ্ছন্নতা আন্দোলনক অধিক শক্তিশালী কৰাৰ লক্ষ্যৰে গুৱাহাটী পৌৰ নিগমে প্ৰায় ১,০০০ গৰাকী মহিলা “স্বচ্ছ সখী” নিয়োগ কৰাৰো পৰিকল্পনা কৰিছে, মহিলা সৱলীকৰণৰ উদ্দেশ্যে এই পদক্ষেপ লোৱা হৈছে। প্ৰতিগৰাকী স্বচ্ছ সখীয়ে প্ৰায় ৩০০টা পৰিয়ালৰ সৈতে সমন্বয় সাধন কৰি আৱৰ্জনা সংগ্ৰহ ব্যৱস্থাৰ তদাৰক আৰু পৰিচ্ছন্নতা সম্পৰ্কীয় সচেতনতা বৃদ্ধিৰ কাম কৰিব। একেসময়তে নাগৰিকৰ অধিক অংশগ্ৰহণ নিশ্চিত কৰিবলৈ গৃহস্থলীৰ আৱৰ্জনা সংগ্ৰহৰ মাহিলী ব্যৱহাৰকাৰী মাচুল ৫০ টকাৰ পৰা ৩০ টকালৈ হ্ৰাস কৰা হৈছে। এই সিদ্ধান্তই অধিক সংখ্যক পৰিয়ালক দুৱাৰমুখীয়া আৱৰ্জনা সংগ্ৰহ ব্যৱস্থাৰ সৈতে সংযুক্ত কৰাত সহায় কৰিব।
গুৱাহাটী পৌৰ নিগমৰ এই পদক্ষেপে নগৰখনত এলেকাভিত্তিক মালিকানা, দায়বদ্ধতা আৰু পৰিচ্ছন্নতাৰ সংস্কৃতি গঢ়ি তোলাৰ এক শক্তিশালী বাৰ্তা বহন কৰিছে। স্থানীয় সমিতি, মহিলা গোট আৰু সচেতন নাগৰিকৰ সক্ৰিয় সহযোগিতাৰ জৰিয়তে গুৱাহাটীক অধিক পৰিষ্কাৰ, সেউজীয়া, সুস্থ আৰু বাসোপযোগী মহানগৰ হিচাপে গঢ়ি তোলাই এই কাৰ্যসূচীৰ মূল লক্ষ্য।
