আজি তিনিদিন ধৰি সম্পূৰ্ণৰূপে জলমগ্ন হৈ আছে গোগামুখ-ঢকুৱাখনা পথৰ গোগামুখ নগৰ অংশ ৷ ফলল যাতায়াতৰ ক্ষেত্ৰত চৰম দুৰ্ভোগৰ সন্মুখীন হৈছে স্থানীয় ৰাইজ ৷ আজি গোগামুখ আঞ্চলিক ছাত্ৰ সন্হাৰ উদ্যোগত বিধ্বস্ত গোগামুখ ঢকুৱাখনা পথৰ উন্নতিৰ লগতে আন বিভিন্ন দাবীৰ সমৰ্থনত গোগামুখ-ঢকুৱাখনা পথৰ ওপৰতে সহস্ৰাধিক ৰাইজে প্ৰতিবাদ সাব্যস্ত কৰে ৷ প্ৰতিবাদী সকলে অসম চৰকাৰ কাম নাই, লোকনিৰ্মাণ বিভাগ হুচিয়াৰ, দুৰ্নীতিগ্ৰস্ত শিৱম কনষ্ট্ৰাকশ্বনক ব্লেক লিষ্টেড কৰক, বিধ্বস্ত পথ শীঘ্ৰে পুনৰ নিৰ্মাণ কৰক, গোগামুখ-ঢকুৱাখনা পথত নলা-নৰ্দমা নিৰ্মাণ কৰক আদি শ্ল’গান দি গোগামুখ নগৰ উত্তাল কৰি তোলে৷ বিক্ষোভৰ অন্তত গোগামুখ আঞ্চলিক ছাত্ৰ সন্হাৰ সভাপতি দিগন্ত বৰুৱা, সম্পাদক ৰাউল দেউৰী স্বাক্ষৰিত এখন স্মাৰকপত্ৰ গোগামুখ ৰাজহ চক্ৰ বিষয়াৰ হাতত প্ৰদান কৰে ৷ স্মাৰকপত্ৰখনত গোগামুখ-ঢকুৱাখনা পথ অতিশীঘ্ৰে মেৰামতি কৰা, গোগামুখত সুপৰিকল্পিত নলা-নৰ্দমা নিৰ্মাণ কৰা, গোগামুখৰ ভূমি বে-দখলমুক্ত কৰা, বানপীড়িত অঞ্চলত পৰ্যাপ্ত পৰিমাণৰ বান সাহায্য দিয়া, ন-নদীৰ গৰাখহনীয়া প্ৰতাৰোধ কৰা আদি দাবীয়ে প্ৰদান আছিল ৷ উল্লেখনীয় যে, গোগামুখ নগৰৰ পৰা গোগামুখ ঢকুৱাখনা পথৰ চাৰিকিলোমিটাৰ দূৰত্বলৈ বিভিন্ন চৰকাৰী অনুষ্ঠান-প্ৰতিষ্ঠান আৰু শিক্ষানুষ্ঠান আছে৷
এনেক্ষেত্ৰত গোগামুখৰ ভিতৰতে এই পথটোৰ গুৰুত্ব সৰ্বাধিক ৷ এনে পৰিপ্ৰেক্ষিতত গোগামুখ আঞ্চলিক ছাত্ৰ সন্হাই পথটো উন্নত মানদণ্ড কৰিবলৈ দীৰ্ঘদিনে দাবী কৰি আহিছে৷ বিক্ষোভ কাৰ্যসূচীত উপস্থিত থাকি গোগামুখ আঞ্চলিক ছাত্ৰ সন্হাৰ উপদেষ্টা ঋতুপৰ্ণ কোঁচে পথটোৰ নিৰ্মাণত অসম চৰকাৰৰ লোকনিৰ্মাণ বিভাগ আৰু শিৱম কনষ্ট্ৰাকশ্বনে মিলি বিয়াগোম দুৰ্নীতি সংঘটিত কৰাৰ অভিযোগ কৰা লগতে এই দুৰ্নীতিৰ টকাৰ ভাগ স্থানীয় মন্ত্ৰী, বিধায়ক আৰু সাংসদেও লাভ কৰা বুলি মন্তব্য দিয়ে৷
