শেহতীয়াকৈ গুৱাহাটী মহানগৰীৰ ছেৰাপভাটীত সংঘটিত এক ঘটনাক কেন্দ্ৰ কৰি সামাজিক মাধ্যমত তীব্ৰ বিতৰ্কৰ সৃষ্টি হৈছে৷ বাতৰি অনুসৰি অবৈধ ভাঙক কেন্দ্ৰ কৰি মহানগৰীত একাংশ বহিঃৰাজ্যৰ লোক আৰু স্থানীয় লোকৰ মাজত হতাহতিৰ সৃষ্টি হয় আৰু ‘‘অসমীয়া গ’ বেক’’ ধবনি দিয়ে৷ এই উত্তপ্ত পৰিস্থিতি নিয়ন্ত্ৰণ কৰিবলৈ যোৱা আৰক্ষী আৰু বাতৰি সংগ্ৰহৰ বাবে যোৱা সাংবাদিককো দুষ্কৃতিকাৰীয়ে আক্ৰমণ কৰাৰ অভিযোগ উত্থাপন হৈছে৷ উল্লেখযোগ্য যে আজি উক্ত অনাকাংক্ষিত ঘটনাৰ পৰিপ্ৰেক্ষিতত পিপল্ছ নৰ্থ ইষ্ট নামৰ এটা বাতৰি প’ৰ্টেলৰ তৰফৰ পৰা গুৱাহাটী প্ৰেছ ক্লাবৰ সভাপতি, সম্পাদকলৈ এখন আবেদন প্ৰেৰণ কৰা হয়, য’ত বাতৰি প্ৰতিষ্ঠানটোৰ হৈ সাংবাদিক ম?ুল ডেকাই অভিযোগ কৰে– ‘আজি দুপৰীয়া এক বজাত মহানগৰীৰ আৰ্য নগৰৰ ছেৰাপভাটীত অবৈধ গা?াৰ বিৰুদ্ধে জিতেন্দ্ৰ শালৈ নামৰ এগৰাকী সমাজকৰ্মীৰ এক অভিযান চলিব বুলি খবৰ লাভ কৰি বাতৰি সংগ্ৰহৰ বাবে গৈছিল পিপলছ নৰ্থ ইষ্টৰ দুগৰাকীকৈ সাংবাদিক৷ কিন্তু দুৰ্ভাগ্যবশত বাতৰি সংগ্ৰহৰ সময়তেই একাংশ উদণ্ড বহিৰাগত লোকৰ আক্ৰমণৰ বলি হয় আমাৰ দুগৰাকীকৈ সাংবাদিক হৃদয় আহমেদ আৰু অ?ন বৰদলৈ৷ এই ঘটনাত গুৰুতৰভাৱে আহত হয় সাংবাদিক হৃদয় আহমেদ৷ গতিকে উক্ত ঘটনাৰ ওপৰত প্ৰেছ ক্লাবৰ প্ৰয়োজনীয় পদক্ষেপ আৰু সাংবাদিকৰ জীৱনৰ নিৰাপত্তা সুনিশ্চিত কৰাৰ দাবী উত্থাপন কৰি আজিৰ এই ঘটনাৰ ওপৰত বিহিত ব্যৱস্থা ল’ব বুলি আশা কৰিলোঁ৷’
সমান্তৰালকৈ সদৌ অসম ছাত্ৰ সন্থাৰ সাধাৰণ সম্পাদক সমীৰণ ফুকনে সামাজিক মাধ্যমৰ যোগে এই সন্দৰ্ভত ৰাজ্যৰ মুখ্যমন্ত্ৰীলৈ উদ্দেশ্য কৰি দাবী কৰে– ‘অসমৰ ৰাজধানী চহৰৰ বুকুত অসমীয়া গ’ বেক ধবনি দিবলৈ দুঃসাহস কৰা, অসমীয়া লোকক মাৰ-পিট কৰিবলৈ কুণ্ঠাবোধ নকৰা কোনো লোকৰ অতপালি সহ্য কৰা নহ’ব৷ কোনো স্থানত কাৰোবাৰ জনবসতি বেছি হ’ল বুলিয়েই খিল?