ব্যক্তিগত জীৱনকলৈ পুনৰ সংবাদ শিৰোনামত দক্ষিণৰ জনপ্ৰিয় অভিনেতা নাগা চৈতন্য। শেহতীয়াকৈ তেওঁ দিল্লী উচ্চ ন্যায়ালয়ৰ কাষ চাপিছে, যাৰ ফলত ছ’চিয়েল মিডিয়াত জল্পনা-কল্পনাৰ সৃষ্টি হৈছিল। এই বিষয়টো তেওঁৰ প্ৰাক্তন পত্নী তথা অভিনেত্ৰী সামন্থা ৰুথ প্ৰভুৰ সৈতে জড়িত, যাৰ সৈতে তেওঁৰ বিবাহ বিচ্ছেদ ৪ বছৰ ৭ মাহ হ’ল।
চৈতন্যই নিজৰ নাম, ফটো, পৰিচয়ৰ অপব্যৱহাৰ ৰোধ কৰিবলৈ দিল্লী উচ্চ ন্যায়ালয়ত আবেদন দাখিল কৰিছে। অভিনেতাগৰাকীয়ে দাবী কৰিছে যে তেওঁৰ ফটো ইণ্টাৰনেটত অনুমতি অবিহনে ব্যৱহাৰ কৰা হৈছে। তেওঁৰ লিগেল টীমে আদালতক অৱগত কৰে যে তেওঁৰ নাম বিভিন্ন ঠাইত তেওঁৰ ভাবমূর্তিৰ ক্ষতি কৰিব পৰা বিষয়বস্তুৰে ব্যৱহাৰ কৰা হৈছে৷ বিশেষকৈ তেওঁলোকে এআই-জেনেৰেটেড ভিডিঅ’, ডিপফেক কন্টেন্ট আৰু কিছুমান বিভ্ৰান্তিকৰ বাতৰিৰ সন্দৰ্ভত আদালতৰ হস্তক্ষেপ বিচাৰিছে।
নাগা চৈতন্যৰ জ্যেষ্ঠ অধিবক্তা বৈভৱ গগৰে কয় যে একাংশ ৱেবছাইটে অভিনেতাজনৰ নাম ব্যৱহাৰ কৰি অধিক ভিউজ লাভৰ জৰিয়তে ৰাজহ লাভ কৰিছে। তেওঁ বুজাই দিলে যে ইণ্টাৰনেটত এনে বহু কন্টেন্ট উপলব্ধ য’ত এআইৰ সহায়ত নিৰ্মিত ভুৱা ভিডিঅ’ আৰু ফটো ব্যৱহাৰ কৰা হয়। তদুপৰি একাংশ বাতৰিত অভিনেতাগৰাকীৰ বিষয়ে কোনো প্ৰমাণ নোহোৱা দাবী উত্থাপন হৈছে। অধিবক্তাগৰাকীয়ে আদালতত কয় যে এইটো স্বাভাৱিক সমালোচনা নহয়, বৰঞ্চ সম্পূৰ্ণ ট্ৰলিং আৰু মানহানিৰ গোচৰহে।
আৱেদনখনত উল্লেখ কৰা হৈছে যে আধুনিক প্ৰযুক্তিৰ অপব্যৱহাৰ কৰি নাগা চৈতন্যৰ ভুৱা অডিঅ’ আৰু ভিডিঅ’ ক্লিপ সৃষ্টি কৰা হৈছে। অভিনেতাগৰাকীয়ে অভিযোগ কৰিছে যে ডিপফেক, ভইচ ক্ল’নিং আৰু ডিজিটেল এডিটিংৰ সহায়ত মানুহক বিপথে পৰিচালিত কৰিব পৰা কন্টেন্ট তৈয়াৰ কৰা হৈছে। তেওঁ কয় যে ইয়াৰ ফলত তেওঁৰ ভাবমূর্তি, সুনাম, গোপনীয়তা আৰু ৰাজহুৱা জীৱনত নেতিবাচক প্ৰভাৱ পৰিছে। আদালতে অনুমতি অবিহনে তেওঁৰ ফটো ব্যৱহাৰ কৰা কিছুমান অনলাইন প্ৰডাক্টৰ কথাও উল্লেখ কৰে।
গোচৰৰ শুনানি গ্ৰহণ কৰি ন্যায়াধীশ জ্যোতি সিঙে কয় যে সাধাৰণ মানুহতকৈ ৰাজহুৱা ব্যক্তিসকলে অধিক তদন্ত আৰু সমালোচনাৰ সন্মুখীন হয়। অৱশ্যে সীমাবদ্ধতা থাকিব লাগে বুলিও তেওঁ স্বীকাৰ কৰে। আদালতে কয়, “আপুনি ৰাজহুৱা জীৱনত আছে, গতিকে আপুনি আনতকৈ অধিক নিৰাপত্তাহীন, কিন্তু ইয়াৰ সীমা আছে।”
নাগা চৈতন্য আৰু সামন্তা ৰুথ প্ৰভুৰ কেইবাবছৰ ধৰি প্ৰেমৰ সম্পৰ্কৰ অন্তত ২০১৭ চনত বিবাহপাশত আবদ্ধ হয়। অনুৰাগীসকলে তেওঁলোকৰ যোৰাটো ভাল পাইছিল। কিন্তু চাৰি বছৰৰ ভিতৰত অৰ্থাৎ ২০২১ চনত তেওঁলোকে পৃথক হোৱাৰ সিদ্ধান্ত লয়। ইয়াৰ পিছত দুয়ো নিজৰ জীৱনটো আগুৱাই লৈ গ’ল। নাগা চৈতন্যই সোভিতা ধূলিপালাৰ সৈতে বিবাহপাশত আবদ্ধ হয়, আনহাতে সামন্থাই ছবি নিৰ্মাতা ৰাজ নিদিমোৰুৰ সৈতে বিবাহপাশত আবদ্ধ হয়। ইয়াৰ পূৰ্বেও সামান্থাই স্পষ্ট কৰি দিছে যে তেওঁলোকৰ বিবাহ বিচ্ছেদ পাৰস্পৰিক আছিল আৰু দুয়োৰে মাজত কোনো বিবাদ নাছিল।
