অসমৰ প্ৰাণৰ শিল্পী, কিংবদন্তি কণ্ঠশিল্পী জুবিন গাৰ্গক লৈ আন্তৰিক শ্ৰদ্ধাঞ্জলি জনাই টলিউডত নিৰ্মাণ হ’বলৈ ওলাইছে এখন নতুন সংগীত মধুৰ ছবি ‘লাভ ইউ জুবিন দা’৷ এই ছবিখন সংগীত, আৱেগ আৰু জীৱনৰ গভীৰ কাহিনীৰে গঢ় লৈ উঠা এক বিশেষ প্ৰয়াস হিচাপে ইতিমধ্যে দৰ্শকৰ মাজত আগ্ৰহ সৃষ্টি কৰিছে৷ জুবিন গাৰ্গৰ গীত-সংগীতে কেৱল অসমতেই নহয়, ভাৰতৰ বিভিন্ন ভাষাৰ দৰ্শকৰ হৃদয় জয় কৰিছে৷ অসমীয়াৰ উপৰি বাংলা, হিন্দী আদি ভাষাত তেওঁৰ অসংখ্য জনপ্ৰিয় গীত আছে৷ সেই সংগীতৰ শক্তি আৰু প্ৰভাৱক কেন্দ্ৰ কৰি এই নতুন ছবিখনৰ কাহিনী গঢ় লৈ উঠিছে৷ ছবিখনৰ কাহিনী, সংগীত আৰু পৰিচালনাৰ দায়িত্বত আছে প্ৰীতম আৰু প্ৰযোজক হৈছে এম ডি ফাৰুক উদ্দিন৷ গ্ৰীবছ মিডিয়া এণ্ড প্ৰডাকচন প্ৰাইভেট লিমিটেড আৰু বৰ্ষা মুভিজৰ সহযোগত এই ছবিখন নিৰ্মাণ কৰা হৈছে৷
‘লাভ ইউ জুবিন দা’ ছবিখনৰ মূল কাহিনী বিশাল নামৰ এজন যুৱকৰ জীৱনক লৈ৷ সৰুৰে পৰা তেওঁ জুবিন গাৰ্গৰ এজন অনুৰাগী আৰু তেওঁক লগ পোৱাৰ সপোন দেখি আহিছে৷ কিন্তু বহু চেষ্টাৰ পিছতো সেই সপোন পূৰণ নহয়৷ জীৱনৰ বিভিন্ন সংকট আৰু কঠিন বাস্তৱৰ মাজত তেওঁ আগবাঢ়ি যায়৷ এফালে নিজৰ সপোন, আনফালে জীৱনৰ সংগ্ৰাম– এই দ্বন্দ্বৰ মাজেৰেই কাহিনী আগবাঢ়ে৷ শেষত এক আচৰিত আৰু ৰহস্যময় পৰিণতিয়ে দৰ্শকক গভীৰ আৱেগৰ মাজলৈ লৈ যাব বুলি আশা কৰা হৈছে৷ এই ছবিখনৰ অন্যতম বিশেষ আকৰ্ষণ হৈছে জুবিন গাৰ্গৰ দুটা মুক্তি নোপোৱা গান, যিবোৰ প্ৰথমবাৰৰ বাবে এই ছবিৰ জৰিয়তে দৰ্শকৰ সন্মুখলৈ আহিব৷
এই গানসমূহে ছবিখনৰ আৱেগিক গভীৰতা বঢ়োৱাৰ লগতে অনুৰাগীসকলৰ বাবে এক বিশেষ উপহাৰ হিচাপে পৰিগণিত হ’ব৷ অভিনয় ক্ষেত্ৰত এই ছবিৰ জৰিয়তে বৰ্ষা সেনগুপ্তাই নায়িকা হিচাপে আত্মপ্ৰকাশ কৰিছে৷ তেওঁ এই সুযোগক লৈ অত্যন্ত আনন্দিত বুলি প্ৰকাশ কৰিছে আৰু এইটো তেওঁৰ বাবে এক ডাঙৰ দায়িত্ব বুলিও উল্লেখ কৰিছে৷ তেওঁ লগতে কয় যে জুবিন গাৰ্গৰ সৈতে থকা স্মৃতিসমূহ তেওঁৰ বাবে আজিও অমূল্য৷ পৰিচালক প্ৰীতমে জনায় যে জুবিন গাৰ্গৰ সৈতে কাম কৰাৰ অভিজ্ঞতাই তেওঁক এই ছবিখন নিৰ্মাণ কৰিবলৈ প্ৰেৰণা যোগাইছে৷ এই ছবিখনৰ জৰিয়তে তেওঁ শিল্পীগৰাকীৰ প্ৰতি আন্তৰিক শ্ৰদ্ধা জনাব বিচাৰে বুলি তেওঁ কয়৷ মুঠতে, ‘লাভ ইউ জুবিন দা’ এখন সংগীত মধুৰ, আৱেগিক আৰু প্ৰেৰণাদায়ক ছবি হিচাপে দৰ্শকৰ হৃদয় স্পৰ্শ কৰিব বুলি আশা কৰা হৈছে৷