ীয়া ভূমিপুত্ৰৰ ওপৰত তাণ্ডৱযআক্ৰমণ চলোৱাৰ অধিকাৰ কাকো দিয়া নহ’ব৷ কি পৰিস্থিতিত আজিৰ ঘটনা উদ্ভৱ হ’ল, কোন মানুহে সংবাদ সংগ্ৰহ কৰিবলৈ যোৱা কৰ্তব্যৰত সাংবাদিকক নিৰ্মমভাৱে প্ৰহাৰ কৰাৰ উপৰি পৰিস্থিতি নিয়ন্ত্ৰণৰ বাবে যোৱা আৰক্ষীকো আক্ৰমণৰ লক্ষ্য কৰি ল’লে এই সকলো কথাৰ উত্তৰ লাগিব৷ সাংবাদিকগৰাকীৰ লগতে আৰক্ষীৰ লোকসকলৰ আশু আৰোগ্য কামনা কৰি এটা কথা স্পষ্ট কৰি দিও- অসমৰ মাটিত কোনো বহিৰাগতৰ উদ্ভণ্ডালি সহ্য নকৰো৷ চৰকাৰে তাৎক্ষণিকভাৱে এই সন্দৰ্ভত ব্যৱস্থা গ্ৰহণ কৰক৷ ৰাজ্যত আইন-শৃংখলাজনিত পৰিস্থিতি উদ্ভৱ কৰাসকলৰ বিৰুদ্ধে চৰকাৰ কঠোৰ হওক৷ অন্যথা খিল?ীয়া অসমীয়াৰ অধিকাৰ সুৰক্ষাৰ বাবে আৰম্ভ হ’ব লগা প্ৰতিৰোধমূলক সংগ্ৰামৰ সন্মুখীন হ’বলৈ সাজু থাকক৷ তাৎক্ষণিকভাৱে আজিৰ ঘটনাৰে জড়িত প্ৰতিটো দুৰ্বৃত্তক কৰায়ত্ত কৰি কঠোৰ শাস্তিৰ ব্যৱস্থা কৰক৷’ মন কৰিবলগীয়া যে গুৱাহাটী মহানগৰীৰ মাজমজিয়াত দুজনকৈ কৰ্তব্যৰত সাংবাদিকৰ ওপৰত হোৱা আক্ৰমণ আৰু দুটা পক্ষৰ আক্ৰমণ-প্ৰত্যাক্ৰমণৰ মাজত ‘‘অসমীয়া গ’ বেক’’ ধ্বনি উচ্ছাৰিত হোৱাৰ অত্যন্ত উদ্বেগজনক, প্ৰৰোচনামূলক ঘটনাটোৰ পিছতো বৰ্তমানলৈকে প্ৰশাসন বা আৰক্ষীৰ তৰফৰ পৰা এই বিষয়ত কোনো আনুষ্ঠানিক বিবৃতি প্ৰকাশ কৰা পৰিলক্ষিত হোৱা নাই৷
আছুৰ সভাপতি উৎপল শৰ্মাই এই ঘটনাক তীব্ৰ নিন্দা কৰাৰ লগতে দোষীৰ কঠোৰ শাস্তি দাবী কৰিছে৷ সামাজিক মাধ্যত দিয়া এটা পোষ্টত আছুৰ নেতাগৰাকীয়ে কয়– ‘অসমৰ ৰাজধানী চহৰখনৰ মাজমজিয়াতে অসমীয়া বিৰোধী কথা কোৱা, অসমীয়া লোকক মাৰিবলৈ উদ্যত হোৱা প্ৰতিটো দুষ্কৃতিকাৰীৰ বিৰুদ্ধে ব্যৱস্থা ল’বলৈ চৰকাৰক দাবী জনাইছোঁ৷ এই ঘটনাত বাতৰি সংগ্ৰহ কৰিবলৈ যোৱা সাংবাদিক, ঘটনা নিয়ন্ত্ৰণ কৰিবলৈ যোৱা আৰক্ষীও আক্ৰমণৰ বলি হৈছে৷ তেওঁলোকৰ আশু আৰোগ্য কামনা কৰিছোঁ৷ কৰ্তব্যৰত সাংবাদিক, আৰক্ষীক আক্ৰমণ কৰা দুৰ্বৃত্ত কেইটাক কঠোৰ শাস্তি দিবলৈ দাবী জনাইছোঁ৷’ উল্লেখ্য, সাংবাদিক হৃদয় আহমেদ আৰু ভিডিঅ’ জাৰ্নেলিষ্ট অ?ন বৰদলৈক একাংশ উন্মত্ত লোকে দিন-দুপৰতে আক্ৰমণ কৰা ঘটনাক গুৱাহাটী প্ৰেছ ক্লাবে তীব্ৰ নিন্দা কৰিছে৷ গুৱাহাটী প্ৰেছ ক্লাবৰ সভাপতি খগেন কলিতা আৰু সাধাৰণ সম্পাদক অমৰেন্দ্ৰ ডেকাই এটা বিবৃতিত এই কথা প্ৰকাশ কৰাৰ লগতে জনায় যে গুৱাহাটী প্ৰেছ ক্লাবে এই ঘটনাৰ উচিত তদন্ত কৰি দোষীক আইনগত ব্যৱস্থাৰ মাধ্যমেৰে কঠোৰ শাস্তি প্ৰদানৰ বাবে আৰক্ষী-প্ৰশাসনৰ ওচৰত দাবী জনাইছে৷
