বিশিষ্ট ক্ৰীড়া সাংবাদিক সুবোধমল্ল বৰুৱাৰ ‘’বেদুইনৰ পৃথিৱীত ফুটবলৰ ঢৌ’’ শীৰ্ষক ক্ৰীড়াভিত্তিক গ্ৰন্থখন শুকুৰবাৰে গুৱাহাটীত উন্মোচন কৰা হয়। গ্ৰন্থখন উন্মোচন কৰে ৰাজ্যিক তথ্য আয়ুক্ত সমুদ্ৰগুপ্ত কাশ্যপে। শেহতীয়াকৈ কাটাৰত অনুষ্ঠিত ফিফা বিশ্বকাপত ৩৫ দিন থাকি যি ‘গ্ৰাউণ্ড জিৰো’ প্ৰতিবেদন প্ৰস্তুত কৰিছিল তাৰ ভিত্তিত বৰুৱাই এই গ্ৰন্থখন ৰচনা কৰিছে। গ্ৰন্থখন উন্মোচন কৰি সমুদ্ৰগুপ্ত কাশ্যপে কয় যে এই গ্ৰন্থখনে ৰাজ্যৰ ক্ৰীড়া সাহিত্যৰ ভড়াল চহকী কৰিব। পৰৱৰ্তী সময়ত ক্ৰীড়া বিষয়ক গৱেষণাৰ বাবেও এই গ্ৰন্থখন সমল হোৱাৰ থল আছে। তদুপৰি গ্ৰন্থখনত কাটাৰ বিশ্বকাপৰ বিভিন্ন ষ্মৰণীয় ঘটনা আৰু কাটাৰৰ সমাজ জীৱনৰ অনেক জানিবলগীয়া কথা সন্নিবিষ্ট হৈছে। গ্ৰন্থখনত ৪০ পৃষ্ঠাজোৰা ছবিয়ে কাটাৰ বিশ্বকাপৰ বহু ছন্দময় ঘটনা প্ৰতিফলিত কৰিছে। গ্ৰন্থখন পঢ়ুৱৈ সমাজে আকোৱালি ল’ব বুলি তেওঁ আশাবাদী।অসম ক্ৰীড়া সাংবাদিক সন্থাৰ সভাপতি সুৱোধমল্ল বৰুৱাৰ ‘’বেদুইনৰ পৃথিৱীত ফুটবলৰ ঢৌ’’ শীৰ্ষক গ্ৰন্থখন প্ৰকাশ কৰিছে মালিয়াতা প্ৰকাশনে। গ্ৰন্থখন চলিত অসম গ্ৰন্থমেলাৰ এম আৰ পাব্লিকেশ্বনত উপলব্ধ হোৱাৰ লগতে এমাজ’ন আৰু ফ্লিপকাৰ্টতো উপলব্ধ হ’ব।
উল্লেখ্য, ভাৰতীয় ক্ৰীড়া সাংবাদিক সন্থাৰ প্ৰাক্তন সভাপতি সুবোধমল্ল বৰুৱাৰ এইখন হ’ল ষষ্ঠখন গ্ৰন্থ। ইয়াৰ পূৰ্বে তেওঁ বিখ্যাত ফুটবলাৰৰ ল’ৰালি কাল, জীৱন যৌৱন ক্ৰীড়াংগন, অসম ফুটবলৰ বৰ্ণিল যাত্ৰা, যাত্ৰাৰ আঁৰৰ যাত্ৰা, ক্ৰীড়া সাংবাদিক সুৱোধমন্ন বৰুৱাৰ ৰচনাৱলী শীৰ্ষক গ্ৰন্থকেইখন ৰচনা কৰিছিল।
আজিৰ গ্ৰন্থ উন্মোচনী অনুষ্ঠানত প্ৰবীণ ক্ৰীড়া সাংবাদিক পবিত্ৰ গগৈ, বলেন্দ্ৰমোহন চৌধুৰী, গ্ৰন্থখনৰ প্ৰকাশক মায়াৰাম দাস, বিশিষ্ট সাংবাদিক বেদব্ৰত মিশ্ৰ, বিশিষ্ট ক্ৰীড়া সাংবাদিক বিদ্যুৎ কলিতাকে ধৰি কেইবাজনো বিশিষ্ট ব্যক্তি উপস্থিত থাকে।
