ইৰাণৰ ৫খন তৈলবাহী জাহাজ ধ্বংস কৰাৰ দাবী আমেৰিকাৰ
মধ্যপ্ৰাচ্যত আমেৰিকা আৰু ইৰাণৰ মাজত সামৰিক উত্তেজনা অধিক তীব্ৰ হৈ পৰিছে। মাৰ্কিন চেণ্ট্ৰেল কমাণ্ড (CENTCOM)-এ দাবী কৰা অনুসৰি, ইৰাণৰ ইছলামিক ৰেভলিউচনেৰী গাৰ্ড কৰ্পছ (IRGC)-এ এখন মাৰ্কিন নৌ-যুদ্ধজাহাজক বেলিষ্টিক ক্ষেপণাস্ত্ৰৰে দুবাৰকৈ লক্ষ্য কৰি আক্ৰমণ চলোৱাৰ পিছতে আমেৰিকান সেনাই ইৰাণৰ পাঁচখন খাৰুৱা তেল কঢ়িওৱা জাহাজ ধ্বংস কৰে।
মাৰ্কিন সামৰিক সূত্ৰ অনুসৰি, IRGC-এ বেলিষ্টিক ক্ষেপণাস্ত্ৰৰে মাৰ্কিন নৌ-যুদ্ধজাহাজখনক দুবাৰকৈ আক্ৰমণৰ লক্ষ্য কৰি লৈছিল। অৱশ্যে, যুদ্ধজাহাজখনে নিজৰ প্ৰতিৰক্ষা ব্যৱস্থা ব্যৱহাৰ কৰি আক্ৰমণ এৰাই নিৰাপদে আঁতৰি যাবলৈ সক্ষম হয়। এই ঘটনাত কোনো মাৰ্কিন সামৰিক সদস্য নিহত বা আহত হোৱা নাই বুলি CENTCOM-এ প্ৰকাশ কৰিছে।
CENTCOM-এ এক বিবৃতিত কয় যে মাৰ্কিন যুদ্ধজাহাজখনে ইৰাণৰ আক্ৰমণৰ প্ৰচেষ্টা সফলভাৱে প্ৰতিহত কৰি আঞ্চলিক জলসীমাত টহল অব্যাহত ৰাখিছে। আক্ৰমণৰ ফলত কোনো মাৰ্কিন সামৰিক সদস্য আহত হোৱা নাই বুলিও কমাণ্ডটোৱে নিশ্চিত কৰে।
ইফালে, ইৰাণৰ চৰকাৰী সংবাদমাধ্যমে প্ৰকাশ কৰা তথ্য অনুসৰি, শেহতীয়া মাৰ্কিন আক্ৰমণত ইৰাণৰ দুখন তৈলবাহী জাহাজ ক্ষতিগ্ৰস্ত হৈছে। ইয়াৰে এখন জাস্ক উপকূলৰ ওচৰত আৰু আনখন খাৰ্গ দ্বীপৰ সমীপত আক্ৰমণৰ সন্মুখীন হয়।
ইৰাণী সংবাদমাধ্যমৰ প্ৰতিবেদন অনুসৰি, জাস্কৰ ওচৰত থকা তৈলবাহী জাহাজখনত বিস্ফোৰণ সংঘটিত হোৱাৰ পিছত জাহাজখনৰ কৰ্মচাৰীসকলক নিৰাপদ স্থানলৈ স্থানান্তৰ কৰা হয়। খাৰ্গ দ্বীপৰ ওচৰত সংঘটিত আক্ৰমণতো কোনো লোক হতাহত হোৱা নাই বুলি ইৰাণী পক্ষই দাবী কৰিছে।
দুয়ো পক্ষৰ এই পৰস্পৰবিৰোধী দাবীৰ মাজতে মধ্যপ্ৰাচ্যৰ সাগৰীয় অঞ্চলত সামৰিক উত্তেজনা বৃদ্ধি পোৱাক লৈ আন্তঃৰাষ্ট্ৰীয় মহলত উদ্বেগ সৃষ্টি হৈছে।
