ওদালগুৰি জিলাৰ কৃষি বিভাগৰ সহযোগত ৩ আৰু ৪ ছেপ্টেম্বৰত দুদিনীয়াকৈ কিষান মেলা-২০২২ অনুষ্ঠিত হয়।মেলাৰ কাৰ্যসূচী মতে কৃষক মেলাখন মুকলি কৰে বিটিচিৰ কৃষি বিভাগৰ কাৰ্যবাহী সদস্য ঘনশ্যাম দাসে। উদ্বোধনী অনুষ্ঠানত ভাষণ প্ৰদান কৰি তেওঁ কেন্দ্ৰীয় চৰকাৰ আৰু ৰাজ্য চৰকাৰৰ দ্বাৰা ৰূপায়িত আঁচনি সমূহ গ্ৰহণ কৰি কৃষি ক্ষেত্ৰক আগবঢ়ায় নিবলৈ কৃষক ৰাইজক আহ্বান জনায়। ভাষণত তেওঁ কৃষি পদ্ধতিৰ মানদণ্ড উন্নত কৰাৰ ক্ষেত্ৰতো গুৰুত্ব আৰোপ কৰে।
এই অনুষ্ঠানৰ লগতে কাৰ্যবাহী সদস্য ঘনশ্যাম দাস আৰু ড° নিলোৎ স্বৰ্গীয়াৰীয়ে ওদালগুৰি জিলা কৃষি বিভাগৰ নৱ নিৰ্মিত ভূমি পৰীক্ষাগাৰৰ RCC ৱিল্ডিংৰ শুভ উদ্বোধন কৰে।বিটিচিৰ তৰফৰ পৰা ওদালগুৰি জিলাৰ তিনিজন শ্ৰেষ্ঠ কৃষক নিৰ্বাচিত কৰি ২০২২ বৰ্ষৰ শ্ৰেষ্ঠ কৃষকৰ বঁটা কৃষক মেলাৰ আজিৰ অনুষ্ঠানতে প্ৰদান কৰা হয়। ভেৰগাঁও কৃষি খণ্ডৰ কৃষক বিনেশ্বৰ বাগলাৰীয়ে প্ৰথম পুৰস্কাৰ, ভকতপাৰাৰ কৃষক উত্তম কুমাৰ বড়োৱে দ্বিতীয় পুৰস্কাৰ আৰু মাজবাটৰ গীতা ৰাভাই তৃতীয় পুৰস্কাৰ লাভ কৰে। প্ৰথম পুৰস্কাৰ হিচাপে এখন পাৱাৰ টিলাৰ, দ্বিতীয় আৰু তৃতীয় পুৰস্কাৰ হিচাপে pulverizer প্ৰদান কৰা হয়। কৃষক মেলাৰ সৈতে সংগতি ৰাখি ১২৫ টা মহিলা আত্ম সহায়ক গোটক ১০,০০০ টকাকৈ এককালীন অনুদান প্ৰদান কৰা হয়।
কৃষক মেলাৰ সৈতে সংগতি ৰাখি কৃষক আৰু কৃষি বিজ্ঞানীৰ মত বিনিময় তথা প্ৰশিক্ষণ কাৰ্যসূচীও গ্ৰহণ কৰা হৈছে।ওদালগুৰি জিলা কৃষি বিজ্ঞান কেন্দ্ৰৰ মুৰব্বী, জ্যেষ্ঠ কৃষি বিজ্ঞানী ড° দেৱাশীষ বৰাই আজি “কৃষি খণ্ডৰ উপাৰ্জন দুগুণ কৰা আৰু জৈৱিক খেতি”ৰ সন্দৰ্ভত অনুষ্ঠিত কৰা আলোচনাখন আগবঢ়ায়। আলোচনাখনত মহিলা আত্ম সহায়ক গোট তথা ওদালগুৰি জিলাৰ ১৪ টা কৃষি খণ্ডৰ কৃষকে অংশগ্ৰহণ কৰে।কৃষক মেলাখনত ওদালগুৰি জিলাৰ মীন বিভাগ, পশু পালন আৰু পশু চিকিৎসা বিভাগ, ৰেচম বিভাগৰ লগতে কৃষি বিজ্ঞান কেন্দ্ৰৰ কাৰ্য-কলাপ আৰু drip and sprinkler irrigation ৰ নমুনা সমূহ প্ৰদৰ্শন কৰা হয়। আনহাতে দ্বিতীয় দিনৰ অৰ্থাৎ আজি আৰু কাইলৈৰ কাৰ্যসূচী হিচাপে গাহৰি প্ৰতিপালন, বিজ্ঞান সন্মত মীন পালন, ৰেচমৰ জৰিয়তে মহিলা সৱলীকৰণ সন্দৰ্ভত তিনিখন আলোচনাচক্ৰত কৃষি বিশেষজ্ঞৰ সৈতে মত-বিনিময় আৰু প্ৰশিক্ষণৰ ব্যৱস্থা কৰা হ’ব বুলি উদ্যোগতাই জানিবলৈ দিয়ে।
