নাজিৰাত গুটখাৰ অবাধ প্ৰচলন : দুৰ্নীতি বিৰোধী যুব শক্তি, অসমৰ স্মাৰকপত্ৰ প্ৰদান ।
নাজিৰা
শিৱসাগৰ জিলা প্ৰশাসনে যোৱা ১৫ মে’ত এক নিৰ্দেশযোগে শিৱসাগৰ জিলাত ধপাতজাতীয় সামগ্ৰী ,গুটখা ,লালিগুৰ আদি সামগ্ৰী বিক্ৰী আৰু প্ৰচলন ৬০ দিনৰ বাবে নিষিদ্ধ ঘোষণা কৰিছিল ৷কিন্তু এই নিৰ্দেশক বৃদ্ধাগুষ্ঠ দেখুৱাই নাজিৰা মহকুমাৰ বিভিন্ন প্ৰান্তত একাংশ ব্যবসায়ীয়ে এই সামগ্ৰী সমূহ অধিক মূল্য আদায় কৰি ৰমৰমীয়া ব্যবসায় কৰাৰ অভিযোগ উঠিছে ৷ ” দুৰ্নীতি বিৰোধী যুব শক্তি , অসম”ৰ শিৱসাগৰ জিলা সমিতিয়ে যোৱা ২৮ মে’ত নাজিৰাৰ মহকুমাধিপতিক এখনি স্মাৰকপত্ৰ পত্ৰ প্ৰদান কৰি নাজিৰাৰ বিভিন্ন প্ৰান্তত চলি থকা এনে অবৈধ ব্যবসায়ৰ বিৰুদ্ধে ব্যবস্থা লবলৈ আহ্বান জনায় ৷ স্মাৰকপত্ৰত সংগঠনটোয়ে নাজিৰাৰ আৰক্ষীয়ে কেৱল যুগ্ম-অযুগ্ম সংখ্যাৰ গাড়ী ধৰাৰ বাহিৰে প্ৰশাসনৰ দ্বাৰা অবৈধ ঘোষণা কৰা ধপাত জাতীয় সামগ্ৰীৰ ক্ষেত্ৰত মৌনতা অবলম্বন কৰা ঘটনাৰ তীব্ৰ প্ৰতিক্ৰিয়া প্ৰকাশ কৰে ৷